ក្នុងឱកាសអញ្ជើញសំណេះសំណាល ជាមួយកម្មករ កម្មការិនី ជិត២ម៉ឺននាក់ នៅស្រុកជើងព្រៃ ខេត្តកំពង់ចាម សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាឱ្យកងកម្លាំងប្រដាប់អាវុធគ្រប់ប្រភេទ និងអាជ្ញាធរគ្រប់ខេត្តជាប់ព្រំដែនជាមួយប្រទេសវៀតណាម និងរឹតបន្តឹងចលនាក្រុមឧទ្ទាមប្រដាប់អាវុធ ដែលវាយប្រហារក្នុងប្រទេសវៀតណាម សម្លាប់មនុស្សយ៉ាងច្រើន ហើយដែលមានបំណងចូលមកជ្រកកោណនៅកម្ពុជា។ សម្តេចតេជោអះអាងថា កម្ពុជាមិនអនុញ្ញាតឱ្យនរណាម្នាក់ ឬក្រុមណាមួយយកទឹកដីកម្ពុជា បង្កើតចលនា ឬកម្លាំងប្រដាប់អាវុធ ដើម្បីវាយប្រហារលើប្រទេសណាមួយឡើយ។
បើតាមសម្តេចតេជោ មេដឹកនាំចលនាបង្កើតកងកម្លាំងឧទ្ទាមនោះ បានវាយប្រហារឃុំចំនួន២ និងសម្លាប់មនុស្សជាច្រើននៅប្រទេសវៀតណាម រយៈពេលប៉ុន្មានថ្ងៃថ្មីៗនេះ អាចមានមេដឹកនាំចលនាកំពុងនៅកម្ពុជា ដែលមិនខុសពីករណីជនជាតិម៉ុងតាញ៉ា ឬករណីបង្កើតឱ្យមានជនភៀសខ្លួននៅខេត្តរតនគីរី កាលពីពេលកន្លងទៅនោះទេ។ សម្តេចបានដាក់ការសង្ស័យថា មេជនឧទ្ទាមវាយប្រហារនៅវៀតណាម អាចកំពុងលាក់ខ្លួន ក្នុងប្រទេសកម្ពុជា។ ព្រោះមេរបស់ក្រុមឧទ្ទាមនេះ មិនអាចមកពីចិន ឬនៅក្នុងទឹកដីវៀតណាម ឬថៃនោះទេ។ ក្រុមនេះមានអង្គការចាត់តាំងមួយច្បាស់លាស់ ហើយអាចប្រើប្រាស់ទឹកដីកម្ពុជា សម្រាប់ធ្វើសកម្មភាព។
សម្តេចតេជោនាយករដ្ឋមន្ត្រី បានជំរុញឲ្យសមត្ថកិច្ចកាន់ផ្នែកសន្តិសុខជាតិ ត្រូវយកចិត្តទុកដាក់ខ្ពស់ ក្នុងការត្រួតពិនិត្យឲ្យបានច្បាស់ មិនត្រឹមតែខេត្តរតនគិរី និងមណ្ឌលគិរីទេ ខេត្តផ្សេងទៀតដូចជា ក្រចេះ ត្បូងឃ្មុំ ព្រវែង និងកំពង់ចាម ត្រូវតែមានវិធានការគ្រប់គ្រងអ្នកធ្វើដំណើរ ដោយសារពួកក្រុមឧទ្ទាមមានខ្សែរយៈរបស់គេ។ សម្តេចបង្ហាញនូវក្តីកង្វល់ថា ក្រុមឧទ្ទាមដែលវាយនៅវៀតណាម អាចនឹងជ្រកកោនក្រោមស្លាក HCR (អង្គការសិទ្ធិមនុស្ស) នៅទីក្រុងភ្នំពេញ។ សម្តេចប្រកាសបានប្រកាសព្រមានទុកជាមុន ចំពោះអង្គការអន្តរជាតិ ឬអន្តរជាតិ រួមទាំងជនជាតិខ្មែរ ដែលឃុបឃិតនាំក្រុមឧទ្ទាមចូលមកក្រុងភ្នំពេញ ហើយកម្ពុជាមិនអនុញ្ញាតជាដាច់ខាត ចំពោះការជ្រកកោនរបស់ក្រុមឧទ្ទាមបាក់ទ័ព ដែលរត់ពីវៀតណាមចូលកម្ពុជា។ នៅពេលកម្ពុជាចាប់បានត្រូវបញ្ជូនទៅកាន់វៀតណាមវិញភ្លាម។
សម្តេចតេជោ ហ៊ុន សែន បានឲ្យអាជ្ញាធរខេត្តរតនគិរី មណ្ឌលគិរី ត្រួតពិនិត្យតាមភូមិ ឲ្យបានជាក់លាក់ ប្រយ័ត្នពួកឧទ្ទាមបាក់ទ័ពមកដេកស៊ីបាយតាមភូមិ នៅទីនោះ ត្រូវធ្វើរឿងនេះឲ្យច្បាស់។ សម្តេចជឿថា បណ្តាញរបស់វាគឺ ចេញពីកម្ពុជា ដែលផ្គត់ផ្គង់សេវាកម្ម ចូលទៅក្នុងប្រទេសវៀតណាម ព្រោះរឿងនេះ វាធ្លាប់កើនមានពីមុនមកហើយ រឿងនេះជាស្ថានភាពធ្ងន់ធ្ងរ ដែលសម្តេចត្រូវតែបញ្ជាដាច់ខាត គឺអត់មានការលើកលែងទេ ហើយវិធានការនេះ មិនមែនជាការផ្គាប់ចិត្តវៀតណាមនោះឡើយ ទោះបីក្រុមភេរវកម្មនេះ មកពីស្រុកណា ក៏កម្ពុជាចាប់បញ្ជូនទៅវិញដែរ។
គួររំលឹកថា ថ្មីៗនេះសារព័ត៌មាន AFP បានចុះផ្សាយថា មានការវាយប្រហារទៅលើទីស្នាក់ការប៉ូលីសឃុំចំនួនពីរ គឺឃុំ Ea Tieu និង Ea Ktur នៃស្រុក Cu Kuin ខេត្ត Dak Lak បានកើតឡើងនៅព្រឹកព្រលឹមថ្ងៃអាទិត្យទី១១ ខែមិថុនា ឆ្នាំ២០២៣ បណ្តាលឲ្យមនុស្សជាច្រើននាក់រួមទាំងប៉ូលីស មន្ត្រីមូលដ្ឋាន និងជនស៊ីវិល ត្រូវបានសម្លាប់ និងរងរបួស។ មនុស្ស ៦នាក់ត្រូវបានចាប់ខ្លួន ពាក់ព័ន្ធនឹងការបាញ់ប្រហារនៅខេត្ត Dak Lak៕