ដើម្បីការពារសិទ្ធិអ្នកប្រើប្រាស់ និងការពារផលប្រយោជន៍ធុរកិច្ចជនស្មោះត្រង់ សមត្ថកិច្ចជំនាញ ក.ប.ប បានឆែករកឃើញទំនិញខូចគុណភាព និងបំពានសិទ្ធិផ្ដាច់មុខ ជាង១០០គីឡូក្រាម (១១៩.៨៥គីឡូក្រាម)។
ការរកឃើញខាងលើនេះ គឺធ្វើឡើងតាមរយៈសកម្មភាព ចុះត្រួតពិនិត្យនៅតាមឃ្លាំងស្តុក ផ្ទះលក់ និងចែកចាយទំនិញ និងទីផ្សារសំខាន់ៗជាច្រើន រយៈពេល២ថ្ងៃ គឺនៅថ្ងៃទី០៣ និងទី០៤ ខែសីហា ឆ្នាំ២០២៣នេះ នៅរាជធានី ខេត្តចំនួន៣ គឺខេត្តព្រះសីហនុ ខេត្តកំពង់ស្ពឺ និងរាជធានីភ្នំពេញ។ គោលបំណងនៃការចុះត្រួតពិនិត្យនេះ គឺដើម្បីធានាការពារសិទ្ធិអ្នកប្រើប្រាស់ ការពារផលប្រយោជន៍ធុរកិច្ចជន ដែលស្មោះត្រង់ តាមរយៈការប្រកួតប្រជែងដោយស្មើភាព។
ដោយឡែក សម្រាប់ប្រេងឥន្ធនៈ រយៈពេល២ថ្ងៃដដែលនេះ សមត្ថកិច្ចជំនាញ សាខាខេត្តកំពត ខេត្តស្វាយរៀង និងកំពង់ធំ បានចុះត្រួតពិនិត្យតាមស្ថានីយ និងដេប៉ូប្រេងឥន្ធនៈ ជាប្រចាំ ដើម្បីការពារនូវសុច្ចរិតភាពជូនអ្នកប្រើប្រាស់ និងទប់ស្កាត់អំពើមិនសុច្ចរិតក្នុងវិស័យប្រេងឥន្ធនៈ ហើយជាលទ្ធផលមន្រ្តីជំនាញ បានធ្វើការពិន័យលើម្ចាស់ដេប៉ូប្រេងឥន្ធនៈចំនួន២ទីតាំង ក្នុងចំណោម១១ទីតាំង ដែលសមត្ថកិច្ចជំនាញបានចុះត្រួតពិនិត្យ។
គួយររំលឹកថា ថ្មីៗនេះសមត្ថកិច្ចជំនាញ ក.ប.ប. បានធ្វើការកម្ទេចចោលទំនិញពុំមានអនុលោមភាពចំនួន២៧០០.៦៦ គីឡូក្រាមស្ថិតនៅទីលានចាក់សំរាមភូមិស្នោ សង្កាត់រកាក្នុង ក្រុងដូនកែវ ខេត្តតាកែវ។ ទំនិញខូចគុណភាពដែលសមត្ថកិច្ចជំនាញធ្វើការកម្ទេចចោល គឺសុទ្ធតែជាទំនិញដែលបានរកឃើញ និងដកហូតពីទីផ្សារកន្លងមក និងជាទំនិញងាយប៉ះពាល់ដល់សុខភាពអ្នកបរិភោគ ក៏ដូចជាអ្នកប្រើប្រាស់ជាដើម។
សមត្ថកិច្ចជំនាញ ក.ប.ប. តែងតែឃ្លាំពិនិត្យទំនិញជាប្រចាំនៅលើទីផ្សារ ឃ្លាំងស្កុក និងចែកចាយ សិប្បកម្មជាដើម ដើម្បីធានាការពារសុខុមាលភាពប្រជាពលរដ្ឋ និងអនុវត្តច្បាប់លើធុរកិច្ចជនដែលមិនគោរពច្បាប់ផងដែរ៕
