កាសែតអាមេរិក The Wall Street Journal បាននិយាយថាអារ៉ាប៊ីសាអូឌីតនឹងរៀបចំកិច្ចប្រជុំកំពូលមួយនៅថ្ងៃទី៥និងទី៦ខែសីហាដើម្បីព្យាយាមគាំទ្រផែនការសន្តិភាពដែលនឹងបញ្ចប់សង្គ្រាមអ៊ុយក្រែន។ កាសែត Wall Street Journal បានបញ្ជាក់ថារុស្ស៊ីនឹងមិនត្រូវបានអញ្ជើញឱ្យចូលរួមកិច្ចប្រជុំកំពូលដែលនឹងរួមបញ្ចូលប្រទេសចំនួន30 ហើយនឹងអនុម័ត10ចំណុចដែលប្រធានាធិបតីអ៊ុយក្រែនលោក Volodymyr Zelensky បានដាក់ចេញដើម្បីបញ្ចប់សង្រ្គាមកាលពីខែធ្នូឆ្នាំមុនទេ។ ជាចុងក្រោយវគ្គនេះសំដៅទៅលើការចង់បានដ៏ក្លៀវក្លារបស់មេដឹកនាំលោកខាងលិចក្នុងការបញ្ឈប់សង្រ្គាមអ៊ុយក្រែនមុនពេលដែលចិនធ្វើតាមការសន្យារបស់ខ្លួនក្នុងការឈ្លានពានកោះតៃវ៉ាន់ ដែលជាជំហានមួយដែលមានន័យថាមានតម្រូវការយោធាអាមេរិកក្នុងការលះបង់ខ្លួនដើម្បីប្រឈមមុខនឹងចិនសំរាប់នៅសមុទ្រចិនខាងត្បូងភាគខាងត្បូង និងតំបន់ប៉ាស៊ីហ្វិក។

1. អាមេរិចស្វែងរកសន្តិភាពជាមួយរុស្ស៊ីក្រោមជំនួយអារ៉ាប៊ីសាអូឌីត

យោងតាមសារព័ត៌មាន newsweek ចុះផ្សាយថ្ងៃទី៣១ ខែកក្កដាបានអោយដឹងថា អារ៉ាប៊ីសាអូឌីតបានអញ្ជើញប្រទេសជាង30 ទៅកាន់រដ្ឋធានី Riyadh របស់ខ្លួនដើម្បីពិភាក្សាពីកិច្ចចរចាសន្តិភាពដែលមានសក្តានុពលដើម្បីបញ្ចប់សង្រ្គាមនៅថ្ងៃទី 5 និង 6 ខែសីហា នេះបើតាមកាសែត Wall Street Journal បានរាយការណ៍ដំបូង។ យ៉ាង​ណា​មិញ រុស្ស៊ី​មិន​ត្រូវ​បាន​រំពឹង​ថា​នឹងអញ្ជើញ​ចូល​រួម​ទេ។ មេដឹកនាំវិមានក្រឹមឡាំងនៅតែរក្សាគោលដៅរបស់ពួកគេក្នុងការធ្វើសង្គ្រាម ហើយមិនបានបង្ហាញពីឆន្ទៈក្នុងការធ្វើសម្បទានណាមួយនៅលើតុចរចានោះទេ។

ភាគីទាំងពីរបានច្រានចោលការទាមទាររបស់គូប្រជែងរៀងខ្លួនដើម្បីបញ្ចប់សង្គ្រាម។ អ៊ុយក្រែនទទូចថា គ្មានវត្តមានរុស្ស៊ីនៅលើទឹកដីអ៊ុយក្រែន ចាំបាច់ជាតម្រូវការជាមុនសម្រាប់កិច្ចចរចាសន្តិភាព ខណៈដែលទីក្រុងម៉ូស្គូទាមទារទឹកដីដែលពួកគេចាត់ទុកជាប្រវត្តិសាស្ត្ររបស់រុស្ស៊ី។

អ្នកនាំពាក្យវិមានក្រឹមឡាំង លោក Dmitry Peskov បាននិយាយអំពីការអវត្តមានរបស់ទីក្រុងមូស្គូពីកិច្ចចរចាសន្តិភាពថា មេដឹកនាំវិមានក្រឹមឡាំងនឹងតាមឃ្លាំមើលកិច្ចប្រជុំនេះ បើទោះបីជាពួកគេអវត្តមានពីព្រឹត្តិការណ៍នេះក៏ដោយ។

សម្ព័ន្ធមិត្តលោកខាងលិចរបស់អ៊ុយក្រែនដូចជាសហរដ្ឋអាមេរិកទំនងជានឹងប្រើប្រាស់កិច្ចពិភាក្សានេះដើម្បីព្យាយាមបញ្ចុះបញ្ចូលប្រទេសដូចជាឥណ្ឌា និងប្រេស៊ីល ឱ្យប្រកាន់ជំហរគាំទ្របន្ថែមទៀតចំពោះផែនការសន្តិភាពរបស់អ៊ុយក្រែន នេះបើយោងតាមកាសែត The Wall Street Journal ។ ប្រទេសទាំងនេះមួយចំនួនបាននៅតែប្រកាន់ជំហរអព្យាក្រិត្យបន្ថែមទៀតលើសង្រ្គាម។

2. រុស្ស៊ីឆ្លើយតបនឹងអារ៉ាប៊ីសាអូឌីត

យោងតាមសារព័ត៌មាន Reuters ចុះផ្សាយថ្ងៃទី០១ ខែសីហាបានអោយដឹងថា វិមានក្រឹមឡាំងបាននិយាយកាលពីថ្ងៃចន្ទថា ខ្លួនចាំបាច់ត្រូវស្វែងយល់បន្ថែមអំពីគោលបំណងនៃកិច្ចពិភាក្សាដែលបានគ្រោងទុកក្នុងប្រទេសអារ៉ាប៊ីសាអូឌីតអំពីសង្គ្រាមនៅអ៊ុយក្រែន ប៉ុន្តែអ៊ុយក្រែនបានលើកឡើងថារុស្ស៊ីមិនត្រូវបានស្វាគមន៍នៅក្នុងកិច្ចប្រជុំនោះទេ។

កិច្ចប្រជុំនេះត្រូវបានគេរាយការណ៍ថា អារ៉ាប៊ីសាអូឌីតនឹងអញ្ជើញរដ្ឋលោកខាងលិច អ៊ុយក្រែន និងប្រទេសកំពុងអភិវឌ្ឍន៍សំខាន់ៗដើម្បីពិភាក្សាផ្តោតលើផែនការសន្តិភាពរបស់ប្រធានាធិបតីអ៊ុយក្រែនលោក Volodymyr Zelenskiy ។

កាសែតនេះបាននិយាយថា ទីក្រុង Kyiv និងបណ្តាប្រទេសលោកខាងលិចសង្ឃឹមថាកិច្ចចរចាអាចនាំឱ្យមានការគាំទ្រពីអន្តរជាតិសម្រាប់លក្ខខណ្ឌសន្តិភាពដែលអនុគ្រោះដល់អ៊ុយក្រែន។

រាជទាយាទអារ៉ាប៊ីសាអូឌីតព្រះអង្គម្ចាស់ Mohammed bin Salman ធ្លាប់បានសម្តែងការត្រៀមខ្លួនក្នុងការសម្រុះសម្រួលក្នុងជម្លោះនេះ។

ប្រធានាធិបតីរុស្ស៊ីលោកវ្ល៉ាឌីមៀ ពូទីន បាននិយាយកាលពីថ្ងៃសៅរ៍ថា គំនិតផ្តួចផ្តើមរបស់អាហ្រ្វិក-ដែលអំពាវនាវឱ្យមានវិធានការកសាងទំនុកចិត្តតាមពីក្រោយដោយការបញ្ឈប់អរិភាព- អាចជាមូលដ្ឋានសម្រាប់សន្តិភាព ប៉ុន្តែការវាយប្រហាររបស់អ៊ុយក្រែនមកលើរុស្ស៊ីបានធ្វើឱ្យពិបាកក្នុងការសម្រេចចិត្ត។

3. រុស្ស៊ីថាជាការប៉ុនប៉ងបង្កើតសម្ព័ន្ធប្រឆាំងរុស្ស៊ី

យោងតាមសារព័ត៌មាន Azerbaycanca ចុះផ្សាយថ្ងៃទី០២ ខែសីហាបានអោយដឹងថា ក្រសួងការបរទេសនៅទីក្រុងមូស្គូបាននិយាយកាលពីថ្ងៃពុធថាគោលបំណងពិតនៃកិច្ចចរចាសន្តិភាពដែលរៀបចំដោយអារ៉ាប៊ីសាអូឌីតនាពេលខាងមុខស្តីពីអ៊ុយក្រែនដែលផ្តួចផ្តើមដោយលោកខាងលិចនិងក្រុងគៀវគឺដើម្បីកសាងសម្ព័ន្ធប្រឆាំងនឹងរុស្ស៊ី។ 

នៅក្នុងការអត្ថាធិប្បាយទៅកាន់សារព័ត៌មាន Business Daily របស់រុស្ស៊ី Kommersant ក្រសួងបានពិពណ៌នាថាជាឧបាយកលដោយ "របបទីក្រុង Kiev និងអ្នកឧបត្ថម្ភលោកខាងលិច" ដើម្បីជាផ្សព្វផ្សាយវិធីរបស់ប្រធានាធិបតីអ៊ុយក្រែន លោក Vladimir Zelensky សម្រាប់ការបញ្ចប់ជម្លោះ។

ក្រសួងការបរទេសបានបន្ថែមថា ការចរចាក្នុងទម្រង់ដែលបានស្នើឡើងគឺស្មើនឹង "ការប៉ុនប៉ងទាញផលប្រយោជន៍ពីចេតនាដ៏ស្មោះត្រង់របស់ប្រទេសចូលរួម ដើម្បីរួមច្របាច់បញ្ចូលគ្នាធ្វើជាសម្ព័ន្ធប្រឆាំងរុស្ស៊ី"។

ដៃគូរបស់ទីក្រុងមូស្គូដូចជាប្រទេស Mexico ក៏បានចែករំលែកជំហររបស់ខ្លួនឡើងថា ការពិភាក្សាអំពីសន្តិភាពនៅអ៊ុយក្រែនគឺមិនអាចធ្វើទៅរួចនោះទេបើសិនជាគ្មានរុស្ស៊ីចូលរួមដែរនោះ ដោយពន្យល់ហេតុផលថាវានឹងសមហេតុផលជាងនេះលុះត្រាតែមានវត្តមាន ទីក្រុង Kiev និងទីក្រុង Moscow ជាមួយគ្នានៅលើតុចរចា។