នាយឧត្តមសេនីយ៍ ហ៊ុន ម៉ាណែត ដែលនឹងក្លាយជានាយករដ្ឋមន្រ្តីកម្ពុជា នាពេលខាងមុខ បានប្តេជ្ញាអនុវត្តឱ្យបានដាច់ខាតតាមបណ្ដាំរបស់ សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា ជុំវិញការដឹកនាំប្រទេស។
នាយឧត្តមសេនីយ៍ ហ៊ុន ម៉ាណែត ដែលកំពុងត្រៀមខ្លួនក្លាយជានាយករដ្ឋមន្រ្តីកម្ពុជា បានសរសេរឱ្យដឹងនៅថ្ងៃទី២៧ ខែកក្កដា ឆ្នាំ២០២៣នេះថា លោកចងចាំជានិច្ចនូវបណ្តាំរបស់សម្ដេចតេជោ ហ៊ុន សែន និងប្តេជ្ញាអនុវត្តឱ្យបានដាច់ខាតនៅក្នុងគ្រប់កាលៈទេសៈ។
សូមបញ្ជាក់ថា កាលពីថ្ងៃទី២៦ ខែកក្កដា ឆ្នាំ២០២៣ សម្ដេចតេជោ ហ៊ុន សែន នាយករដ្ឋមន្រ្តីកម្ពុជា បានមានប្រសាសន៍លើកឡើងអំពីការផ្ទេរតំណែងឱ្យនាយឧត្តមសេនីយ៍ ហ៊ុន ម៉ាណែត ដឹកនាំបន្ត។
សម្ដេចតេជោ បានលើកឡើងថា "ពេលកូនក្លាយជានាយករដ្ឋមន្ត្រីរបស់កម្ពុជា កូនត្រូវតែការពារឲ្យខាងតែបាននូវសន្តិភាព ដើម្បីធានាដល់ការអភិវឌ្ឍ និងភាពសុខសាន្តរបស់ប្រជាជន" ។
សម្ដេចតេជោ ហ៊ុន សែន បានគួសបញ្ជាក់ដែរថា នាយឧត្តមសេនីយ៍ ហ៊ុន ម៉ាណែត នឹងក្លាយជានាយករដ្ឋមន្រ្តីកម្ពុជា នាពេលឆាប់ៗនេះ ខណៈសម្ដេច ក៏នឹងក្លាយជាប្រធានព្រឹទ្ឋសភា និងប្រធានឧត្តមក្រុមប្រឹក្សាព្រះមហាក្សត្រ៕