នៅវេលាម៉ោង៧ព្រឹក ថ្ងៃទី២០ ខែកញ្ញា ឆ្នាំ២០២៣នេះ គ្រប់ស្ថាប័នថ្នាក់ជាតិ និងថ្នាក់ក្រោមជាតិ ព្រមទាំងរដ្ឋបាលរាជធានី-ខេត្ត ក្រុង-ស្រុក-ខណ្ឌ ឃុំ-សង្កាត់ ក៏ដូចជានៅតាមទីវត្តអារាម ក្រុមហ៊ុន រោងចក្រ សហគ្រាសនានា បាននាំគ្នាវាយគង វាយជួង វាយឃ្មោះ ទូងស្គរ ទះប៉ោត និងគោះត្រដោកជាដើម យ៉ាងកងរំពង ដើម្បីអបអរសាទរព្រឹត្តិការណ៍ប្រវត្តិសាស្ត្រ ដែល ”រមណីយដ្ឋានប្រាសាទកោះកេរ” ត្រូវបានចុះក្នុងបញ្ជីបេតិកភណ្ឌពិភពលោករបស់អង្គការយូណេស្កូ។
ដើម្បីឲ្យប្រជាពលរដ្ឋ មហាជនជាតិ និងអន្តរជាតិ បានយល់ពីមូលហេតុដែលអង្គការយូណេស្កូបានសម្រេចចុះបញ្ជី ”រមណីយដ្ឋានប្រាសាទកោះកេរ” ជាសម្បត្តិបេតិកភណ្ឌពិភពលោក ក្រសួងវប្បធម៌ និងវិចិត្រសិល្បៈ បានចេញសេចក្តីជូនដំណឹងមួយ ទាក់ទងលក្ខណៈវិនិច្ឆ័យ នៃតម្លៃលេចធ្លោជាសកល របស់ ”រមណីយដ្ឋានប្រាសាទកោះកេរ”។
ក្រសួងវប្បធម៌បានអះអាងថា នៅក្នុងកិច្ចប្រជុំលើកទី៤៥ នាថ្ងៃទី១៧ ខែកញ្ញា ឆ្នាំ២០២៣ នៅទីក្រុងវីយ៉ាដ ប្រទេសអារ៉ាប៊ីសាអូឌីត (Saudia Arabia) គណៈកម្មាធិការបេតិកភណ្ឌពិភពលោកបានសម្រេចជាឯកច្ឆន្ទចុះ “រមណីយដ្ឋានប្រាសាទកោះកេរ” ក្នុងបញ្ជីបេតិកភណ្ឌពិភពលោក នៃអង្គការយូណេស្កូ ដោយផ្អែកលើលក្ខណៈវិនិច្ឆ័យចំនួនពីរ ដែលមានចែងក្នុងគោលការណ៍ណែនាំប្រតិបត្តិ នៃអនុសញ្ញាឆ្នាំ១៩៧២ រួមមាន៖
លក្ខណៈវិនិច្ឆ័យទី២ (Criteria ii) ៖ រមណីយដ្ឋានបុរាណវិទ្យាកោះកេរ បង្ហាញក្នុងលក្ខណៈ ដ៏វិសេសវិសាលមួយ នូវចំណុចគួបប្រសព្វ រវាងតម្លៃមនុស្ស ដែលបង្កើតបានជារចនាបថកោះកេរ ដែលក្នុងនោះក្បាច់ចម្លាក់បដិមាបង្ហាញពីភាពក្លាហាន រូបភាពបង្កប់នូវការស្រមៃ និងវិញ្ញាណរស់រវើក អំពីចលនារបស់ក្បាច់ចម្លាក់ ដែលកើតចេញពីការបញ្ចូលគ្នា នៃនិមិត្តរូបសាសនា និងសិល្បៈ របស់ឥណ្ឌា ជាមួយគោលគំនិតរចនាក្នុងស្រុក និងសិល្បៈហត្ថកម្ម។ ទោះបីត្រូវបានបង្កើតឡើង ក្នុងរយៈពេលដ៏ខ្លីត្រឹមតែ២៣ឆ្នាំ ក្នុងសតវត្សទី១០ក៏ដោយ ក៏រចនាបថកោះកេរ បានជះឥទ្ធិពល យូរអង្វែងទៅលើការបញ្ចេញទឹកដៃសិល្បៈ នៅក្នុងសម័យកាលក្រោយៗមកទៀតនៃអាណាចក្រខ្មែរ និងនៅតាមបណ្តាប្រទេសអាស៊ីអាគ្នេយ៍ផ្សេងទៀត។
លក្ខណៈវិនិច្ឆ័យទី៤ (Criteria iv)៖ រមណីយដ្ឋានបុរាណវិទ្យាកោះកេរ គឺជាគំរូដើមស្ដីពីដែនទេសភាពទីក្រុងថ្មី ដែលមានសំណង់អគារធំៗ ដោយសារការប្រើប្រាស់ផ្ទាំងថ្មដុំធំៗដ៏ច្រើន សន្ធឹកសន្ធាប់នៅក្នុងការសាងសង់ និងការធ្លាក់ក្បាច់និងបដិមា។ គំរូដើមនេះបានសម្ពោធឡើង នូវសម័យកាលនៃការសាងសង់ប្រាសាទថ្ម អស់ជាច្រើនសតវត្សនៅទូទាំងអាណាចក្រខ្មែរ ហើយ បានក្លាយជាប្រភពនៃការបំផុសគំនិតសម្រាប់ការសាងសង់ប្រាសាទដ៏អស្ចារ្យនានានៅអង្គរ និងនៅក្នុងអាស៊ីអាគ្នេយ៍ ក្នុងសតវត្សក្រោយៗមកទៀត។
ក្រសួងវប្បធម៌អះអាងថា ការទទួលស្គាល់ជាផ្លូវការ “រមណីយដ្ឋានប្រាសាទកោះកេរ” ជាបេតិកភណ្ឌពិភពលោកនាពេលនេះ គឺជាមោទនភាពជាតិដ៏ធំធេងថ្មីមួយទៀត បន្ទាប់ពីតំបន់រមណីយដ្ឋានអង្គរប្រាសាទ ព្រះវិហារ និងតំបន់ប្រាសាទសំបូរព្រៃគុក ត្រូវបានចុះក្នុងបញ្ជីបេតិកភណ្ឌពិភពលោកជាបន្តបន្ទាប់ នៅឆ្នាំ១៩៩២ ឆ្នាំ២០០៨ និងឆ្នាំ២០១៧។
បើតាមក្រសួងវប្បធម៌ សមិទ្ធផលទាំងនេះ គឺពិតជាកើតចេញពីការចូលរួម និងទឹកចិត្តស្រឡាញ់មោះមុតរបស់ប្រជាជនកម្ពុជាគ្រប់ៗរូប ជាពិសេសកិច្ចខិតខំប្រឹងប្រែងជាប់មិនដាច់ របស់សម្តេចអគ្គមហាសេនាបតីតេជោ ហ៊ុន សែន និងការដឹកនាំដ៏ប៉ិនប្រសប់របស់សម្តេច មហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលជានិច្ចជាកាលតែងតែផ្តល់អាទិភាពខ្ពស់ដល់កិច្ចការអភិរក្ស និងអភិវឌ្ឍបេតិកភណ្ឌ ដែលជាដួងព្រលឹង និង អត្តសញ្ញាណជាតិ។
ជាមួយគ្នានោះ ក្រសួងវប្បធម៌ បានអំពាវនាវឲ្យសាធារណៈជន និងជនរួមជាតិទាំងអស់ចូលរួមអបអរសាទរ លើកតម្លៃមរតកវប្បធម៌ និងការពាររមណីយដ្ឋានប្រាសាទកោះកេរ ឱ្យបានគង់វង្សសម្រាប់កូនចៅជំនាន់ក្រោយៗទៀត។ ពីព្រោះកិច្ចថែរក្សា និងការពារបេតិកភណ្ឌជាតិ គឺជាកាតព្វកិច្ចរបស់កូនខ្មែរគ្រប់ៗរូប៕