គណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងថា នៅថ្ងៃទី០១ ខែសីហា ឆ្នាំ​២០២៣ ស្អែកនេះ គ.ជ.ប​ នឹងប្រកាសលទ្ធផលបណ្ដោះអាសន្ន នៃការបោះឆ្នោតជ្រើសតាំង តំណាងរាស្រ្ដ នីតិកាលទី​៧ ឆ្នាំ​២០២៣​ហើយ នេះបើយោងតាមសេចក្ដីប្រកាសព័ត៌មាន។​

​ការសម្រេចប្រកាស​លទ្ធផលបណ្ដោះអាសន្ន​នេះ បាន​ធ្វើឡើងនៅក្នុង​កិច្ចប្រជុំដើម្បីពិនិត្យ និង​សម្រេចលើរបាយការណ៍ ស្តីពីការបោះឆ្នោត​ នាថ្ងៃទី​៣១ ខែកក្កដា ឆ្នាំ​២០២៣នេះ ក្រោមអធិបតីភាព​លោក ប្រាជ្ញ ចន្ទ ប្រធាន គ.ជ.ប។ ​​

សេចក្តីជូនដំណឹងរបស់​គ.ជ.ប បានឲ្យដឹងដែរថា ​​​ការផ្សាយលទ្ធផលបណ្តោះអាសន្ន​នេះ នឹង​ធ្វើឡើងតាម៖ ទូរទស្សន៍ជាតិកម្ពុជា (ទទក), វិទ្យុជាតិកម្ពុជា (វិទ្យុ AM 918 KHz វិទ្យុ FM 96 MHz និងវិទ្យុវត្តភ្នំ FM 105.70 MHz), ទីភ្នាក់ងារសារព័ត៌មានកម្ពុជា-AKP, គេហទំព័រ គ.ជ.ប ៖ electresult.nec.gov.kh, កម្មវិធីទូរសព្ទដៃ (App) ៖ NEC KH និង CamNEC News, Facebook ៖ គណៈកម្មាធិការជាតិរៀបចំការបោះឆ្នោត National Election Committee និង​YouTube ៖ គណៈកម្មាធិការជាតិរៀបចំការបោះឆ្នោត National Election Committee​។

សូមបញ្ជាក់ថា ការបោះឆ្នោតជ្រើសតាំង​តំណាងរាស្រ្ដ នីតិកាលទី​៧ បាន​​ប្រព្រឹត្តទៅ​កាលពី​ថ្ងៃ​ទី​២៣ ខែកក្កដា ឆ្នាំ​២០​២៣កន្លងទៅនេះ។ ការបោះឆ្នោតនេះ មានគណបក្សនយោ​បាយ​ចំនួន​១៨ចូលរួមប្រកួតប្រជែង។ ​តាមលទ្ធផលមិនផ្លូវការបង្ហាញថា គណបក្សប្រជាជន​កម្ពុជា បានឈ្នះសំឡេងដ៏ច្រើនលើសលប់​ប្រមាណ១២០អាសនៈ ហើយ​​គណបក្ស​ហ្វ៊ុនស៊ិនប៉ិច ទទួល​បាន​​៥អាសនៈ​ ដោយឡែកគណបក្សផ្សេងៗមិនទទួលបានអាសនៈនៅក្នុង​ការបោះ​ឆ្នោត​នេះទេ៕​