ការចាប់ផ្តើមជាមួយវិបត្តិការទូតដែលផ្ទុះឡើងរវាងគណៈប្រតិភូអ៊ុយក្រែន និងអ៊ីស្រាអែលនៅខាងក្នុងច្រករបៀងរបស់អង្គការសហប្រជាជាតិក្នុងទីក្រុងញូវយ៉ក សហរដ្ឋអាមេរិក បន្ទាប់ពីគណៈប្រតិភូទីក្រុង Tel Aviv ដឹកនាំដោយនាយករដ្ឋមន្ត្រីលោក Benjamin Netanyahu បានប្រើប្រាស់ផែនទីចាស់បង្ហាញថាប្រទេសអ៊ុយក្រែនទាំងស្រុងគឺស្ថិតនៅខាងក្នុងព្រំដែន​នៃ​សហភាព​សូវៀត ដែល​បាន​បង្ក​ឱ្យ​មាន​ការសើច​ចំអក​ជា​ច្រើន​នៅ​លើ​ប្រព័ន្ធ​ផ្សព្វផ្សាយ​សង្គមផ្សេងៗ។ ម៉្យាងវិញទៀត ឧត្តមសេនីយរុស្ស៊ីដែលត្រូវបានបណ្តេញចេញ លោក Sergei Sorovokin បានបង្ហាញខ្លួននៅក្នុងរដ្ឋអាល់ហ្សេរីដោយមិនបានបញ្ជាក់ពីមូលហេតុនៃវត្តមានរបស់លោកនៅទីនោះ ឬមួយត្រូវតែងតាំងលោកឱ្យកាន់តំណែងណាមួយឡើយ ដែលចោទប្រកាន់លោកថាបានចូលរួមក្នុងការធ្វើរដ្ឋប្រហារមិនពេញលេញរបស់ក្រុម Wagner ផងដែរ។ នៅឯអង្គការសហប្រជាជាតិ ប្រធានាធិបតីអ៊ុយក្រែនលោក បានចោទប្រកាន់សម្ព័ន្ធមិត្តអឺរ៉ុបរបស់លោកថាបានជួយរុស្ស៊ីក្នុងការប្រើប្រាស់ចំនីអាហារជាអាវុធតាមរយៈការសម្រេចចិត្តក្នុងការហាមឃាត់នាំចូលគ្រាប់ធញ្ញជាតិអ៊ុយក្រែន។ ប៉ូឡូញបានឆ្លើយតបភ្លាមៗចំពោះសុន្ទរកថារបស់លោក Zelensky ដោយកោះហៅឯកអគ្គរដ្ឋទូតអ៊ុយក្រែន និងគំរាមហាមឃាត់ផលិតផលកសិកម្មរបស់អ៊ុយក្រែនបន្ថែមទៀត។

1. Netanyahu ស្ទើរតែប្រើប្រាស់ផែនទីចាស់ដោយគ្មានអ៊ុយក្រែន

យោងតាមសារព័ត៌មាន The Time Of Israel ចុះផ្សាយថ្ងៃទី២១ ខែកញ្ញាបានអោយដឹងថា​​​ ផែនទីចាស់ដែលបង្ហាញពីសម័យសហភាពសូវៀតត្រូវបានរុញចេញពីបន្ទប់ប្រជុំនៅអង្គការសហប្រជាជាតិកាលពីថ្ងៃទី19 ខែកញ្ញាកន្លងទៅនេះ។ កុងស៊ុលរបស់អ៊ីស្រាអែលនៅទីក្រុងញូវយ៉កស្ទើរតែបង្កឱ្យមានឧប្បត្តិហេតុការទូតដ៏ធំមួយបន្ទាប់ពីខ្លួនចាប់យកផែនទីខុសសម្រាប់កិច្ចប្រជុំរបស់លោកនាយករដ្ឋមន្រ្តី Benjamin Netanyahu ជាមួយមេដឹកនាំអ៊ុយក្រែនលោក Volodymyr Zelensky ។

ការិយាល័យនាយករដ្ឋមន្ត្រីចង់បានផែនទីពិភពលោកមួយសម្រាប់កិច្ចប្រជុំ។ ដូច្នេះ​​កុងស៊ុល​បាន​នាំ​យកផែនទី​មួយ​មក​ នេះ​បើ​តាម​សារព័ត៌មាន Israel Hayom។

អី្វដែរជាបញ្ហា? នោះគឺព្រោះផែនទីនេះមានតាំងពីទសវត្សរ៍ឆ្នាំ1960មកម្ល៉េះ ហើយបង្ហាញពីដែនដីសហភាពសូវៀតដោយគ្មានដែនដីឯករាជ្យរបស់អ៊ុយក្រែនទេ។ បន្ទាប់មកវាក៏ត្រូវបានយកចេញយ៉ាងឆាប់រហ័សនៅប្រមាណជា10នាទីមុនពេលកិច្ចប្រជុំ។

ទំនាក់ទំនងរវាងទីក្រុង Kyiv និងទីក្រុង Jerusalem មានភាពតានតឹងក្នុងប៉ុន្មានឆ្នាំថ្មីៗនេះ ជុំវិញបញ្ហាជំនួយ។ អ៊ីស្រាអែល​បាន​បដិសេធ​មិន​បញ្ជូន​ជំនួយ​ដល់​អ៊ុយក្រែន​ ដោយ​ភ័យ​ខ្លាច​នឹង​បង្កកំហឹង​ដល់​រុស្ស៊ី និង​អាច​បង្ក​គ្រោះថ្នាក់​ដល់​សេរីភាព​របស់​កងកម្លាំង​ការពារ​អ៊ីស្រាអែល​នៅ​ស៊ីរី។

2. មេទ័ពរុស្ស៊ីក្បត់ត្រឡប់មកបម្រើជាតិវិញ 

យោងតាមសារព័ត៌មាន Reuters ចុះផ្សាយថ្ងៃទី១៥ ខែកញ្ញា​​​បានអោយដឹងថា សារព័ត៌មាន Kommersant បានរាយការណ៍កាលពីថ្ងៃសុក្រថា ឧត្តមសេនីយ៍រុស្ស៊ីលោក Sergei Surovikin ស្ថិតនៅក្នុងប្រទេសអាល់ហ្សេរី ដែលជាផ្នែកមួយរបស់គណៈប្រតិភូក្រសួងការពារជាតិ នៅក្នុងការវិលត្រឡប់មកបំពេញការងារជាផ្លូវការវិញ បន្ទាប់ពីលោករងការសង្ស័យមានជាប់ពាក់ព័ន្ធនឹងការបះបោរប្រឆាំងកាលពីខែមិថុនាជាមួយនឹងកម្លាំងទាហានស៊ីឈ្នួល Wagner ។ 

កាសែតបានចុះផ្សាយរូបថតរបស់លោក Surovikin ស្លៀកឈុតពណ៌កាគី ដោយគ្មានសញ្ញាយោធា ដោយពួកគេបាននិយាយថា ត្រូវបានថតនៅប្រទេសអាល់ហ្សេរី ដែលជាប្រទេសទិញអាវុធរុស្ស៊ីដ៏សំខាន់មួយ។

លោក Surovikin ដែលត្រូវបានអោយរហ័សនាមថា "General Armageddon" គឺដោយសារភាពលេចធ្លោរបស់លោកក្នុងការប្រើប្រាស់យុទ្ធសាស្ត្រCarpet Bombing នៅក្នុងការជ្រៀតជ្រែកយោធារុស្ស៊ីនៅក្នុងសង្គ្រាមស៊ីវិលស៊ីរី និងបានដឹកនាំយុទ្ធនាការរបស់រុស្ស៊ីនៅអ៊ុយក្រែនកាលពីឆ្នាំមុន។ 

3. ប៉ូឡូញចាប់ផ្តើមបង្ហាញការបោះបង់ចោលអ៊ុយក្រែនជាផ្លូវការ

យោងតាមសារព័ត៌មាន Reuters ចុះផ្សាយថ្ងៃទី២០ ខែកញ្ញាបានអោយដឹងថា ប្រទេសប៉ូឡូញបានកោះហៅបេសកជនរបស់ទីក្រុង Kyiv ទៅកាន់ក្រសួងការបរទេសកាលពីថ្ងៃពុធ បន្ទាប់ពីការអត្ថាធិប្បាយរបស់ប្រធានាធិបតីអ៊ុយក្រែនស្តីពីការហាមឃាត់ការនាំចូលគ្រាប់ធញ្ញជាតិបានធ្វើឱ្យរដ្ឋាភិបាលទីក្រុង Warsawខឹងសម្បា ខណៈដែលកំពុងតែពង្រឹងជំហររបស់ខ្លួនមុនការបោះឆ្នោតខែតុលានេះ។

ក្រសួងការបរទេសអ៊ុយក្រែនបានអំពាវនាវឱ្យមានភាពស្ងប់ស្ងាត់នៅក្នុងជម្លោះដែលបានកើតឡើងរវាងទីក្រុង Kyiv ប្រឆាំងនឹងប្រទេសជិតខាងទាំង3 ជុំវិញការសម្រេចចិត្តរបស់ពួកគេក្នុងការដាក់ការហាមឃាត់ឯកតោភាគីលើការនាំចូលកសិផលរបស់អ៊ុយក្រែន។

ប៉ូឡូញគឺជាសម្ព័ន្ធមិត្តដ៏រឹងមាំបំផុតមួយរបស់ទីក្រុង Kyiv ចាប់តាំងពីរុស្ស៊ីបានឈ្លានពានអ៊ុយក្រែនក្នុងខែកុម្ភៈ ឆ្នាំ2022 ប៉ុន្តែប្រទេសទាំងនេះកំពុងជាប់គាំងនៅក្នុងជម្លោះជុំវិញការនាំចូលកសិផលនេះ។ ប្រទេសប៉ូឡូញ ហុងគ្រី និងស្លូវ៉ាគី បានបន្តការហាមឃាត់ការនាំចូលគ្រាប់ធញ្ញជាតិរបស់អ៊ុយក្រែន។