1. អាមេរិក​គំរាម​បណ្តេញ​ក្រុមហ៊ុន​អារ៉ាប៊ីសាអូឌីត​ចេញពី​ទឹកដី​ខ្លួន 

យោងតាមសារព័ត៌មាន The Washington Post ចុះផ្សាយថ្ងៃទី១៦ ខែកក្កដាបានអោយដឹងថា គ្រោះរាំងស្ងួតមួយបានលេបត្របាក់រដ្ឋអារីហ្សូណា ធ្វើអោយប៉ះពាល់លើទន្លេ និងអាងស្តុកទឹករបស់ខ្លួន ហើយបានកាត់បន្ថយទឹកដល់កម្រិតទាបនៅតាមផ្ទះរបស់កសិករនៅជិតជ្រលងវាលខ្សាច់នេះ។ ប៉ុន្តែវាលពណ៌បៃតងរបស់រុក្ខជាតិអាល់ហ្វាហ្វា បានលាតសន្ធឹងលើផ្ទៃដីរាប់ពាន់ហិចតានៃវាលខ្សាច់នេះ ដោយអណ្ដូងបាន​ទាញយក​ទឹក​ពី​ក្រោម​ដី​ជ្រៅ ប្រែ​ក្លាយ​ផែនដី​ដែល​ស្ងួត​ទៅ​ជា​ដី​ស្រែ​ចម្ការ។ អស់រយៈពេលជិតមួយទសវត្សរ៍មកហើយ រដ្ឋអារីហ្សូណាបានជួលដីជនបទភាគខាងលិចនៃទីក្រុង Phoenixនេះ ទៅឱ្យក្រុមហ៊ុនដែលគ្រប់គ្រងដោយអារ៉ាប៊ីសាអូឌីត ដោយអនុញ្ញាតឱ្យពួកគេបូមទឹកទាំងអស់ដែលត្រូវការដើម្បីដាំស្មៅអាល់ហ្វាហ្វា ដែលជាដំណាំដែលពួកគេនាំចេញដើម្បីចិញ្ចឹមគោទឹកដោះគោរបស់ព្រះរាជាណាចក្រ។ ហើយ​ជា​ច្រើន​ឆ្នាំ​មក​ហើយ រដ្ឋ​មិន​បាន​ដឹង​ថា​ក្រុមហ៊ុន​នេះ​ប្រើប្រាស់​ទឹក​អស់ប៉ុន្មាន​ទេ។ មិនយូរប៉ុន្មានបន្ទាប់ពីក្រុមហ៊ុន Fondomonte Arizona បានមកដល់ជ្រលងភ្នំ Butler ក្នុង 2015 អ្នករៀបចំផែនការរដ្ឋបានស្នើឱ្យក្រុមហ៊ុនដំឡើងម៉ែត្រនិងរាយការណ៍អំពីការប្រើប្រាស់ទឹករបស់ខ្លួន ប៉ុន្តែសំណើរនេះត្រូវបានបដិសេធដោយមន្រ្តីរដ្ឋបាលក្នុងរដ្ឋាភិបាល ដោយយល់ឃើញថាទឹកនេះគឺជាកម្មសិទ្ធិឯកជនដែលអាចប្រើ​​​ប្រាស់លើដីជាជាងធនធានរបស់សាធារណៈ។

2. រស្ស៊ី​ចាប់​ចំណាប់ខ្មាំង​គ្រាប់ធញ្ញជាតិ

យោងតាមសារព័ត៌មាន The New York Times ចុះផ្សាយថ្ងៃទី១៦ ខែកក្កដាបានអោយដឹងថា ការពិភាក្សាលើការបន្តកិច្ចព្រមព្រៀងដែលអនុញ្ញាតឱ្យអ៊ុយក្រែននាំចេញគ្រាប់ធញ្ញជាតិរបស់ខ្លួនឆ្លងកាត់សមុទ្រខ្មៅក្នុងសម័យសង្គ្រាមត្រូវបានកំណត់ថានឹងធ្លាក់ចុះម្តងទៀត ខណៈដែលអង្គការសហប្រជាជាតិបានរង់ចាំកាលពីថ្ងៃអាទិត្យសម្រាប់ការឆ្លើយតបពីរុស្ស៊ីលើសំណើរដែលអាចស្តារកិច្ចព្រមព្រៀងនេះឡើងវិញ និងជួយរក្សាតម្លៃគ្រាប់ធញ្ញជាតិពិភពលោកឱ្យមានស្ថិរភាព។ គំនិតផ្តួចផ្តើមគ្រាប់ធញ្ញជាតិសមុទ្រខ្មៅ ដែលសម្របសម្រួលដោយអង្គការសហប្រជាជាតិ និងទួរគី គឺជាផ្នែកមួយក្នុងចំនោមផ្នែកតិចតួចបំផុតនៃការសហប្រតិបត្តិការក្នុងសម័យសង្រ្គាមរវាងអ៊ុយក្រែន និងរុស្ស៊ី។ វាត្រូវបានយល់ព្រមជាលើកដំបូងនៅក្នុងរដូវក្តៅឆ្នាំមុន ដោយអនុញ្ញាតឱ្យអ៊ុយក្រែនចាប់ផ្តើមការនាំចេញគ្រាប់ធញ្ញជាតិរាប់លានតោនពីកំពង់ផែរបស់ខ្លួននៅលើសមុទ្រខ្មៅ។ ប៉ុន្តែ​រុស្ស៊ី​បាន​គំរាម​ម្តង​ហើយ​ម្តង​ទៀត​ថា​នឹង​ដក​ខ្លួន​ចេញ​ពី​កិច្ចព្រមព្រៀង​នេះដែល​ត្រូវ​បាន​បន្ត​ក្នុង​រយៈពេល​ខ្លី​ប៉ុណ្ណោះ។ ថ្ងៃផុតកំណត់ចុងក្រោយបំផុតសម្រាប់កិច្ចព្រមព្រៀងនេះគឺនៅពាក់កណ្តាលអធ្រាត្រថ្ងៃច័ន្ទនេះហើយ។ នៅក្នុងការឆ្លើយតបនឹងការទាមទារដ៏សំខាន់មួយរបស់រុស្ស៊ីមុនពេលផុតកំណត់ចុងក្រោយនេះ អគ្គលេខាធិការអង្គការសហប្រជាជាតិ លោកAntonio Guterres បានផ្ញើលិខិតមួយទៅកាន់ប្រធានាធិបតីលោក Vladimir V.Putin នៃប្រទេសរុស្ស៊ីកាលពីសប្តាហ៍មុនជាមួយនឹងសំណើដែលនឹង "ដកចេញនូវឧបសគ្គដែលប៉ះពាល់ដល់ប្រតិបត្តិការហិរញ្ញវត្ថុ" តាមរយៈ ធនាគារកសិកម្មរបស់ប្រទេសនេះ "ហើយក្នុងពេលដំណាលគ្នានេះអនុញ្ញាតឱ្យមានលំហូរបន្តនៃគ្រាប់ធញ្ញជាតិអ៊ុយក្រែនតាមរយៈសមុទ្រខ្មៅ" នេះបើយោងតាមសេចក្តីថ្លែងការណ៍របស់អង្គការសហប្រជាជាតិ។ ពីរថ្ងៃក្រោយមក លោកពូទីនបានហៅកិច្ចព្រមព្រៀងនេះថាជា “ល្បែងតែម្ខាង” ដោយគំរាមម្តងទៀតថានឹងដកខ្លួនចេញពីកិច្ចព្រមព្រៀងនេះ ដោយសារតែអ្វីដែលលោកបានចាត់ទុកថាជាលក្ខខណ្ឌមិនឆ្លើយតប នេះបើយោងតាមការរាយការណ៍របស់សារព័ត៌មាន ​​Tass ។

3. Kosovo ទិញដ្រូន Bayraktar ពីទួរគី

យោងតាមសារព័ត៌មាន Reuters ចុះផ្សាយថ្ងៃទី១៦ ខែកក្កដាបានអោយដឹងថា​​​ កូសូវ៉ូបានទិញដ្រូន Bayraktar មួយក្រុមដែលផលិតនៅទួរគី នេះបើតាមមេដឹកនាំរបស់ខ្លួនបាននិយាយកាលពីថ្ងៃអាទិត្យឡើងនៅខណៈពេលប្រឈមនឹងភាពចលាចលនៅភាគខាងជើងនៃប្រទេសដែលជនជាតិស៊ែបបានបដិសេធមិនទទួលស្គាល់អាជ្ញាធរនៃទីក្រុង Pristina ។ នៅក្នុងការបង្ហោះ Facebook ដែលបង្ហាញរូបលោកនៅពីមុខដ្រូនជាមួយរដ្ឋមន្ត្រីការពារជាតិរបស់លោក នាយករដ្ឋមន្ត្រីលោកAlbin Kurti បាននិយាយថា ការចំណាយផ្នែកសន្តិសុខចុងក្រោយបំផុតនេះកំពុងធ្វើឱ្យប្រទេសមានសុវត្ថិភាព។ លោក​មិន​បាន​ប្រាប់​ចំនួន រឺ​តម្លៃ​ដ្រូនឡើយ ហើយ​ក៏​មិន​បាន​និយាយ​ថា​ពួកវា​នឹង​ត្រូវ​ប្រើ​សម្រាប់​អ្វី​ដែរ។ ដ្រូន Bayraktar ទទួលបានប្រជាប្រិយភាពទូទាំងពិភពលោក បន្ទាប់ពីត្រូវបានប្រើប្រាស់ដោយយោធាអ៊ុយក្រែនប្រឆាំងនឹងកងកម្លាំងរុស្ស៊ី។ ក្នុងរយៈពេលប៉ុន្មានខែកន្លងមកនេះ កូសូវ៉ូបានប្រឈមមុខនឹងអំពើហឹង្សាជនជាតិភាគតិចរបស់ខ្លួននៅភាគខាងជើង ដែលជាជម្រករបស់ជនជាតិស៊ែបប្រមាណ 50,000 ដែលត្រូវបានគាំទ្រដោយទីក្រុងបែលក្រាដ។ បញ្ហាបានផ្ទុះឡើងនៅក្នុងខែឧសភា បន្ទាប់ពីអភិបាលក្រុងជនជាតិអាល់បានីចូលកាន់តំណែងបន្ទាប់ពីការបោះឆ្នោតក្នុងតំបន់ ដែលត្រូវបានធ្វើពហិការដោយជនជាតិស៊ែប ដោយទាមទារឱ្យអនុវត្តកិច្ចព្រមព្រៀងដែលមានអាយុកាលជាងមួយទសវត្សរ៍ហើយសម្រាប់បន្តភាពស្វ័យភាពបន្ថែមទៀត។