ពិធីផ្សព្វផ្សាយ និងដាក់ឱ្យអនុវត្តអនុក្រឹត្យ ស្ដីពីការផ្ទេរមុខងារក្នុងវិស័យអប់រំ យុវជន និងកីឡា ទៅឱ្យរដ្ឋបាលក្រុង ស្រុក ខណ្ឌនេះ បានធ្វើឡើងនៅក្រសួងមហាផ្ទៃ នាព្រឹកថ្ងៃសុក្រ ទី២២ ខែកញ្ញា ឆ្នាំ២០២៣នេះ ក្រោមអធិបតីភាពឯកឧត្តមអភិសន្ដិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងជាប្រធានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យ នៅថ្នាក់ក្រោមជាតិ (គ.ជ.អ.ប) និងឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ដ្រី រដ្ឋមន្ដ្រីក្រសួងអប់រំ ដោយមានការចូលរួមពីមន្រ្តីពាក់ព័ន្ធយ៉ាងច្រើន។
មានប្រសាសន៍នៅក្នុងពិធីនោះ ឯកឧត្តមបណ្ឌិតសភាចារ្យ ហង់ជួន ណារ៉ុន បានលើកឡើងថា ការផ្សព្វផ្សាយ និងការដាក់ឱ្យអនុវត្តអនុក្រឹត្យស្ដីពី ការផ្ទេរមុខងារក្នុងវិស័យអប់រំទៅឱ្យរដ្ឋបាលក្រុង-ស្រុក-ខណ្ឌនេះ គឺជាព្រឹត្តិការណ៍ដ៏មានសារៈសំខាន់ ប្រកបដោយមានអត្ថន័យយ៉ាងជ្រាលជ្រៅ និងបង្ហាញអំពីវឌ្ឍនភាពថ្មីមួយទៀត ក្នុងការអនុវត្តកម្មវិធីកំណែទម្រង់វិមជ្ឈការ និងវិសហមជ្ឈការ និងកំណែទម្រង់វិស័យអប់រំ ព្រមទាំងបង្ហាញអំពីឆន្ទៈ និងការប្ដេជ្ញាចិត្តរបស់រាជរដ្ឋាភិបាលកម្ពុជា នីតិកាលទី៧ ក្នុងការគាំទ្រវិស័យអប់រំ។
ទាក់ទងបញ្ហានេះ អភិបាលរដ្ឋបាលក្រុងសៀមរាប តំណាងឱ្យរដ្ឋបាលក្រុង ស្រុក ខណ្ឌ ទូទាំងប្រទេស បានប្ដេជ្ញាខ្ពស់ក្នុងការគ្រប់គ្រងចាត់ចែង អនុវត្តមុខងារ របស់ក្រសួងអប់រំ ដោយបន្តផ្តល់ការយកចិត្តទុកដាក់ប្រកបដោយសា្មរតីទទួលខុសត្រូវខ្ពស់ ក្នុងការដឹកនាំគ្រប់គ្រង ចាត់ចែងអនុវត្តមុខងាររបស់ក្រសួងអប់រំ ឱ្យមានប្រសិទ្ធភាពខ្ពស់ សមភាព ដើម្បីធានាសម្រេចបានគុណភាពសេវាអប់រំ ដែលបានកំណត់ដោយក្រសួងអប់រំ។
មានប្រសាសន៍ពិធី ឯកឧត្តមអភិសន្ដិបណ្ឌិត ស សុខា បានលើកឡើងថា រាជរដ្ឋាភិបាល នីតិកាលទី៧ ដោយមានគណៈកម្មាធិការជាតិសម្រាប់ ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប.) ជាសេនាធិការ នឹងបន្តពង្រឹង និងជំរុញការអនុវត្ត “កម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដំណាក់កាលទី២ ពីឆ្នាំ២០២១ ដល់ឆ្នាំ២០៣០” ដោយបន្តផ្ដោតលើការបែងចែកមុខងារ ការទទួលខុសត្រូវ និងខ្សែគណនេយ្យភាពឱ្យបានកាន់តែច្បាស់លាស់រវាងក្រសួង ស្ថាប័នថ្នាក់ជាតិ និងរដ្ឋបាលថ្នាក់ក្រោមជាតិ និងរវាងរដ្ឋបាលថ្នាក់ក្រោមជាតិ និងរដ្ឋបាលថ្នាក់ក្រោមជាតិតាមប្រភេទនីមួយៗ។
ឯកឧត្តមអភិសន្ដិបណ្ឌិត ស សុខា បន្ថែមថា គ.ជ.អ.ប នឹងបន្តអភិវឌ្ឍស្ថាប័នរដ្ឋបាលក្រុង ស្រុក ឱ្យក្លាយជារដ្ឋបាលមូលដ្ឋានជួរមុខ និងជាស្ថាប័នអភិបាលកិច្ចតាមបែបប្រជាធិបតេយ្យ តំណាងឱ្យសម្លេង និងផលប្រយោជន៍របស់ប្រជាជន មានលទ្ធភាពគាំទ្រ សម្របសម្រួល និងសហការជាមួយរដ្ឋបាលឃុំ សង្កាត់ ក្នុងការផ្តល់សេវាសាធាណៈនានា ជូនប្រជាជនក្នុងដែនសមត្ថកិច្ចរបស់ខ្លួន ឱ្យកាន់តែមានប្រសិទ្ធភាព៕