បែកធ្លាយរូបភាពគួរអោយចាប់អារម្មណ៍ជាច្រើនសន្លឹកនៅលើបណ្តាញសង្គមអ៊ីនធឺណែតកាលពីពេលថ្មីៗនេះ បន្ទាប់ពីអ្នកលេងនៅបណ្តាញសង្គមមួយចំនួនបានចាប់ផ្តើមបង្ហោះឡើងនូវរូបភាពទីងមោងដែលនិម្មិតឡើងជាតារាក្នុងដួងចិត្តរបស់ពួកគេ! ស្របពេលដែលឈានចូលដល់រដូវហែទានវស្សានាពេលថ្មីៗនេះ មានសិល្បករជួរមុខកម្ពុជាមួយចំនួនកំពុងក្លាយជាចំនុចលេចធ្លោយ៉ាងពិសេសគួរអោយកត់សម្គាល់ ក្រោយពេលដែលរូបរបស់ពួកគេត្រូវបានក្លាយទៅជាការសូនរូបធ្វើជាទីងមោងពីបណ្តាអ្នកច្នៃទីងមោងទាំងនោះ។

គួរអោយចាប់អារម្មណ៍ផងដែរ​​​ សង្កេតឃើញថាក្នុងនោះក៏មានតួសម្តែងប្រុសដ៏លេចធ្លោមួយរូបនៅកម្ពុជា មានរហ័សនាមថា ប្រុសខួច ដែលត្រូវបានជាប់លេខជាជម្រើសអ្នកគាំទ្រស្រលាញ់ចូលចិត្ត និងជ្រើសរើសយកមកសូនរូបជារូបទីងមោងផងដែរ។ កត់សម្គាល់ឃើញថែមទៀតថា រូបរបស់ប្រុសខួច គឺត្រូវបានច្នៃឡើង​​​បែបប្រុសស្អាតពិតៗ យ៉ាងស្រដៀងលោកខ្លាំងមែនទែន​​​ មើលយ៉ាងចាប់ច្រលំជារូបរបស់លោកពិតទៅហើយ។ 

គួរបញ្ជាក់ផងដែរថា ប្រុសខួច គឺជាតារាសម្តែងកម្ពុជាកំពុងត្រូវប៉ាន់និងពេញនិយម ដែលមានឈ្មោះពិតថា លី សុគឹមសាន ហើយបានធ្វើអោយទស្សនិកជនចាប់ផ្តើមស្គាល់លោកដំបូងតាមរយៈបទ«Forever Alone» និង«មេឃកំពុងភ្លៀងហើយ»។

បន្ទាប់មកលោកក៏បានចាប់ផ្តើមបង្ក់ើនប្រជាប្រិយភាពនៅក្នុងវិស័យភាពយន្តតាមរយៈរឿងដំបូង«និស្ស័យបងប្អូន» និងរឿង«ភ្លើង»។ ក្រោយប្រឡូកក្នុងវិស័យសិល្បៈត្រឹមរយៈពេលប៉ុន្មានឆ្នាំប៉ុណ្ណោះ ប្រុសខួចបានទាក់ទាញចំណាប់អារម្មណ៍យ៉ាងខ្លាំងពីទស្សនិកជនតាមរយៈសមត្ថភាពសម្តែងរបស់លោក និងរូបសង្ហាពិតៗរបស់លោក។ ជាក់ស្តែងសង្កេតឃើញយ៉ាងច្បាស់នូវការគាំទ្រដែលបង្ហាញឡើងតាមរយៈការសូនរូបលោកជារូបទីងមោងនេះស្រាប់។ ចុះទស្សនិកជនយល់ឃើញយ៉ាងណាដែរ?