ថ្លែងនៅក្នុងសន្និសីទសារព័ត៌មាន នាព្រឹកថ្ងៃទី២៥ ខែកញ្ញា ឆ្នាំ២០២៣ នេះ លោក ហ្សង់ ហ្វ្រង់ស័រ តាន់ រដ្ឋមន្ត្រីប្រតិភូអមនាយករដ្ឋមន្ត្រីបានថ្លែងថា នៅក្នុងកិច្ចពិភាក្សាទូទៅ នៃសម័យប្រជុំលើកទី៧៨ នៃមហាសន្និបាតអង្គការសហប្រជាជាតិ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា មានសារនយោបាយសំខាន់ៗចំនួន៣ ក្នុងនោះ ក៏មានការមិនអនុញ្ញាតឱ្យមានមូលដ្ឋានយោធានៅលើទឹកដីរបស់ខ្លួនផងដែរ។
បើតាមលោក ហ្សង់ ហ្វ្រង់ស័រតាន់ សារនយោបាយសំខាន់ៗទាំង៣នោះរួមមាន ទី១. កម្ពុជា ក៏ដូចជាបណ្ដាប្រទេសនានា គឺតម្កល់ផលប្រយោជន៍ជាតិជាធំ។ ទី២. កម្ពុជាពង្រឹងមិត្តភាពដែលមានស្រាប់ និងពង្រីកមិត្តភាពបន្ថែម បើកបេះដូងរកមិត្តភាពថ្មី។ ទី៣. កម្ពុជា មិនអនុញ្ញាតឲ្យមានមូលដ្ឋានយោធា នៃប្រទេសដទៃ នៅលើទឹកដីកម្ពុជានោះឡើយ។
លោកអះអាងថា រឿងរ៉ាវជុំវិញមូលដ្ឋានយោធារា បានកើតមានអស់រយៈពេលជាច្រើនឆ្នាំមកហើយ ពេលនេះគួរតែបញ្ចប់ ហើយក៏ត្រូវតែចប់ដែរ ពីព្រោះនេះជាលើកទីមួយបង្អស់ នៅលើវេទិកានៃមហាសន្និបាតអង្គការសហប្រជាជាតិ ដែលកម្ពុជាតាមរយៈសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃប្រទេសកម្ពុជា ប្រកាសយ៉ាងចំហទៅកាន់ពិភពលោក ដោយយកពិភពលោកជាសាក្សី។ លោកថា ចាប់ពីពេលនេះតទៅ គួរឈប់និយាយពីបញ្ហាមូលដ្ឋានយោធាបរទេសនៅកម្ពុជាតទៅទៀត។
ថ្លែងនៅក្នុងឳកាសនោះដែរ លោក តាន់ ហ្សង់-ហ្វ្រង់ស្វ័រ បានរំលេចថា តាំងពីឆ្នាំ១៩៥៣ តាំងពីកម្ពុជាក្លាយជាប្រទេសឯករាជ្យ មិនដែលមានទស្សនកិច្ចផ្លូវការណាមួយ ពីសំណាក់ប្រធានាធិបតីអាមេរិក មកលើទឹកដីប្រទេសកម្ពុជាទេ។ តែនៅឆ្នាំ២០១២ វត្តមានលោក បារ៉ាក់ អូបាម៉ា នៅទឹកដីកម្ពុជា មិនមែនមកបំពេញទស្សនកិច្ចនៅទឹកដីកម្ពុជាទេ តែមកចូលរួមកិច្ចប្រជុំអាស៊ានបូក និងកិច្ចប្រជុំកំពូលអាស៊ីបូព៌ា ហើយនៅឆ្នាំ២០២៣ វត្តមានលោក ចូ បៃឌិន ក៏មិនមែនមកបំពេញទស្សនកិច្ចនៅកម្ពុជាដែរ តែមកចូលរួមកិច្ចប្រជុំអាស៊ានបូក និងកិច្ចប្រជុំកំពូលអាស៊ីបូព៌ាដូចគ្នា។
គួររំលឹកថា សម្តេចធិបតី ហ៊ុន ម៉ាណែត អញ្ជើញទៅបំពេញបេសកកម្មការងារនៅអាមេរិក ដើម្បីឡើងថ្លែងសុន្ទរកថាក្នុងមហាសន្និបាតរបស់អង្គការសហប្រជាជាតិលើកទី៧៨ នៅទីស្នាក់ការកណ្តាលអង្គការសហប្រជាជាតិ នាទីក្រុងញូវយ៉ក សម្តេចធិបតី នាយករដ្ឋមន្រ្តី បានជួបសម្តែងការគួរសម និងជជែកការងារជាមួយអនុរដ្ឋមន្ត្រីស្តីទីនៃក្រសួងការបរទេសអាមេរិក។ ក្នុងជំនួបនេះ ភាគីអាមេរិកក៏បានអះអាងថា ជំនួយអភិវឌ្ឍន៍ដែលរដ្ឋាភិបាលអាមេរិក ដែលបានកាត់ពីប្រទេសកម្ពុជា ចំនួន១៨លានដុល្លារអាមេរិកមុនការបោះឆ្នោតនោះ សហរដ្ឋអាមេរិកបានសម្រេចឱ្យបន្តផ្តល់ជូនឡើងវិញផងដែរ៕