ប្រធានរដ្ឋចិន និងសម្តេចព្រះបរមនាថ នរោត្តម សីហមុនី ព្រះមហាក្សត្រចក្រកម្ពុជា បានផ្ញើសារលិខិតអបអរសាទរគ្នាទៅវិញទៅមក ដើម្បីអបអរសាទរខួបគម្រប់៦៥ឆ្នាំ នៃការបង្កើតចំណងការទូតរវាងចិន និងកម្ពុជា។

ស្ថានទូតចិនប្រចាំកម្ពុជា បានឱ្យដឹងនៅថ្ងៃទី១៩ ខែកក្កដា ឆ្នាំ២០២៣នេះថា លោក Xi Jinping ប្រធានរដ្ឋចិន និងព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានផ្ញើសារលិខិត អបអរសាទរគ្នាទៅវិញទៅមក ហើយលោក Li Qiang នាយករដ្ឋមន្ត្រីចិន និងសម្តេចតេជោ ហ៊ុន សែន នាយករដ្ឋមន្ត្រីកម្ពុជាក៏បានផ្ញើសារលិខិត អបអរសាទរគ្នាទៅវិញទៅមកដែរ។

ស្ថានទូតចិនប្រចាំកម្ពុជា បានឱ្យដឹងបន្តថា លោក Xi Jinping ប្រធានរដ្ឋចិន បានរំលឹកអំពីទំនាក់ទំនងក្នុងអំឡុងពេល៦៥ឆ្នាំកន្លងមកនេះរវាងចិន និងកម្ពុជា ដោយបានឆ្លងកាត់ការសាកល្បងជាច្រើនហើយកាន់តែមានភាពរឹងមាំថែមទៀត។

លោក Xi Jinping បានចាត់ទុកការកសាងសហគមន៍វាសនារួមចិន-កម្ពុជា ថា ឈានចូលក្នុងយុគសម័យថ្មីដែលប្រកបដោយគុណភាពខ្ពស់កម្រិតខ្ពស់និងស្តង់ដារខ្ពស់ ខណៈក្របខ័ណ្ឌនៃកិច្ចសហប្រតិបត្តិការត្បូងពេជ្រចិន និងកម្ពុជា បានអភិវឌ្ឍកាន់តែស៊ីជម្រៅ និង​រឹងមាំ​។

ប្រធានាធិបតីចិន បានអះអាងថា លោកបានយកចិត្តទុកដាក់យ៉ាងខ្លាំងចំពោះការអភិវឌ្ឍទំនាក់ទំនងចិន និងកម្ពុជា ព្រមទាំងរីករាយចិត្តចំពោះការខិតខំប្រឹងប្រែងជាមួយព្រះមហាក្សត្រកម្ពុជា ដើម្បីជំរុញឱ្យមិត្តភាពចិន-កម្ពុជា ទទួលបានផ្លែផ្កានិងនាំមកនូវផលប្រយោជន៍ជាក់ស្តែងជូនចំពោះប្រជាជននៃប្រទេសទាំងពីរ៕