ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្រ្តីចាត់តាំងដោយព្រះមហាក្សត្រកម្ពុជា បានប្រកាសស្វាគមន៍ចំពោះគម្រោងប្រគួតរបស់កីឡាករ Dave Leduc កំពូលអ្នកប្រដាល់ ប្រទេសមីយ៉ាន់ម៉ា ដែលត្រៀមរៀបចំឡើងក្នុងរាជធានីភ្នំពេញ នាពេលខាងមុខ។
ការប្រកាសស្វាគមន៍នេះ គឺបន្ទាប់ពីកីឡាករ Dave Leduc បានស្នើឱ្យឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្រ្តីចាត់តាំងអញ្ជើញចូលរួមជាកិត្តិយសក្នុងការប្រគួតចុងក្រោយរបស់ខ្លួន ប្រភេទ (គុនខ្មែរ) លើទឹកដីកម្ពុជា នាអំឡុងចុងឆ្នាំនេះ។
ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្រ្តីចាត់តាំង បានសរសេរក្នុងផេកផ្លូវការ នាព្រឹកថ្ងៃទី១៥ ខែសីហា ឆ្នាំ២០២៣នេះដោយបានអរគុណកីឡាករ Dave Leduc ចំពោះទឹកចិត្តស្រឡាញ់ប្រទេសកម្ពុជា និងក្បាច់គុនបុរាណខ្មែរ (គុនខ្មែរ) ព្រមទាំងបានជូនពរកីឡាករ Dave Leduc ឱ្យទទួលបានជោគជ័យ។
ជាមួយគ្នានេះ ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត បានលើកឡើងថា រង់ចាំជួបគ្នានាចុងឆ្នាំនេះ ពេលដែលកីឡាករ Dave Leduc មកកាន់ប្រទេសកម្ពុជា។
សូមបញ្ជាក់ថា កីឡាករ Dave Leduc កំពូលអ្នកប្រដាល់ ប្រទេសមីយ៉ាន់ម៉ា បានអបអរសាទរឯកឧត្ដមបណ្ឌិត ហ៊ុន ម៉ាណែត សម្រាប់តំណែងជានាយករដ្ឋមន្ត្រីថ្មី នៃប្រទេសកម្ពុជា។
កីឡាករ Dave Leduc បានលើកឡើងពីគម្រោងប្រគួតចុងក្រោយរបស់ខ្លួនក្រោមទម្រង់ គុនខ្មែរ នៅចុងឆ្នាំនេះ ក្នុងប្រទេសកម្ពុជា ដែលនឹងក្លាយជាព្រឹត្តិការណ៍ប្រយុទ្ធដ៏ធំបំផុតក្នុងប្រវត្តិសាស្ត្រកម្ពុជា និងអាស៊ីអាគ្នេយ៍ ខណៈប្រទេសទាំងពីរនឹងលើកទឹកចិត្តដើម្បីអបអរសាទរមិត្តភាពដ៏អស្ចារ្យរវាងមីយ៉ាន់ម៉ា និងកម្ពុជា តាំងពីបុរាណកាលមក។
ជាមួយគ្នានេះ កីឡាករ Dave Leduc បានបង្ហាញបំណងចង់ឱ្យឯកឧត្ដមបណ្ឌិត ហ៊ុន ម៉ាណែត មានវត្តមានអញ្ជើញចូលរួមជាភ្ញៀវមហាកិត្តិយសនៅក្នុងការប្រគួតនាពេលខាងមុខផងដែរ៕