ក្រសួងអប់រំ យុវជន និងកីឡា បានកំណត់រួចហើយ សម្រាប់ការប្រឡងបាក់ឌុប ឆ្នាំសិក្សា២០០២-២០២៣ គឺនៅថ្ងៃទី០៦ ខែវិច្ឆិកា ឆ្នាំ២០២៣ ខាងមុខ នេះបើតាមសេចក្តីប្រកាសព័ត៌មាន ចុះថ្ងៃទី២៥ ខែកក្កដា ឆ្នាំ២០២៣នេះ ហើយក្រសួងបានណែនាំដល់មន្ទីរអប់រំយុវជន រាជធានី ខេត្ត ត្រៀមលក្ខណៈអនុវត្តការប្រឡងនេះឱ្យមានប្រសិទ្ធភាពខ្ពស់។ សេចក្ដីប្រកាសព័ត៌មានរបស់ក្រសួងអប់រំបានបញ្ជាក់យ៉ាងនេះថា “ក្រសួងអប់រំសូមបញ្ជាក់ជូនដល់បេក្ខជន អ្នកអាណាព្យាបាល និងសាធារណជន ទាំងអស់ថា ការប្រឡងសញ្ញាបត្រមធ្យមសិក្សាទុតិយភូមិ សម្រាប់ឆ្នាំសិក្សា ២០០២-២០២៣ នេះ ក្រសួង បានកំណត់សម័យប្រឡង នាថ្ងៃទី០៦ ខែវិច្ឆិកា ឆ្នាំ២០២៣។ សេចក្ដីដូចបានជម្រាបជូនខាងលើ សូមមន្ទីរអប់រំ យុវជន និងកីឡារាជធានី ខេត្ត គណៈគ្រប់គ្រង គ្រឹះស្ថានមធ្យមសិក្សា បុគ្គលិកអប់រំ មាតាបិតា អ្នកអាណាព្យាបាល សិស្សានុសិស្សគ្រប់រូប ជ្រាបជាព័ត៌មាន និងត្រៀមលក្ខណៈ ដើម្បីអនុវត្តឱ្យមានប្រសិទ្ធភាពខ្ពស់”។ គួរបញ្ជាក់ថា សម្រាប់ឆ្នាំសិក្សា២០២១-២០២២ កន្លងទៅ ការប្រឡងសញ្ញាបត្រមធ្យមសិក្សាទុតិយភូមិ បានប្រព្រឹត្តទៅនៅថ្ងៃទី០៥ ខែធ្នូ ឆ្នាំ២០២២ ។ មានបេក្ខជនសរុបចំនួន១២៨ ១៣៦នាក់ ដោយចំនួននេះ មានការកើនឡើងជាងឆ្នាំមុនៗ និងមានសិស្សប្រឡងជាប់សរុប ៩០៩៥០ នាក់ ត្រូវជា៧២.៣៣% នៃចំនួនបេក្ខជនមកប្រឡង។ ក្នុងនោះ មានបេក្ខជនជាប់និទ្ទេស A ចំនួន១០៤៩ នាក់, និទ្ទេស B ចំនួន៧២៣២ នាក់, និទ្ទេស C ចំនួន១៩០៥៣ នាក់, និទ្ទេស D ចំនួន ៣១១៦៦ នាក់ និងនិទ្ទេស E ចំនួន ៣២៤៥០ នាក់៕
