1. អាមេរិកដាក់ទណ្ឌកម្មលើអេហ្ស៊ីប
យោងតាមសារព័ត៌មាន CNN ចុះផ្សាយថ្ងៃទី១៤ ខែកញ្ញាបានអោយដឹងថា រដ្ឋបាលលោក Biden បានជូនដំណឹងដល់សភាថា ពួកគេនឹងដកហូតជំនួយចំនួន៨៥លានដុល្លាដល់ប្រទេសអេហ្ស៊ីបដោយសារតែការបរាជ័យរបស់ទីក្រុងCairoក្នុងការបំពេញលក្ខខណ្ឌរបស់សហរដ្ឋអាមេរិកស្តីពីការដោះលែងអ្នកទោសនយោបាយ និងបញ្ហាផ្សេងៗទៀតជំនួសមកវិញដោយការបង្វែរប្រាក់ទាំងនោះទៅអោយប្រទេសតៃវ៉ាន់ និងលីបង់វិញ។ ប្រភពបាននិយាយទៀតថា រដ្ឋបាលនឹងបង្វែរទិសដៅទឹកប្រាក់ចំនួន 55 លានដុល្លានៃថវិកានោះទៅកាន់ប្រទេសតៃវ៉ាន់ និងខណៈ30លានដុល្លាទៀតទៅកាន់ប្រទេសលីបង់។ ទោះបីជាយ៉ាងណាក៏ដោយ រដ្ឋបាលនឹងអនុញ្ញាតឱ្យទីក្រុង Cairo ទទួលបានប្រាក់ចំនួន 235 លានដុល្លា នៃចំនួនសរុប 320លានដុល្លានៅក្នុងការផ្តល់ហិរញ្ញប្បទានយោធាបរទេស ដែលត្រូវបានកំណត់លើបញ្ហាសិទ្ធិមនុស្ស នេះបើតាមមន្ត្រីជាន់ខ្ពស់ក្រសួងការបរទេសម្នាក់បាននិយាយកាលពីថ្ងៃព្រហស្បតិ៍។ សហរដ្ឋអាមេរិកផ្តល់ហិរញ្ញប្បទានយោធាបរទេសជាង 1 ពាន់លានដុល្លារដល់អេហ្ស៊ីប ដែលភាគច្រើននៅក្នុងនោះមិនមានលក្ខខណ្ឌនោះទេ។
2. កិច្ចព្រមព្រៀងសព្វាវុធអារ៉ាប៊ីសាអូឌីតនិងអាមេរិកត្រូវលុបចោលដោយទំនាក់ទំនងជាមួយក្រុមហ៊ុនរុស្ស៊ី និងចិនដែលរងទណ្ឌកម្ម
យោងតាមសារព័ត៌មាន The Wall Street Journal ចុះផ្សាយថ្ងៃទី១៤ ខែកញ្ញាបានអោយដឹងថា ក្រុមហ៊ុនផលិតអាវុធអាមេរិក RTX បានលុបចោលកិច្ចព្រមព្រៀងតម្លៃរាប់ពាន់លានដុល្លាជាមួយក្រុមហ៊ុនអាវុធអារ៉ាប៊ីសាអូឌីតជុំវិញការព្រួយបារម្ភថាក្រុមហ៊ុនពេលក្រោយនឹងបន្តអាជីវកម្មជាមួយអង្គភាពរុស្ស៊ី និងចិនដែលរងទណ្ឌកម្ម។ បញ្ហាជុំវិញការចូលរួមជាមួយអង្គភាពមកពីទីក្រុងមូស្គូនិងប៉េកាំងក៏បាននាំឱ្យក្រុមប្រឹក្សារបស់ក្រុមហ៊ុនអារ៉ាប៊ីសាអូឌីត Scopa Defence ដែលបង្កើតឡើងដោយមន្ត្រីយោធាអាមេរិកចូលនិវត្តន៍មួយចំនួនបានលាឈប់ពីក្រុមហ៊ុន។ គួររំលឹកផងដែរ នៅឆ្នាំ 2022 ក្រុមហ៊ុន RTX ដែលពីមុនត្រូវបានស្គាល់ថា Raytheon Technologies រួមជាមួយនឹងក្រុមហ៊ុន Scopa របស់អារ៉ាប៊ីសាអូឌីតបានចុះហត្ថលេខាលើគម្រោងបង្កើតរោងចក្រនៅក្នុងព្រះរាជាណាចក្រនេះដើម្បីផលិតប្រព័ន្ធការពារអាកាសដើម្បីការពារទីក្រុង Riyadh ពីការវាយប្រហារតាមអាកាស។ លោក Nasr Alghrairi អតីតនាយកប្រតិបត្តិក្រុមហ៊ុន Scopa ដែលត្រូវបានបណ្តេញចេញពីតំណែងកាលពីដើមឆ្នាំនេះបាននិយាយថាកិច្ចព្រមព្រៀងដែលបានស្នើឡើងត្រូវបានរំពឹងថានឹងមានការវិនិយោគចំនួន 25 ពាន់លានដុល្លានៅក្នុងប្រទេសអារ៉ាប៊ីសាអូឌីត ហើយនឹងអាចនាំមកនូវមានតំលៃនៃការលក់ប្រមាណជា 17 ពាន់លានដុល្លា។
3. អាមេរិកដាក់ទណ្ឌកម្មលើក្រុមហ៊ុនទួរគីចំនួន 5
យោងតាមសារព័ត៌មាន Reuters ចុះផ្សាយថ្ងៃទី១៥ ខែកញ្ញាបានអោយដឹងថា រដ្ឋបាលលោក Biden កាលពីថ្ងៃព្រហស្បតិ៍បានដាក់ទណ្ឌកម្មលើក្រុមហ៊ុនទួរគីចំនួនប្រាំ និងជនជាតិទួរគីដោយចោទប្រកាន់ថាពួកគេបានជួយរុស្ស៊ីឱ្យគេចពីការដាក់ទណ្ឌកម្ម និងគាំទ្រទីក្រុងម៉ូស្គូក្នុងសង្គ្រាមប្រឆាំងនឹងអ៊ុយក្រែន។ ការកំណត់នេះត្រូវបានដាក់គោលដៅក្រុមហ៊ុនដឹកជញ្ជូន និងពាណិជ្ជកម្មដែលត្រូវបានចោទប្រកាន់ថាបានជួយជួសជុលកប៉ាល់រងទណ្ឌកម្មរបស់រុស្ស៊ីដែលមានទំនាក់ទំនងនឹងនឹងក្រសួងការពារជាតិរបស់រុស្ស៊ី និងជួយផ្ទេរ“ទំនិញដែលអាចប្រើបានទាំងយោធា និងជនស៊ីវិល”។ វាគឺជាផ្នែកមួយនៃកញ្ចប់វិធានការវាយលុករុស្ស៊ីដោយទណ្ឌកម្មដ៏ធំមួយ ដែលកំនត់គោលដៅលើជាង 150 រួមមានទាំងក្រុមហ៊ុនផលិតរថយន្តធំជាងគេរបស់ប្រទេសផងដែរ។ សកម្មភាពនេះត្រូវបានធ្វើឡើងក្នុងគ្រាសម្ព័ន្ធភាពដ៏ល្អមួយសម្រាប់ទំនាក់ទំនងរវាងសហរដ្ឋអាមេរិក និងទួរគីដោយទីក្រុងវ៉ាស៊ីនតោនសង្ឃឹមថាទីក្រុងអង់ការ៉ានឹងផ្តល់សច្ចាប័នលើសមាជិកភាពណាតូសម្រាប់ស៊ុយអែតនៅពេលដែលសភាទួរគីកោះប្រជុំឡើងវិញនៅដើមខែតុលានេះ។
