មន្ត្រីជាន់ខ្ពស់​ចំនួន៥រូប នៅក្រសួងចំនួន៤ ដែល​មិន​​ទាន់​​បាន​​ប្រកាសទ្រព្យសម្បត្តិ និង​បំណុល ត្រូវបាន​អង្គភាព​ប្រឆាំង​អំពើពុករលួយ (ACU) ​បាន​ស្នើឲ្យ​​​បញ្ជូន​ឯកសារ​ប្រកាស​ទ្រព្យសម្បត្តិ និងបំណុល ទៅ​អង្គភាព​​ប្រឆាំងអំពើពុករលួយជាប្រញាប់ នេះបើយោងតាម​សេចក្ដីជូនដំណឹង​​នៅថ្ងៃទី១១ ខែកក្កដា នេះ។ បើតាម​អង្គភាព​​ប្រឆាំងអំពើពុករលួយ​បានឲ្យដឹងថា ​ឥស្សរជនទាំង៥​រូបនេះ ជាមន្ត្រី​បម្រើ​ការ​នៅក្រសួងការពារជាតិ ក្រសួងមហាផ្ទៃ ក្រសួងធម្មការ​ និងក្រសួងវប្បធម៌ ហើយអង្គ​ភាព​ប្រឆាំង​អំពើពុករលួយ ក៏ដូចជាក្រុមជនបង្គោលប្រចាំ​ក្រសួង​ទាំង​នេះ មិនអាចទាក់​ទង​បាន​ឡើយ ដែល​សង្ស័យអាចចេញទៅនៅបរទេស ឬយ៉ាងណានោះ។ មន្ត្រីដែលមិនទាន់ប្រកាសទ្រព្យសម្បត្តិ និងបំណុល រួមមាន៖ ១.ឧត្ដមសេនីយ៍ត្រី ទី ស៊ីណាត នាយរងការិយាល័យ នៃបញ្ហា​ការដ្ឋានកងទ័ពជើងគោក ២.ឧត្តមសេនីយ៍ត្រី លឹម សៀង នាយនគរបាលថ្នាក់ឧត្តមសេនីយ៍ត្រីនៃក្រសួងមហាផ្ទៃ ៣.លោកស្រី ផាយ សៀកលី ប្រធាន​នាយកដ្ឋានសវនកម្មផ្ទៃក្នុងនៃក្រសួងធម្មការ និងសាសនា ៤.លោក Divay Gupta ទីប្រឹក្សា​ក្រសួង​វប្បធម៌ និងវិចិត្រសិល្បៈ និង៥. លោក Philippe Delanghe ទីប្រឹក្សាក្រសួងវប្បធម៌ វិចិត្រសិល្បៈ​។ បើតាមអង្គភាពប្រឆាំងអំពើពុករលួយ ការមិនបានប្រកាសទ្រព្យសម្បត្តិ និងបំណុល ឬប្រ​កា​ស​​​មិនត្រឹមត្រូវទ្រព្យសម្បត្តិ មាត្រា ៣៨ នៃច្បាប់ស្តីពីការប្រឆាំងអំពើពុករលួយ បានកំណត់​ផ្តន្ទា​ទោសដាក់ពន្ធនាគារពី​១ខែ ទៅ​១ឆ្នាំ និងពិន័យជាប្រាក់ ១សែនរៀល ទៅ​២ លានរៀល ហើយ​ត្រូវបង្ខំឱ្យធ្វើការប្រកាសទ្រព្យសម្បត្តិ និងបំណុល ជូនអង្គភាព​ប្រឆាំងអំពើ​ពុក​រលួយ​ថែមទៀត។ តែក្នុងករណីរឹងរូសមិនព្រមប្រកាសទ្រព្យសម្បត្តិទៀតនោះ នឹងត្រូវផ្តន្ទាទោស​ទ្វេដង៕