នៅថ្ងៃទី២១ ខែកក្កដា ឆ្នាំ២០២៣នេះ ជាថ្ងៃបិទបញ្ចប់យុទ្ធនាការឃោសនាបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ គេឃើញគណបក្សនយោបាយផ្សេងៗបានធ្វើយុទ្ធនាការការឃោសនាខ្លះតូច ខ្លះធ្វើធំ តាមធនធានរបស់ខ្លួន ដោយគណបក្សប្រជាជនកម្ពុជា ដែកំពុងកាន់អំណាច បានដឹកនាំសមាជិក សមាជិកា ហែក្បួនទ្រង់ទ្រាយធំជាងគេ នៅរាជធានីភ្នំពេញ។
ក្បួនឃោសនាដ៏ធំនេះ ដឹកនាំដោយលោកបណ្ឌិត ហ៊ុន ម៉ាណែត បេក្ខជនឈរឈ្មោះពេញសិទ្ធិលេខរៀងទី១នៅមណ្ឌលរាជធានីភ្នំពេញ និងភរិយា និងមានការចូលរួមពីសមាជិក សមាជិកាគណបក្ស ប្រមាណជិត៦ម៉ឺននាក់ ហែក្បួនឃោសនាទ្រង់ទ្រាយធំនៅរាជធានីភ្នំពេញ ដោយជួបជុំគ្នានៅមជ្ឈមណ្ឌល់កោះពេជ្រ។ ដោយឡែកគណបក្សខ្មែររួបរួមជាតិ បានជួបជុំគ្នានៅក្រសួងដែនដី ហើយគណបក្សហ៊្វុនស៊ិនប៉ិច ជួបជុំគ្នានៅក្បែរក្រសួងដែនដី។
នៅថ្ងៃបិទយុទ្ធនាការឃោសនាបោះឆ្នោតចុងក្រោយ នៅរាជធានីភ្នំពេញនេះ គេឃើញលោក វ៉ាង វិនធាន ឯកអគ្គរដ្ឋទូតចិនប្រចាំប្រទេសកម្ពុជា និងលោក ប្រាជ្ញ ចន្ទ ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) ព្រមទាំងតំណាងអង្គទូត នៃបណ្តាប្រទេសជាមិត្តបានចុះតាមដាន និងពិនិត្យស្ថានភាពទូទៅ នៃការរៀបចំក្បួនដង្ហែឃោសនាស្វែងរកសំឡេងឆ្នោត នៅថ្ងៃចុងក្រោយនេះផងដែរ។
ថ្លែងប្រាប់អ្នកសារព័ត៌មាន ពេលចុះតាមដានការឃោសនាចុងក្រោយនេះ លោក ប្រាជ្ញ ចន្ទ បានប្រាប់ក្រុមអ្នកសារព័ត៌មានថា ២១ថ្ងៃនៃយុទ្ធនាការឃោសនាបោះឆ្នោតរបស់គណបក្សនយោបាយទាំង១៨ គ.ជ.ប បានទទួលពាក្យបណ្តឹងប្រមាណ៣០បណ្តឹងប៉ុណ្ណោះ។ ហើយបណ្តឹងទាំងអស់នោះភាគច្រើនជាបណ្តឹងប្តឹងទៅលើការផ្សព្វផ្សាឃាសនាតាមអនឡាញ។ តែបណ្តឹងទាំងនោះអាចដោះស្រាយបានមិនធ្ងន់ធ្ងរទេ។ ជារួមដំណើរការឃោសនារកសម្លេងឆ្នោតរយ:២១ថ្ងៃមកនេះ លោក ប្រាជ្ញ ចន្ទ បានអះអាងថាដំណើរការបានយ៉ាងល្អ។ នេះសបញ្ជាក់ថា អ្នកនយោបាយនៅកម្ពុជាកាន់តែចាស់ទុំផ្នែកនយោបាយ។
ទោះជាយ៉ាងណាលោក ប្រាជ្ញ ចន្ទ អះអាងថា ការងារនេះប្រព្រឹត្តិទៅបានល្អ ក៏ដោយសារតែកិច្ចសហប្រតិបត្តិការល្អរវាងគណបក្សនយោបាយទាំងអស់, អាជ្ញាធរដែនដី ,កងកម្លាំងប្រដាប់អាវុធ និងប្រជាពលរដ្ឋនៅតាមមូលដ្ឋានដែលមានការយល់ដឹងច្រើនផងដែរ។
គួររំលឹកថា សម្រាប់យុទ្ធនាការឃោសនាបោះឆ្នោតជ្រើសរើសតំណាងរាស្រ្ត អាណត្តិទី៧ មានរយៈពេល២១ថ្ងៃ ដោយបានចាប់ផ្តើមពីថ្ងៃទី០១ ខែកក្កដា ដល់ថ្ងៃទី២១ ខែកក្កដា ឆ្នាំ២០២៣ ហើយយុទ្ធនាការឃោសនាកន្លងមកនេះ បានប្រព្រឹត្តិទៅក្រោមបរិយាកាសល្អប្រសើរ គ្មានអំពើហិង្សាណាមួយកើតឡើងគួរឲ្យបារម្ភនោះឡើយ៕
