តម្លៃលក់រាយប្រេងឥន្ធនៈ នៅកម្ពុជា ត្រូវបានដំឡើងថ្លៃ បើធៀបជាមួយការលក់កាលពីសប្ដាហ៍កន្លងទៅ។ នេះបើតាមការឱ្យដឹងរបស់ក្រសួងពាណិជ្ជកម្ម។

យោងតាមសេចក្ដីជូនដំណឹងរបស់ក្រសួងពាណិជ្ជកម្ម បានឱ្យដឹងនៅថ្ងៃទី១ ខែសីហា ឆ្នាំ២០២៣នេះថា តម្លៃប្រេងឥន្ធនៈ ដែលត្រូវលក់រាយនៅកម្ពុជា ចាប់ពីថ្ងៃទី១ ដល់ថ្ងៃទី១០ ខែសីហា ឆ្នាំ២០២៣ នឹងត្រូវលក់ ៤.៥៥០រៀល/ក្នុង១លីត្រ សម្រាប់សាំងធម្មតា EA92  និង ៤,៤៥០ រៀល/ក្នុង១លីត្រ សម្រាប់ប្រេងម៉ាស៊ូត។

របាយការណ៍ក្នុងពេលកន្លងទៅ ធ្លាប់បានឲ្យដឹងថា សព្វថ្ងៃនេះ ការប្រើប្រាស់ប្រេងឥន្ធនៈនៅកម្ពុជា មានចំនួនប្រហាក់ប្រហែល ១៩ម៉ឺនលីត្រ នៅក្នុងមួយខែៗ និងមានការកើនឡើងជាបន្តបន្ទាប់ ប៉ុន្តែកម្ពុជាមិនប្រឈមការខ្វះខាតនោះទេ ដោយសារតែកិច្ចសហការដ៏ល្អ រវាងក្រសួងពាណិជ្ជកម្ម និងក្រុមហ៊ុនឯកជន ដែលនាំចូលប្រេង សុទ្ធតែបានរួមសហការគ្នាទៅវិញទៅមក ធ្វើយ៉ាងណាធានាឲ្យបរិមាណប្រេងគ្រប់គ្រាន់សម្រាប់លក់ និងតម្លៃសមរម្យអាចទទួលយកបានទាំងសងខាង រវាងអ្នកលក់ និងទិញយកទៅប្រើប្រាស់៕