ថ្នាក់ដឹកនាំ​កំពូលរបស់ប្រទេសកម្ពុជា​ វៀតណាម និងឡាវ​ នៅតែបន្តរក្សា​ប្រពៃណី​នៃ​ការ​ជួប​ទទួលទានអាហារពេលព្រឹក និង​ពិភាក្សាការងារត្រីភាគី នៅ​មុន​ពេលបើកកិច្ច​ប្រជុំ​កំពូល​ធំៗ នៅ​ក្នុងតំបន់ដដែល នេះបើតាមលទ្ធផល នៃ​កិច្ចពិភាក្សា​​ រវាង​ថ្នាក់ដឹកនាំ​កំពូលរបស់ប្រទេស​​ទាំង៣​នៅនៅទីក្រុង​ហ្សាការតា ប្រទេសឥណ្ឌូណេស៊ី​ នាព្រឹក​នេះ​។

​នៅព្រឹកថ្ងៃ​ទី៥ ខែកញ្ញា ឆ្នាំ២០២៣ នេះ នៅរដ្ឋធានីហ្សាការតា នៃសាធារណរដ្ឋឥណ្ឌូណេស៊ី សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានជួប​ទទួល​​​​ទានអាហារពេលព្រឹក និងពិភាក្សាការងារត្រីភាគីជាមួយ​ឯកឧត្តម ផាម មីញជីញ (Pham​ Minh Chính) នាយករដ្ឋមន្ត្រី នៃសាធារណរដ្ឋសង្គមនិយមវៀតណាម និង​​ឯកឧត្តម សន​​សៃ ស៊ីផាន់ដន (Sonexay Siphandone) នាយក​រដ្ឋមន្ត្រី នៃសាធារណរដ្ឋប្រជាធិបតេយ្យ​ប្រជាមានិតឡាវ។

នៅក្នុងជំនួបនេះ​ ថ្នាក់ដឹកនាំនៃប្រទេសទាំង៣បានពិភាក្សា និង​​បាន​ឯក​ភាព​ជាគោការណ៍ ៥ចំណុច៖

ទី១. បន្តរក្សាប្រពៃណីនៃការជួបទទួលទានអាហារពេលព្រឹក និង​ពិភាក្សាការងារត្រីភាគី នៅ​មុន​ពេលបើកកិច្ចប្រជុំកំពូលធំៗក្នុងតំបន់ ដែលតែងផ្ដល់ផលប្រយោជន៍ជាច្រើនដល់ប្រ​ទេស​ទាំងបី ។

ទី២. បន្តដោះស្រាយជាមួយគ្នា និង​ជំរុញសម្រេចឱ្យបាននូវលទ្ធផល ចំពោះបញ្ហាដែល​នៅ​សេសសល់ទាំងឡាយ ។

ទី៣. បន្តអនុវត្តន៍យន្តការនៃការកំណត់ព្រំដែនរវាងប្រទេសទាំងបី ដើម្បីបញ្ចប់ទាំងស្រុង នាពេល​ឆាប់ៗខាងមុខ​។

ទី៤. បន្តកិច្ចសហប្រតិបត្តិការរវាងប្រទេសទាំងបី ទាំងក្នុងទិដ្ឋភាពសង្គម-សេដ្ឋកិច្ច, សន្តិសុខ, ការផ្សារភ្ជាប់រវាងប្រជាជន និង ប្រជាជន, វប្បធម៌ និង ប្រពៃណី ។

ទី៥. ជំរុញបន្ថែមនូវទំនាក់ទំនង និង ការផ្សារភ្ជាប់រវាងប្រទេសទាំងបី លើគ្រប់​មធ្យោបាយ​រួម​ទាំងហេដ្ឋារចនាសម្ព័ន្ធ ដូចជា ស្ពាន ផ្លូវ ផ្លូវដែក និងកំពង់ផែ, ខ្សែច្រវាក់ផ្គត់ផ្គង់, និង​ទេសចរណ៍ ។

នៅក្នុងជំនួបនេះផងដែរ ឯកឧត្តមនាយករដ្ឋមន្ត្រីវៀតណាម បានផ្ដាំផ្ញើការសួរសុខទុក្ខ និង ក្តីនឹករលឹកជូនចំពោះ សម្ដេចតេជោ ប្រធានឧត្តមក្រុមប្រឹក្សាផ្ទាល់ព្រះមហាក្សត្រ និង បាន​បង្ហាញ​បំណងចង់ជួបសំណេះសំណាលដោយផ្ទាល់ជាមួយ សម្តេចតេជោ នៅក្នុងពេល​ណា​មួយ​ខាងមុខ។ ឯកឧត្តមនាយករដ្ឋមន្ត្រីឡាវ ក៏បានអញ្ជើញ​សម្តេចមហាបវរធិបតី ទៅបំពេញ​ទស្សនកិច្ចផ្លូវការទៅកាន់ប្រទេសឡាវនាឆ្នាំ២០២៤ ខាងមុខ។

សូមបញ្ជាក់ថា ​ការជួបទទួលទានអាហារពេលព្រឹកនេះ គឺជា​ប្រពៃណី ដែលថ្នាក់ដឹកនាំ​នៃប្រ​ទេស​​ទាំង៣ តែង​បានអនុវត្តកន្លងមក នៅមុនពេលបើកកិច្ចប្រជុំកំពូលធំៗ​នៅក្នុងតំបន់ ៕​