របាយការណ៏ក្រសួងធនធានទឹក និងឧតុនិយម នៅថ្ងៃច័ន្ទ ទី៣១ ខែកក្កដា នេះ បាន​ឲ្យដឹង​ថា  ដោយសារឥទ្ធិពលនៃប្រព័ន្ធសម្ពាធទាប (ITCZ)  នឹង​ធ្វើឲ្យទឹកទន្លេមេគង្គ​នៅប្រទេស​កម្ពុជា ផ្នែកខាងលើ  នឹងហក់ឡើងក្នុងរយៈពេលពី៣ទៅ៤ថ្ងៃ​ខាងមុខនេះ​។

បើតាម​របាយការណ៏ក្រសួងធនធានទឹក ​នៅខេត្តស្ទឹងត្រែងទឹកនឹងអាចឡើងដល់កម្ពស់៧,៦៥ ម៉ែត្រ , ខេត្តក្រចេះ កម្ពស់​១៦,៧០ម៉ែត និងខេត្តកំពង់ចាម ទឹកនឹងអាចឡើងដល់កម្ពស់៩,៩០ ម៉ែត្រ ​ប៉ុន្តែក្រសួងធនធានទឹក អះអាងថា ទឹកទន្លេដែលហក់ឡើងនៅពេលនេះ គឺនៅមិន​ទាន់​ដល់កម្រិតប្រកាសឲ្យមានការប្រុងប្រយ័ត្ននៅឡើយទេ តែទឹកអាចលិចតំបន់ទំនាប​មួយចំនួន​អមដងទន្ល និងហូរចូលទៅតាមបណ្ដាព្រែកមួយចំនួន ។

សូមបញ្ជាក់ថា ភ្លៀងធ្លាក់ជាប់ៗគ្នា កាលពិចុងសប្តាហ៍មុន  ​​ធ្វើឲ្យលិចលង់​ផ្ទះសម្បែង​របស់​ប្រជាជពលរដ្ឋ​ប្រមាណ ២​៣៨៥ខ្នង​ លិចផលដំណាំរបស់ប្រជាពលរដ្ឋចំនួន៩ ០៨០ហិកតា។  ព្រម​ទាំងលិចផ្លូវ នៅខេត្តចំនួន៨ រួមមាន៖ ខេត្តកំពត បាត់ដំបង មណ្ឌលគិរី ព្រះសីហនុ ឧត្តរ​មាន​ជ័យ កោះកុង ខេត្តព្រះវិហារ និងខេត្តក្រចេះ​។

ក្នុងចំណោម​ខេត្តទាំង៨នេះ នៅឃុំចំនួន១២ ស្រុកកំពង់ត្រាច ខេត្តកំពត មានប្រ​ជាពលរដ្ឋ​រង​គ្រោះច្រើនជាងគេ គឺដល់ទៅ២.២៨០ខ្នង។ ក្នុងនោះធ្ងន់ធ្ងរ១.៤៩៨ខ្នង ដួលរលំ២ខ្នង ព្រម​ទាំង​ជន់លិចដំណាំស្រូវសរុប ៩.០០៦ហិកតា និងលិចផ្លូវលំចំនួន១០ខ្សែ ប្រវែង​៣.៩៧៥ ម៉ែត្រ។

ចំណែកនៅខេត្តព្រះសីហនុ ទឹកភ្លៀងបានឡើងលិចផ្លូវជាតិលេខ៤   ចន្លោះគីឡូម៉ែត្រលេខ ១១៥-១១៦ ក្នុងភូមិសាស្ត្រ ភូមិស្ទឹងសំរោង ឃុំអូរបាក់រទេះ ស្រុកកំពង់សីលា​ ប្រវែង​៥៥០​ម៉ែត្រ​។ ប៉ុន្តែនៅព្រឹកថ្ងៃចន្ទ័នេះ ការធ្វើចរាចររបស់រថយន្តតូច ធំនៅលើកំណាត់រថយន្តតូច ធំ បានដំណើរការទៅមកបានដូចធម្មតាវិញហើយ។ 

ចំណែកនៅខេត្តក្រចេះវិញ រន្ទះបាញ់សម្លាប់មនុស្ស១នាក់ និងរងរបួសចំនួន២នាក់ ខណៈ​ជន​រងគ្រោះទាំង៣នាក់ ទៅឃ្វាលគោនៅតាមវាលស្រែ​៕​​