នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងជាប្រធានលេខាធិការដ្ឋាន នៃគណៈបញ្ជាការសន្តិសុខអចិន្ត្រៃយ៏សម្រាប់ការបោះឆ្នោត (គ.ស.អ) បានដាក់ផែនការដល់កងកម្លាំងនគរបាលទាំងអស់ ឲ្យខិតខំរក្សាការពារ សន្តិសុខ សណ្តាប់ធ្នាប់ ធ្វើយ៉ាងណាឲ្យដំណើរការឃោសនារបស់បក្សនយោបាយ និងការបោះឆ្នោតប្រព្រឹត្តទៅដោយរលូន ជោគជ័យ តាមការគ្រោងទុក។
ការដាក់ផែនការនេះ ត្រូវបាននាយឧត្តមសេនីយ៍សន្តិបណ្ឌិត នេត សាវឿន ធ្វើឡើងនៅក្នុងឱកាសអញ្ជើញចុះត្រួតពិនិត្យ និងសំណេះសំណាលជាមួយក្រុមទី១ វេនប្រចាំបញ្ជារបស់លេខាធិការដ្ឋាន នៃ គ.ស.អ សម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៧ ឆ្នាំ២០២៣ នៅអគ្គស្នងការដ្ឋាននគរបាលជាតិ នាព្រឹកថ្ងៃទី០៤ ខែកក្កដា ឆ្នាំ២០២៣នេះ។
មានប្រសាសន៏នៅក្នុងពិធីនោះ នាយឧត្តមសេនីយ៍សន្តិបណ្ឌិត នេត សាវឿន បានកោតសសើរដល់កងកម្លាំងទាំងអស់ ដែលគ្រប់គ្រងសភាពការណ៍ និងសហការណ៍គ្នាបានយ៉ាងល្អ ហើយត្រូវបន្តការងារនេះ ឲ្យខ្លាំងក្លាឡើងថែមទៀត ដើម្បីឲ្យដំណើរការសន្តិសុខ និងសណ្តាប់ធ្នាប់នៃយុទ្ធនាការឃោសនារកសំឡេងឆ្នោត និងថ្ងៃបោះឆ្នោតប្រព្រឹត្តទៅដោយជោគជ័យតបតាមការចង់បានរបស់នាយករដ្ឋមន្រ្តីនៃកម្ពុជា និងប្រជាជនទូទាំងប្រទេស។
បើតាមនាយឧត្តមសេនីយ៍សន្តិបណ្ឌិត នេត សាវឿន សភាពការណ៍សន្តិសុខ និងសណ្តាប់ធ្នាប់ ក្នុងអំឡុងយុទ្ធនាការឃោសនារកសំឡេងឆ្នោត តាំងពីថ្ងៃទី០១ ខែកក្កដា ឆ្នាំ២០២៣ រហូតមក បានប្រព្រឹត្តទៅដោយល្អប្រសើរ មិនមានអ្វីកើតឡើងគួរឲ្យកត់សម្គាល់នោះទេ ហើយបញ្ហាទាំងនេះ ដោយសាមានការចូលរួមដោយផ្ទាល់របស់កម្លាំងនគរបាលគ្រប់គោលដៅទាំងអស់បានល្អ។
ជាមួយនឹងការលើកឡើងខាងលើនេះ នាយឧត្តមសេនីយ៍សន្តិបណ្ឌិត នេត សាវឿន បានដាក់គោលការណ៏ដល់កម្លាំងប្រចាំបញ្ជារបស់លេខាធិការដ្ឋាន នៃ គ.ស.អ ទាំងអស់ចំនួន៥ចំណុចរួមមាន៖
ទី១. ជួយតាមដានការអនុវត្តច្បាប់ និងលិខិតបទដ្ឋានគតិយុត្ត ពាក់ព័ន្ធដល់ការបោះឆ្នោត ការអនុវត្តបទបញ្ជា និងនីតិវិធីរបស់ គ.ជ.ប ទាំងមុន ក្នុង និងក្រោយការបោះឆ្នោត។
ទី២. ប្រមូលព័ត៌មាន និងរបាយការណ៍ពីបណ្តាក្រសួង-ស្ថាប័ន អង្គភាពពាក់ព័ន្ធ និងពីយន្តការរចនាសម្ព័ន្ធ សន្តិសុខបោះឆ្នោតគ្រប់ថ្នាក់ ជុំវិញស្ថានការណ៍សន្តិសុខបោះឆ្នោត និងកិច្ចការពារសន្តិសុខ សណ្តាប់ធ្នាប់សាធារណៈ និងសុវត្ថិភាពទូទៅ ដើម្បីរាយការណ៍ជូនប្រធានលេខាធិការដ្ឋាននៃ គ.ស.អ សុំការចង្អុលដឹកនាំបន្ត។
ទី៣. តាមដាន ក្តាប់ព័ត៌មាន និងសភាពការណ៍នានា ដែលបានកើតឡើងនៅតាមបណ្តារាជធានី ខេត្តទាំងមុន និងក្រោយការបោះឆ្នោត ធ្វើការវិភាគ វាយតម្លៃ រាយការណ៍ដោះស្រាយបានទាន់ពេលវេលា។
ទី៤. ធ្វើរបាយការណ៍រៀងរាល់ថ្ងៃ អំពីស្ថានការណ៍សន្តិសុខបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ ជូនប្រធានលេខាធិការដ្ឋាន នៃ គ.ស.អ ដើម្បីរាយការណ៍ជូនប្រធានគណៈបញ្ជាការសន្តិសុខអចិន្ត្រៃយ៍សម្រាប់ការបោះឆ្នោត។
ទី៥. ក្រុមប្រចាំបញ្ជានេះ ត្រូវបំពេញភារកិច្ចប្រចាំការប្តូរវេនវិលជុំ ចាប់ពីថ្ងៃទី០១ ខែកក្កដា ឆ្នាំ២០២៣ រហូតដល់ចប់បេសកកម្ម និងត្រូវបំពេញភារកិច្ចផ្សេងៗទៀត តាមការប្រគល់ជូនរបស់ប្រធានលេខាធិការដ្ឋាន នៃ គ.ស.អ៕