គម្រោងបង្កើតរោងចក្រផលិតស៊ីម៉ង់តិ៍ ដែលមានទុនវិនិយោគជិត២៦០លានដុល្លារអាម៉េរិក គ្រោងបង្ហាញវត្តមាននៅក្នុងខេត្តកំពង់ស្ពឺ បន្ទាប់ពីគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោង។
យោងតាមរបាយការណ៍របស់គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានឱ្យដឹងនៅព្រឹកថ្ងៃទី២៥ ខែសីហា ឆ្នាំ២០២៣នេះថា ក្រុមហ៊ុន“CONCH KT CEMENT (PHNOM PENH) COMPANY LIMITED” ត្រូវបានក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងរួចរាល់។
គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានឱ្យដឹងបន្តថា គម្រោងបង្កើតរោងចក្រផលិតស៊ីម៉ង់តិ៍នេះ មានទីតាំងវិនិយោគស្ថិតនៅភូមិមនោរម្យ ឃុំហោមសំណង់ ស្រុកឱរ៉ាល់ ខេត្តកំពង់ស្ពឺ ក្នុងទុនវិនិយោគប្រមាណ២៥៨លានដុល្លារអាម៉េរិក និងអាចបង្កើតការងារបានចំនួន ៤៦៨កន្លែង។
សព្វថ្ងៃនេះនៅទូទាំងប្រទេសកម្ពុជា អាចផលិតស៊ីម៉ង់ត៍ បានប្រមាណ ៩លានតោន ប៉ុន្តែបរិមាណនេះមិនអាចផ្គត់ផ្គង់គ្រប់តាមតម្រូវការនៃការប្រើប្រាស់បានឡើយ ដោយសារតែការកសាងអគារ កសាងផ្លូវថ្នល់ ចាប់ផ្ដើមប្រើប្រាស់ស៊ីម៉ង់តិ៍។
បច្ចុប្បន្នកម្ពុជា មានរោងចក្រផលិតស៊ីម៉ង់ត៍ នៅទូទាំងប្រទេសកំពុងដំណើរការចំនួន ៥ ដែលមានសមត្ថភាពផលិតប្រមាណ៩លានតោនក្នុង១ឆ្នាំ ខណៈរោងចក្រទាំងនេះភាគច្រើនស្ថិតនៅក្នុងខេត្តកំពត៕