1. ពូទីន ចំអកការខាតបង់នៃការវាយបករបស់អ៊ុយក្រែន
យោងតាមសារព័ត៌មាន Reuters ចុះផ្សាយថ្ងៃទី១៣ ខែមិថុនាបានអោយដឹងថាប្រធានាធិបតីវ្ល៉ាឌីមៀពូទីនបាននិយាយកាលពីថ្ងៃអង្គារថា ការចល័តបន្ថែមទៀតនឹងអាស្រ័យលើអ្វីដែលរុស្ស៊ីចង់សម្រេចបានក្នុងសង្គ្រាមនៅអ៊ុយក្រែន ដោយបន្ថែមថាលោកបានប្រឈមមុខនឹងសំណួរដែលមានត្រឹមតែលោកអាចឆ្លើយបានថា តើរុស្ស៊ីគួរតែព្យាយាមដណ្តើមយកទីក្រុងគៀវម្តងទៀតទេ? ទោះបីជាយ៉ាងណាក៏ដោយ មេដឹកនាំកំពូលរបស់រុស្ស៊ីមិនសូវមាននិយមន័យលើប្រធានបទនោះទេ ដោយនិយាយថា វាអាស្រ័យលើអ្វីដែលទីក្រុងម៉ូស្គូចង់សម្រេចបាន ហើយចង្អុលបង្ហាញថាឥស្សរជនសាធារណៈមួយចំនួនគ្រាន់តែគិតថារុស្ស៊ីត្រូវការទាហានក្នុងឯកសណ្ឋាន1 លាន ឬ 2 លាននាក់បន្ថែមទៀតប៉ុណ្ណោះ។ លោកពូទីនបាននិយាយថា "វាអាស្រ័យលើអ្វីដែលយើងចង់បាន" ។ ថ្វីបើឥឡូវនេះរុស្ស៊ីគ្រប់គ្រងប្រហែលបាន 18% នៃទឹកដីរបស់អ៊ុយក្រែនក៏ដោយ សង្រ្គាមបានគូសបញ្ជាក់អំពីកំហុសនៃកងកម្លាំងប្រដាប់អាវុធរុស្ស៊ីយ៉ាងខ្លាំងដែលបង្ហាញអោយឃើញថា រុស្ស៊ីមានការខ្វះខាតអាវុធដែលមានភាពជាក់លាក់ខ្ពស់ និងឧបករណ៍ទំនាក់ទំនងដ៏ស្មុគស្មាញ។
2. ការដួលរលំនៃរថពាសដែកអាមេរិកក្នុងកណ្តាប់ដៃកងទ័ពរុស្ស៊ី
យោងតាមសារព័ត៌មាន Wall Street Journal ចុះផ្សាយថ្ងៃទី១៣ ខែមិថុនាបានអោយដឹងថា រដ្ឋបាល Biden ត្រៀមខ្លួនជាស្រេចក្នុងការអនុម័តការដឹកជញ្ជូនគ្រាប់រំសេវសំណល់អ៊ុយរ៉ាញ៉ូមសម្រាប់រថក្រោះ Abrams ទៅកាន់អ៊ុយក្រែន។ យោងតាមរបាយការណ៍សេតវិមានបានយល់ព្រមអនុម័តលើការដឹកជញ្ជូនគ្រាប់រំសេវបន្ទាប់ពីមានការជជែកដេញដោលគ្នាជាបន្តបន្ទាប់ ដើម្បីសម្រេចថាគ្រាប់រំសេវណាដែលគួរផ្គត់ផ្គង់ជាមួយរថក្រោះ ដែលអាមេរិកនឹងបញ្ជូនទៅកាន់អ៊ុយក្រែន។ កាសែត Wall Street Journal កត់សំគាល់ថា មន្ទីរបញ្ចកោណទទូចឱ្យមានការបញ្ជូនគ្រាប់រំសេវសំណល់អ៊ុយរ៉ាញ៉ូមជាពិសេសដោយសារតែប្រសិទ្ធភាពកើនឡើងរបស់ពួកវា។ មន្ត្រីរដ្ឋបាលនិយាយថាការកើនឡើងនៃការដឹកជញ្ជូនសព្វាវុធមានគោលបំណងជួយអ៊ុយក្រែនឱ្យសម្រេចបាននូវវឌ្ឍនភាពនៅលើសមរភូមិដើម្បីពង្រឹងជំហរចរចារបស់ទីក្រុងគៀវក្នុងករណីមានកិច្ចចរចាសន្តិភាព។ យ៉ាងណាមិញការស្រាវជ្រាវបានបង្ហាញថាធូលីអ៊ុយរ៉ាញ៉ូមដែលមានសារធាតុពុលនិងវិទ្យុសកម្មដែលលេចឡើងនៅពេលដែលគ្រាប់រំសេវបែបនេះត្រូវបានផ្ទុះអាចបង្កគ្រោះថ្នាក់ដល់សុខភាពរបស់អ្នកណាម្នាក់ដែលស្រូបវាផងដែរ។
3. គ្រឿងបន្លាស់ចិនជួយអ៊ីរ៉ង់ផ្គត់ផ្គង់ដ្រូនដល់រុស្ស៊ីយ៉ាងឆាប់រហ័ស
យោងតាមសារព័ត៌មាន Wall Street Journal ចុះផ្សាយថ្ងៃទី១២ ខែមិថុនាបានអោយដឹងថា ដ្រូនរបស់អ៊ីរ៉ង់ដែលបាញ់ទម្លាក់ដោយកងកម្លាំងអ៊ុយក្រែន មានផ្ទុកនូវគ្រឿងបន្លាស់របស់ចិន ដែលត្រូវបានផលិត និងបញ្ជូនទៅកាន់កងកម្លាំងរុស្ស៊ីក្នុងរយៈពេលបីខែ។ វត្តមាននៃគ្រឿងបន្លាស់នេះបង្ហាញពីការផ្គត់ផ្គង់បន្តពីប្រទេសចិនទៅកាន់ប្រទេសអ៊ីរ៉ង់ ដែលបង្ហាញពីលំហូរបន្តនៃសមាសធាតុសំខាន់ៗសម្រាប់កម្មវិធីផលិតដ្រូនរបស់អ៊ីរ៉ង់ បើទោះបីជាកិច្ចខិតខំប្រឹងប្រែងរបស់សហរដ្ឋអាមេរិកក្នុងការរំខានដល់ខ្សែសង្វាក់ផ្គត់ផ្គង់នៅទូទាំងពិភពលោកក៏ដោយ។ ក្រុមអ្នកស៊ើបអង្កេតមកពី Conflict Armament Research ដែលជាក្រុមដែលមានមូលដ្ឋាននៅចក្រភពអង់គ្លេសដែលតាមដានខ្សែសង្វាក់ផ្គត់ផ្គង់សព្វាវុធសកលបានរកឃើញថាដ្រូនមានឧបករណ៍បំប្លែងវ៉ុលដែលគេជឿថាត្រូវបានផលិតនៅក្នុងប្រទេសចិននៅពាក់កណ្តាលខែមករាឆ្នាំ2023។ នេះជាករណីដំបូងក្នុងឆ្នាំ2023 ដែលសមាសធាតុបែបនេះត្រូវបានរកឃើញនៅក្នុងដ្រូនទាំងនេះ ដែលបង្ហាញពីរបៀបដែលអ៊ីរ៉ង់អាចសាងសង់ និងបញ្ជូនដ្រូនកទៅកាន់ប្រទេសរុស្ស៊ីបានយ៉ាងឆាប់រហ័ស។ សមាសធាតុរបស់ចិនមួយនេះត្រូវបានផលិតឡើងក្នុងខែមករា និងត្រូវបានដឹកជញ្ជូនទៅកាន់ប្រទេសអ៊ីរ៉ង់ និងត្រូវបានប្រើប្រាស់ចុងក្រោយដើម្បីប្រឆាំងនឹងអ៊ុយក្រែននៅក្នុងខែមេសាផងដែរ។ ការរកឃើញផ្នែកគ្រឿងបន្លាស់ចិនឆ្នាំ 2023 នេះគឺមាននៅក្នុងដ្រូនរាងអក្សរ V ភាគច្រើនដែលត្រូវបានគេស្គាល់ថាជា Shahed-136 ដែលក្លាយជាបញ្ហាប្រឈមដែលសហរដ្ឋអាមេរិក និងសម្ព័ន្ធមិត្តព្យាយាមទប់ស្កាត់លំហូរនៃសមាសធាតុទាំងនេះនៅជុំវិញពិភពលោកទៅកាន់រោងចក្រដ្រូនរបស់អ៊ីរ៉ង់។
