ចាប់ផ្តើមជាមួយរដ្ឋមន្ត្រីការបរទេសអាមេរិក លោក Anthony Blinken ដែលបានធ្វើទស្សនកិច្ចដ៏សំខាន់ និងមិនបានប្រកាសទៅកាន់រដ្ឋធានី Kiev របស់អ៊ុយក្រែន ក្នុងអំឡុងពេលនោះ លោកបានជួបសមភាគីអ៊ុយក្រែន លោក Dmytro Kuleba បន្ថែមដោយប្រធានាធិបតីអ៊ុយក្រែន លោក Volodymyr Zelensky។ ក្នុងអំឡុងពេលនៃដំណើរទស្សនកិច្ចនេះ លោក Blinken បានប្រកាសពីការផ្តល់ជំនួយផ្នែកយោធា និងមនុស្សធម៌ដល់អ៊ុយក្រែនដែលមានតម្លៃមួយពាន់លានដុល្លារួមទាំងផ្នែកយោធារបស់ពួកគេលើសំណល់មីស៊ីលអ៊ុយរ៉ាញ៉ូមដើម្បីប្រឈមនឹងខែលការពាររថក្រោះ និងយានជំនិះរបស់រុស្ស៊ីនៅលើសមរភូមិ។ 

1. អាមេរិក​សន្យា​បន្ត​គាំទ្រ​អ៊ុយក្រែន

យោងតាមសារព័ត៌មាន The Wall Street Journal ចុះផ្សាយថ្ងៃទី០៧ ខែកញ្ញាបានអោយដឹងថា រដ្ឋមន្ត្រីការបរទេសលោក Antony Blinken បានសន្យាផ្តល់ជំនួយបន្ថែមចំនួន 1 ពាន់លានដុល្លាដល់អ៊ុយក្រែនកាលពីថ្ងៃពុធក្នុងអំឡុងដំណើរទស្សនកិច្ចទៅកាន់ទីក្រុង Kyiv ក្នុងគោលបំណងជំរុញការគាំទ្រសម្រាប់ប្រទេសនេះ។

អ្នកការទូតកំពូលរបស់សហរដ្ឋអាមេរិកបាននិយាយថា លោកបានទទួលការ Update ពីសមរភូមិពីប្រធានាធិបតីអ៊ុយក្រែនលោក Volodymyr Zelensky ដែលទើបតែត្រលប់មកពីទីតាំងជួរមុខវិញ ហើយបានចេញមកដោយមាន"ទំនុកចិត្តយ៉ាងខ្លាំងថាអ៊ុយក្រែននឹងឈ្នះ" នៅពេលដែលពួកគេដណ្តើមបានទឹកដីដែលកាន់កាប់មកវិញ។

ប៉ុន្តែនៅពេលដែលត្រូវបានសួរដោយអ្នកសារព័ត៌មានថា តើអ្វីដែលរុញច្រានភាពសុទិដ្ឋិនិយមរបស់លោក លោកBlinkenក៏បានទាញឡើងនូវស្ថិតិមកវិញតាំងពីខែកក្កដា ដែលបង្ហាញថាអ៊ុយក្រែនបានដណ្តើមយកមកវិញប្រហែលបានពាក់កណ្តាលនៃទឹកដីដែលរុស្ស៊ីបានដណ្តើមបានចាប់តាំងពីការឈ្លានពានរបស់ខ្លួន។

ដំណើរ​ទស្សនកិច្ច​រយៈពេល​ពីរ​ថ្ងៃ​នេះ​គឺជា​ដំណើរ​ទស្សនកិច្ច​លើក​ទី​បួន​របស់លោក Blinken ទៅកាន់​ប្រទេស​អ៊ុយ​ក្រែ​នចាប់តាំងពី​ការឈ្លានពាន​របស់​រុស្ស៊ី​បានចាប់ផ្តើម​ក្នុង​ខែកុម្ភៈ ឆ្នាំ2022 និង​ជា​លើក​ទី​ប្រាំមួយ​របស់លោក​ចាប់តាំងពី​ចូលកាន់​តំណែង​។ កញ្ច​ប់ថវិកាចំនួន 1 ពាន់លានដុល្លាអាមេរិក រួមមានគ្រឿងបន្លាស់ការពារដែនអាកាស គ្រាប់កាំភ្លើងធំ 155មីល្លីម៉ែត្រ កាំជ្រួចប្រឆាំងរថក្រោះ ប្រព័ន្ធរុករកផ្លូវអាកាស និងគ្រាប់សំណល់អ៊ុយរ៉ានីញ៉ូមក្នុងចំណោមឧបករណ៍ផ្សេងៗទៀត។

2. ប៉ូឡូញអាចនឹងចាប់ផ្តើមធ្វើបត្យាប័នដល់បុរសអ៊ុយក្រែនគេចខ្លួន

យោងតាមសារព័ត៌មាន Kyiv Post ចុះផ្សាយថ្ងៃទី០៤ ខែកញ្ញាបានអោយដឹងថា​​​ បន្ទាប់ពីមានករណីជាច្រើននៃគណៈកម្មការវេជ្ជសាស្ត្រយោធាអ៊ុយក្រែន និងការិយាល័យដែលមានការអនុញ្ញាតផ្សេងទៀតទទួលយកសំណូកដើម្បីក្លែងបន្លំចេញលិខិតលើកលែងវេជ្ជសាស្រ្តសម្រាប់អ្នកដែលអាចចេញធ្វើទាហានបាន។ លោកប្រធានាធិបតី Zelensky បានបញ្ជាឱ្យពិនិត្យលើការចេញការអនុញ្ញាតទាំងអស់ដែលធ្លាប់បានផ្តល់ចាប់តាំងពីការចាប់ផ្តើមនៃការលុកលុយយ៉ាងពេញទំហឹងរបស់រុស្ស៊ី។

កាលពីថ្ងៃទី 1 ខែកញ្ញា លោក David Arachamia មេដឹកនាំគណបក្សបំរើប្រជាជនអ៊ុយក្រែន បាននិយាយថា ទីភ្នាក់ងារអនុវត្តច្បាប់របស់អ៊ុយក្រែនគួរតែទាមទារការធ្វើបត្យាប័នដល់បុរសដែលមានអាយុគ្រប់ធ្វើយោធា ដែលបានចាកចេញពីអ៊ុយក្រែនដោយខុសច្បាប់ ដើម្បីគេចចេញពីការកេណ្ឌ និងកាត់ទោសពួកគេ។

សារព័ត៌មានប៉ូឡូញ Rzeczpospolitej បានរាយការណ៍អំពីទិន្នន័យដែលផ្តល់ដោយឆ្មាំព្រំដែនប៉ូឡូញថា មនុស្សពេញវ័យអ៊ុយក្រែន 2.87 លាននាក់បានឆ្លងចូលទៅក្នុងប្រទេសប៉ូឡូញចន្លោះថ្ងៃទី24ខែកុម្ភៈឆ្នាំ2022ដល់ថ្ងៃទី31ខែសីហាឆ្នាំនេះ។ វាត្រូវបានប៉ាន់ប្រមាណថាបុរសប្រហែល80,000នាក់ដែលមានអាយុពី18-60ឆ្នាំដែលមានសក្ដានុពលសម្រាប់ការបម្រើយោធាបានឆ្លងចូលប្រទេសនេះ។ 

3. ទាហាន និង​អ្នក​ស្ម័គ្រ​ចិត្ត​ជាច្រើន​នាក់​ស្លាប់​ក្នុង​ការ​វាយ​ប្រហារ​នៃ Burkina Faso

យោងតាមសារព័ត៌មាន Azerbaycan24 ចុះផ្សាយថ្ងៃទី០៦ ខែកញ្ញាបានអោយដឹងថា រដ្ឋអំណាចក្នុងប្រទេស Burkina Faso បាននិយាយថា សមាជិក 53 នាក់នៃកងកម្លាំងសន្តិសុខរបស់ខ្លួន និងអ្នកវាយប្រហាររាប់សិបនាក់ត្រូវបានសម្លាប់នៅក្នុងការប្រយុទ្ធគ្នា "ដ៏ខ្លាំងក្លា" ជាមួយនឹងក្រុមសកម្មជនជីហាដដែលសង្ស័យនៅភាគខាងជើងនៃប្រទេសអាហ្វ្រិកខាងលិច។

កងកម្លាំងប្រដាប់អាវុធ Burkina Faso បាននិយាយនៅក្នុងសេចក្តីថ្លែងការណ៍មួយកាលពីថ្ងៃអង្គារថា អ្នកស្លាប់រួមមានទាហាន 17 នាក់ និងយុទ្ធជនស្ម័គ្រចិត្ត 36 នាក់ ដោយបន្ថែមថាប្រហែល 30 នាក់ផ្សេងទៀតបានរងរបួស។ ទីក្រុង Ouagadougou ក៏បានរាយការណ៍ថាបានបង្រ្កាបអ្នកវាយប្រហារទាំងរាប់សិបនាក់នោះរួចហើយ។

ការប៉ះទង្គិចគ្នានេះបានកើតឡើងកាលពីថ្ងៃចន្ទនៅក្នុងខេត្ត Yatenga ក្នុងអំឡុងពេលប្រតិបត្តិការកងកម្លាំងជាតិដើម្បីដណ្តើមយកទីក្រុង Koumbri មកវិញ "ដើម្បីអនុញ្ញាតឱ្យមានការតាំងទីលំនៅថ្មី" នៃអ្នកស្រុកដែលត្រូវបានផ្លាស់ទីលំនៅ "អស់រយៈពេលជាងពីរឆ្នាំ" មកហើយ នេះបើយោងតាមបុគ្គលិកទូទៅរបស់កងទ័ព។