1. ប្រព័ន្ធផ្សព្វផ្សាយរដ្ឋអាល្លឺម៉ង់ថាអ៊ុយក្រែននឹងធ្វើកិច្ចចរចាសន្តិភាពផ្តើមពីខែកក្កដា
យោងតាមសារព័ត៌មាន RT ចុះផ្សាយថ្ងៃទី២៦ ខែមិថុនាបានអោយដឹងថា ទូរទស្សន៍រដ្ឋអាល្លឺម៉ង់ ARD បានអះអាងថាការចរចាសន្តិភាពលើជម្លោះអ៊ុយក្រែនអាចចាប់ផ្តើមនៅដើមខែក្រោយ។ យោងតាមប្រព័ន្ធផ្សព្វផ្សាយ មន្ត្រីជាន់ខ្ពស់មកពីមហាអំណាចពិភពលោកមួយចំនួនបានបើកកិច្ចប្រជុំកាលពីសប្តាហ៍មុននៅក្នុងរដ្ឋធានី Copenhagen របស់ប្រទេសដាណឺម៉ាក ដើម្បីពិភាក្សាអំពីបញ្ហានេះ។ ARD បានរាយការណ៍កាលពីថ្ងៃអាទិត្យថាទីប្រឹក្សាសន្តិសុខជាតិអាមេរិកលោក Jake Sullivan ស្ថិតក្នុងចំណោមឥស្សរជនដែលមានវត្តមាននៅក្នុងព្រឹត្តិការណ៍នេះ។ យោងតាមប្រព័ន្ធផ្សព្វផ្សាយ គោលបំណងសំខាន់នៃការជួបជុំនេះគឺដើម្បីទទួលបានការគាំទ្រពីប្រទេស "អព្យាក្រឹត" ដូចជាប្រទេសចិន ឥណ្ឌា ប្រេស៊ីល និងអាហ្វ្រិកខាងត្បូង។ ARD បានអះអាងថាកិច្ចប្រជុំថ្នាក់ខ្ពស់តំណាងឱ្យការបោះជំហានដ៏សំខាន់ឆ្ពោះទៅរកការចរចាសន្តិភាពជាក់ស្តែង។ ដោយលើកឡើងពីការិយាល័យទីក្រុងប្រ៊ុចសែលរបស់ខ្លួន ពួកគេបានបន្ថែមថា ការចរចាអាចនឹងចាប់ផ្តើមនៅដើមខែកក្កដា។គួរបញ្ជាក់ផងដែរថា ប្រេស៊ីល ឥណ្ឌា ចិន និងអាហ្រ្វិកខាងត្បូង សុទ្ធតែជាសមាជិក BRICS ដែលជាប្លុកសេដ្ឋកិច្ចដោយរាប់រុស្ស៊ីជាសមាជិកទីប្រាំរបស់ខ្លួន។ ពួកគេទាំងអស់បានបដិសេធការដាក់ទណ្ឌកម្មលើទីក្រុងមូស្គូជុំវិញសកម្មភាពរបស់ខ្លួនក្នុងអំឡុងពេលមានជម្លោះជាមួយអ៊ុយក្រែន។
2. អាល្លឺម៉ង់ត្រៀមខ្លួនដាក់ទ័ពជាអចិន្ត្រៃយ៍ក្នុងប្រទេសលីទុយអានី
យោងតាមសារព័ត៌មាន Reuters ចុះផ្សាយថ្ងៃទី២៦ ខែមិថុនាបានអោយដឹងថា រដ្ឋមន្ត្រីការពារជាតិអាល្លឺម៉ង់បាននិយាយកាលពីថ្ងៃចន្ទថា ទីក្រុងប៊ែរឡាំងបានត្រៀមខ្លួនជាស្រេចដើម្បីដាក់កងពលតូចទ័ពដែលមានកម្លាំងចំនួន4,000នាក់នៅក្នុងប្រទេសលីទុយអានីជាអចិន្ត្រៃយ៍តាមការសម្របសម្រួលជាមួយផែនការការពារជាតិរបស់អង្គការណាតូបន្ទាប់ពីការលុកលុយរបស់រុស្ស៊ីលើអ៊ុយក្រែន។ លោក Boris Pistorius បាននិយាយក្នុងកំឡុងដំណើរទស្សនកិច្ចទៅកាន់ទីក្រុង Vilnius កាលពីថ្ងៃចន្ទថា"ប្រទេសអាល្លឺម៉ង់ឈរដោយការប្តេជ្ញាចិត្តរបស់ខ្លួនក្នុងនាមជាសមាជិកណាតូ និងជាប្រទេសសេដ្ឋកិច្ចធំបំផុតរបស់អឺរ៉ុប ដើម្បីក្រោកឈរឡើងសម្រាប់ការការពារតំបន់ខាងកើត" ។ ទោះជាយ៉ាងណា លោកថា ហេដ្ឋារចនាសម្ព័ន្ធចាំបាច់ត្រូវតែមានជាមុន។ កាលពីមុន ទីក្រុងប៊ែរឡាំងបាននិយាយថាវានឹងត្រូវការពេលច្រើនឆ្នាំនៅប្រទេសលីទុយអានី ដើម្បីផ្តល់បន្ទាយ កន្លែងស្នាក់នៅ ឃ្លាំង និងកន្លែងហ្វឹកហាត់។ លោក Pistorius បាននិយាយថា"យើងយល់ព្រមថាកងពលតូចនឹងរីកដុះដាលពីមួយជំហានម្តងៗនៅពេលដែលហេដ្ឋារចនាសម្ព័ន្ធត្រូវបានបង្កើតឡើងរួចរាល់" ដោយបន្ថែមថាការដាក់ពង្រាយបែបនេះមិនអាចបញ្ចប់ក្នុងរយៈពេល "ពីរបីខែ" នោះទេ។
3. កំហុសដ៏ធំបំផុតរបស់ពូទីនក្នុងការបះបោររបស់ Wagner
យោងតាមសារព័ត៌មាន The Washington Post ចុះផ្សាយថ្ងៃទី២៦ ខែមិថុនាបានអោយដឹងថា ប្រធានាធិបតីរុស្ស៊ីលោកវ្ល៉ាឌីមៀពូទីនអាចប្រហែលជាបានរួចផុតពីការបះបោរនៅចុងសប្តាហ៍នេះដោយលោក Yevgeny Prigozhin និងក្រុមទាហានស៊ីឈ្នួល Wagner របស់លោក។ ប៉ុន្តែតាមរយៈការបញ្ចេញប្រតិកម្មដូចដែលលោកបានធ្វើនោះ លោក Putin មិនត្រឹមតែធ្វើឲ្យខ្លួនលោកកាន់តែទន់ខ្សោយប៉ុណ្ណោះទេ ប៉ុន្តែលោកថែមទាំងបានដាំចិត្តគំនិតភាពទន់ខ្សោយរបស់លោកនៅក្នុងផ្លូវចិត្តរបស់ប្រជាជនរុស្ស៊ី និងពិភពលោក។នៅក្នុងវីដេអូ Telegram ដែលលោក Prigozhin បានបង្ហោះនៅក្នុងការរឹបអូសយកតំបន់ Rostov របស់លោក ប្រធាន Wagner រូបនេះហាក់ដូចជាបានបំផ្លាញចោលនូវនិទានកថានៃការឃោសនាកន្លងមកទាំងមូលរបស់លោកពូទីនដូច្នេះឯងដែលលោកបានលក់ទៅកាន់ប្រជាជនរបស់លោកដើម្បីប្រជាប្រិយភាព។ នៅក្នុងការពិតដែលវង្វេងស្មារតីនោះ អាចបញ្ជាក់អោយឃើញថា រុស្ស៊ីមិនមែនជាអ្នកឈ្លានពានពិតប្រាកដនោះទេ ប៉ុន្តែជាជនរងគ្រោះទៅវិញ ដោយពួកគេពិតបានខិតខំការពារខ្លួនឯងប្រឆាំងនឹងពួកសាតាំងណាស៊ីនៅក្នុងប្រទេសអ៊ុយក្រែន និងម្ចាស់អាយ៉ង NATO នៅលោកខាងលិច។ តាមពិតទៅលោកPrigozhinបាននិយាយថា"អ្វីដែលហៅថាប្រតិបត្តិការពិសេសនោះត្រូវបានចាប់ផ្តើមឡើងដោយហេតុផលខុសគ្នាទាំងស្រុង" ដែលភាគច្រើនជាការលួចប្លន់។ លោកបានបន្ថែមថា ចាប់តាំងពីពេលនោះមក វាបានក្លាយទៅជា "រឿងកុនដែលលាតត្រដាងក្តីអាម៉ាស់"ដំណើរឡើងដោយមនុស្សរោគចិត្ត។ ការឃោសនារបស់វិមានក្រឹមឡាំងនឹងមិនដូចមុនទៀតទេ។
