នាយឧត្តមសេនីយ៍ ស ថេត អគ្គស្នងការនគរបាលជាតិ កាលពីព្រឹកថ្ងៃព្រហស្បតិ៍ ទី១៤ ខែកញ្ញា ឆ្នាំ២០២៣ នេះ បានដឹកនាំកិច្ចប្រជុំ ស្តីពីការអនុវត្តវិធានការរឹតបន្តឹងការអនុវត្តច្បាប់ចរាចរណ៍ផ្លូវគោក ក្នុងក្របខណ្ឌទូទាំងប្រទេស ដោយមានការចូលរួមពី អគ្គស្នងការរង ប្រធាន-អនុប្រធាននាយកដ្ឋានកណ្តាលសណ្តាប់ធ្នាប់សាធារណៈ ប្រធាន-អនុប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ ស្នងការ-ស្នងការរងនគរបាលរាជធានី ខេត្តទាំង២៥ និងមន្រ្តីពាក់ព័ន្ធជាច្រើនរូបទៀត។
មានប្រសាសន៍នៅក្នុងពិធីនោះ នាយឧត្តមសេនីយ៍ ស ថេត បានលើកឡើងថា យោងតាមរបាយការណ៍ពីមន្ត្រីជំនាញ ក្នុងរយៈពេល០៦ខែឆ្នាំ២០២៣ បើប្រៀបធៀបនិងរយៈពេល០៦ខែ ឆ្នាំ២០២២ មានការថយចុះគួរឱ្យកត់សំគាល់ ប៉ុន្តែកិច្ចការងារពង្រឹងច្បាប់ចរាចរណ៍នេះនៅតែបន្ត ដើម្បីកុំឱ្យបងប្អូនប្រជាពលរដ្ឋ នៅតាមបណ្តារាជធានី-ខេត្ត មានការស្រពិចស្រពិល យល់ច្រឡំ ហើយអនុវត្តខុស។ ព្រោះថា ការរៀបចំច្បាប់ចរាចរណ៍ គឺក្នុងន័យដើម្បីលុបបំបាត់នូវគ្រោះថ្នាក់ចរាចរណ៍ បង្កើននូវសណ្តាប់ធ្នាប់គ្រប់ពេលធ្វើដំណើរក្នុងក្របខណ្ឌទូទាំងប្រទេស។
នាយឧត្តមសេនីយ៍ ស ថេត បញ្ជាក់ថា “បន្ទាប់ពីចប់កិច្ចប្រជុំនេះទៅ យើងទុករយៈពេល៧ថ្ងៃ ដើម្បីធ្វើការផ្សព្វផ្សាយសិន មុនពេលយើងចុះអនុវត្តច្បាប់ ជៀសវាងមានការរិះគន់ពីប្រជាពលរដ្ឋ។ ដោយមើលឃើញថា គ្រោះថ្នាក់ចរាចរណ៍នៅតែជាបញ្ហាប្រឈម ទើបយើងប្រញាប់ប្រញាល់ ដើម្បីពិនិត្យដាក់ចេញនូវគោលការណ៍ក្នុងការអនុវត្តបន្ត ដើម្បីឲ្យស្របទៅនឹងយុទ្ធសាស្ត្របញ្ចកោណដំណាក់កាលទី១ នៃរាជរដ្ឋាភិបាលអាណត្តិទី៧”។
បើតាមនាយឧត្តមសេនីយ៍ ស ថេត ដើម្បីអនុវត្តច្បាប់ចរាចរណ៍ផ្លូវគោក ក្នុងក្របខណ្ឌទូទាំងប្រទេសឱ្យកាន់តែល្អ និងមានប្រសិទ្ធភាពនោះ មន្រ្តីជំនាញត្រូវធ្វើការអប់រំផ្សព្វផ្សាយដល់ប្រជាពលរដ្ឋក្នុងមូលដ្ឋាន ឱ្យបានទូលំទូលាយ ដោយគូសបញ្ជាក់អំពីគោលបំណងនៃការអនុវត្តច្បាប់។ ទន្ទឹមនោះ ក៏ត្រូវផ្សព្វផ្សាយដល់មន្រ្តីអនុវត្តច្បាប់របស់យើង នៅមិនទាន់យល់ទាំងអស់នោះទេ ដូចជាមន្រ្តីជាប់កិច្ចសន្យានៅរាជធានីភ្នំពេញ ដើម្បីឲ្យពួកគាត់យល់ដឹងពីការអនុវត្តច្បាប់ យើងត្រូវធ្វើការបណ្តុះបណ្តាល។
ជាមួយគ្នានោះ នាយឧត្តមសេនីយ៍ ស ថេត ក៏បានណែនាំដល់គ្រប់មន្ត្រីនគរបាលចរាចរណ៍ទាំងអស់ ក៏ត្រូវគោរពវិន័យ បទបញ្ជា ពិសេសបំពេញការងារប្រកបដោយតម្លាភាព សុក្រិត្យភាព វិជ្ជាជីវៈ និងក្រមសីលធម៌។ ដោយឡែកស្នងការនគរបាលរាជធានី-ខេត្ត ដែលមានរោងចក្រច្រើន មានកម្មករ ច្រើន ត្រូវធ្វើយ៉ាងណាយកចិត្តទុកដាក់ខ្ពស់ ក្នុងការសម្រួលការធ្វើដំណើររបស់ពួកគាត់ ក្នុងករណីមានការធ្វេសប្រហែសមានគ្រោះថ្នាក់ អាចបង្កឱ្យមានអ្នកស្លាប់ និងរបួសច្រើន។ ជាក់ស្តែងដូចជា ខេត្តកំពង់ស្ពឺ ខេត្តស្វាយរៀង ខេត្តកណ្តាល និងខេត្តកំពង់ឆ្នាំងជាដើម។
ក្នុងនោះដែរ ត្រូវបន្តពង្រឹងការសម្រួលចរាចរណ៍ដល់សិស្សានុសិស្សចេញចូលសាលារៀន ឱ្យបានជាប់ជាប្រចាំចាប់ពីថ្នាក់ខេត្ត ស្រុក ខណ្ឌ ឃុំ សង្កាត់កុំឱ្យមានគ្រោះថ្នាក់៕