ដើម្បីអបអរសាទរទិវាជាប្រវត្តិសាស្ត្រ ដែលគណៈកម្មាធិការបេតិកភណ្ឌពិភពលោកនៃអង្គការយូណេស្កូ (UNESCO) បានសម្រេចដាក់ “រមណីយដ្ឋានប្រាសាទកោះកេរ" ទៅក្នុងបញ្ជីបេតិកភណ្ឌពិភពលោក នៅវេលាម៉ោង៧ព្រឹក ថ្ងៃទី២០ ខែកញ្ញា ឆ្នាំ២០២៣ខាងមុខ នឹងមានពិធីវាយគង គោះជួង រគាំង ទះប៉ោត គោះត្រដោក និងទូងស្គរ ដើម្បីអបអរសាទរទិវាជាប្រវត្តិសាស្រ្តនេះ ក្នុងក្របខណ្ឌទូទាំងប្រទេសកម្ពុជាតែម្តង។
ក្រៅពីក្រសួង ស្ថាប័ន អាជ្ញាធរជាតិ និងរដ្ឋបាលខេត្តផ្សេងៗ នៅរាជធានីភ្នំពេញ ក៏បានធ្វើសេចក្ដីណែនាំផងដែរ តាមលិខិតមួយច្បាប់ចុះថ្ងៃទី១៨ ខែកញ្ញា នេះ។ បើតាមរដ្ឋបាលរាជធានីភ្នំពេញ បាពិធីវាយគង ទូងស្គរ ទះប៉ោត និងគោះត្រដោក នឹងធ្វើឡើងនៅវេលាម៉ោង៧ព្រឹកថ្ងៃទី២០ ខែកញ្ញា ឆ្នាំ២០២៣ ដើម្បីអបអរការដាក់បញ្ចូល “រមណីយដ្ឋានប្រាសាទកោះកេរ” ទៅក្នុងបញ្ជីបេតិកភណ្ឌពិភពលោក។
សេចក្តីណែនាំនេះ ធ្វើឡើងស្របតាមអនុសាសន៍ សម្ដេចមហាបវរធិបតី ហ៊ុន ម៉ាណែត នាយករដ្ឋមន្តី នៃព្រះរាជាណាចក្រកម្ពុជា តាមរយៈសារជាសម្លេងកាលពីល្ងាចថ្ងៃទី១៧ ខែកញ្ញា ដោយណែនាំឲ្យអបអរសាទរព្រឹត្តិការណ៍ជាប្រវត្តិសាស្ត្រដ៏សំខាន់ឲ្យបានគ្រឹកគ្រេង។
គួររំលឹកថា កាលពីថ្ងៃទី១៧ ខែកញ្ញា ឆ្នាំ២០២៣ គណៈកម្មាធិការបេតិកភណ្ឌពិភពលោកនៃអង្គការយូណេស្កូ បានសម្រេចជាឯកច្ឆ័ន្ទចុះ “រមណីយដ្ឋានប្រាសាទកោះកេរ” ទៅក្នុងបញ្ជីបេតិកភណ្ឌពិភពលោក នៅក្នុងសម័យប្រជុំលើកទី៤៥ នាឯទីក្រុងរីយ៉ាដ (Riyadh) ប្រទេស អារ៉ាប៊ីសាអ៊ូឌីត តាមសំណើរបស់រាជរដ្ឋាភិបាលកម្ពុជា។ ព្រឹត្តិការណ៍ថ្មីនេះ គឺជាមោទកភាពថ្មីមួយទៀត សម្រាប់ប្រជាពលរដ្ឋ និងព្រះរាជាណាចក្រកម្ពុជា ដែលកេរមរតកវប្បធម៌ជាច្រើន របស់កម្ពុជា ត្រូវបានចុះបញ្ជីជាបេតិកភណ្ឌពិភពលោក។
ប្រាសាទកោះកេរ ស្ថិតនៅក្នុងភូមិកោះកេរ្តិ៍ ឃុំស្រយ៉ង់ ស្រុកគូលែន ខេត្តព្រះវិហារ។ ប្រាសាទនេះមានចម្ងាយប្រមាណ១២០គីឡូម៉ែត្រពីទីរួមខេត្តសៀមរាប និងមានចម្ងាយប្រមាណ៦០ គីឡូម៉ែត្រពីទីរួមខេត្តព្រះវិហារ និងមានចម្ងាយ៤៦០គីឡូម៉ែត្រពីរាជធានីភ្នំពេញ។
តាមឯកសារមួយចំនួន ផ្សព្វផ្សាយដោយរដ្ឋបាលខេត្តព្រះវិហារបានឲ្យដឹងថា ប្រាសាទនេះ ពីដើមឈ្មោះឆកគគីរ ឬផៃ្ទដីគោកគគីរ សព្វថៃ្ងហៅថា អតីត រាជធានីកោះកេរិ៍្ដ មានទំហំផ្ទៃដី១៦X១៦គីឡូម៉ែត្រ ។ ប្រាសាទនេះមាន៧ជាន់ មានកំពស់ ៣៥ម៉ែត្រ នៅតំបន់កោះកេរ្តិ៍ ក្នុងផ្ទៃដីចំនួន៩គីឡូម៉ែត្រ ៤ជ្រុងសព្វថ្ងៃនូវប្រាសាទប្រមាណ១០០ប្រាសាទ ដែលកសាងឡើងតាំងពីសម័យបុរាណ ទុកសំរាប់ជាការគោរពបូជាតាមលទ្ធិព្រហ្មញ្ញសាសនា៕