1. អ៊ុយក្រែនបើកការវាយបកប្រឆាំងនឹងរុស្ស៊ី
យោងតាមសារព័ត៌មាន The Washington Post ចុះផ្សាយថ្ងៃទី៩ ខែមិថុនាបានអោយដឹងថា យោធាអ៊ុយក្រែនបានចាប់ផ្តើមការវាយបកប្រឆាំងនឹងកងកម្លាំងរុស្ស៊ីហើយ ដោយទាហានអ៊ុយក្រែនបានបង្កើនការវាយលុករបស់ពួកគេទៅលើទីតាំងជួរមុខស្ថិតនៅតំបន់ភាគអាគ្នេយ៍នៃប្រទេសនេះ។ រដ្ឋមន្ត្រីការពារជាតិរុស្ស៊ី លោក Sergei Shoigu បាននិយាយថា កងកម្លាំងអ៊ុយក្រែន បានព្យាយាមទម្លុះខ្សែការពារកងទ័ពរុស្ស៊ី នៅក្នុងតំបន់ Zaporizhzhia ដោយប្រើកងទ័ពរហូតទៅដល់ ១៥០០នាក់ និងរថពាសដែក ១៥០ គ្រឿង។ គួរបញ្ជាក់ផងដែរថា ការឈ្លានពានរបស់រុស្ស៊ីលើអ៊ុយក្រែនបានចាប់ផ្តើមនៅថ្ងៃទី 24 ខែកុម្ភៈឆ្នាំ 2022 ជាមួយនឹងការវាយប្រហារយ៉ាងឆាប់រហ័សរបស់រុស្ស៊ីទៅលើទីក្រុង Kyiv និងនៅភាគខាងកើត។ ឈានចូលមកដល់រដូវផ្ការីក កងទ័ពរុស្ស៊ីបានដកថយពីរាជធានី ហើយផ្តោតការខិតខំប្រឹងប្រែងរបស់ពួកគេឡើងវិញនៅភាគខាងត្បូង និងខាងកើត។ ការវាយបកដំបូងរបស់អ៊ុយក្រែនគឺនៅរដូវស្លឹកឈើជ្រុះ ដោយដណ្តើមបានទឹកដីជុំវិញ តំបន់ Kherson និងKupiansk។ ចាប់តាំងពីពេលនោះមក ភាគីទាំងពីរបានប្រយុទ្ធគ្នាយ៉ាងស្វិតស្វាញ ដើម្បីទទួលបានផលប្រយោជន៍ជាបន្តបន្ទាប់ជុំវិញទីក្រុង Bakhmut ដែលត្រូវបានបំផ្លិចបំផ្លាញខូចខាត និងទីកន្លែងផ្សេងទៀត។ កត់សម្គាល់ថាទាំងសងខាងមិនបានដំណើរការចូលវិវឌ្ឍន៍លើទឹកដីដ៏សំខាន់ណាមួយឡើយ។
2. គុយបានឹងដាក់មូលដ្ឋានស្ថានីយចារកម្មចិនផ្តោតលើអាមេរិក
យោងតាមសារព័ត៌មាន The Guardian ចុះផ្សាយថ្ងៃទី៨ ខែមិថុនាបានអោយដឹងថា កាសែត Wall Street Journal បានរាយការណ៍ថាប្រទេសចិនបានឈានដល់កិច្ចព្រមព្រៀងសម្ងាត់ជាមួយគុយបាដើម្បីបង្កើតមូលដ្ឋានស្ថានីយឈ្លបស្តាប់អេឡិចត្រូនិចនៅលើកោះដែលមានចម្ងាយប្រហែល160 គីឡូម៉ែត្រពីរដ្ឋផ្លរីដា ប៉ុន្តែរដ្ឋាភិបាលសហរដ្ឋអាមេរិក និងគុយបាបានចោលការសង្ស័យយ៉ាងខ្លាំងលើរបាយការណ៍នេះ។ កាសែតនេះបានរាយការណ៍ថាការដំឡើងចារកម្មបែបនេះនឹងអនុញ្ញាតឱ្យទីក្រុងប៉េកាំងប្រមូលបានទិន្នន័យបណ្តាញទំនាក់ទំនងអេឡិចត្រូនិកពីតំបន់ភាគអាគ្នេយ៍នៃសហរដ្ឋអាមេរិក ដែលមានមូលដ្ឋានទ័ពអាមេរិកជាច្រើន ក៏ដូចជាដើម្បីតាមដានចរាចរណ៍កប៉ាល់ផងដែរ។ លោក John Kirby អ្នកនាំពាក្យក្រុមប្រឹក្សាសន្តិសុខជាតិសេតវិមានបានលើកឡើងថា“យើងបានឃើញរបាយការណ៍នេះហើយ វាមិនជាក់លាក់នោះទេ”។ លោកបាននិយាយថា សហរដ្ឋអាមេរិកមាន"ក្តីបារម្ភ"អំពីទំនាក់ទំនងរបស់ចិនជាមួយគុយបានេះ ហើយក៏បានកំពុងតាមដានយ៉ាងដិតដល់រហូតមក។ គួរបញ្ជាក់ផងដែរថា វិបត្តិមីស៊ីលនៅគុយបាក្នុងឆ្នាំ១៩៦២បានចាប់ផ្តើមបន្ទាប់ពីក្រុងមូស្គូចបានដាក់អាវុធនុយក្លេអ៊ែររបស់ពួកគេនៅលើកោះមួយនេះ។ ថ្វីបើមីស៊ីលនេះត្រូវបានដកចេញទាន់ពេលវេលា តែវាក៏ជាដំណាក់កាលចាប់ផ្តើមដែលធ្វើអោយសហរដ្ឋអាមេរិក និងសហភាពសូវៀត ខិតជិតបំផុតក្នុងការប្រឈមមុខដាក់គ្នានឹងប្រើប្រាស់នុយក្លេអ៊ែ។
3. រុស្ស៊ីអាចកំណត់គោលដៅលើរោងចក្រនុយក្លេអ៊ែរបន្ទាប់ពីការវាយប្រហារទំនប់ទឹក
យោងតាមសារព័ត៌មាន The Times ចុះផ្សាយថ្ងៃទី៦ ខែមិថុនាបានអោយដឹងថា អ៊ុយក្រែនបានព្រមានបន្ទាប់ពីខ្លួនបានចោទប្រកាន់វិមានក្រឹមឡាំងថាបានបំផ្ទុះទំនប់ទឹកដើម្បីបញ្ជូនទឹកជោរជន់ធ្លាក់ចូលទៅក្នុងសមុទ្រខ្មៅថារុស្ស៊ីអាចនឹងកំនត់គោលដៅវាយប្រហារបន្ទាប់លើរោងចក្រនុយក្លេអ៊ែរ Zaporizhzhia ផងដែរ។ លោក Oleksiy Danilov មន្ត្រីសន្តិសុខកំពូលរបស់ប្រធានាធិបតីលោក Zelensky បានប្រាប់កាសែត The Times ថា"ពិភពលោកទាំងមូល"គួរតែមានការព្រួយបារម្ភចំពោះសកម្មភាពដែលទីក្រុងម៉ូស្គូធ្វើដោយគ្មានការប្រុងប្រយ័ត្ន ដោយហៅការបំផ្លិចបំផ្លាញលើស្ថានីយ៍វារីអគ្គីសនីនេះថាជា "ដំណាក់កាលថ្មីជាមូលដ្ឋាននៃការឈ្លានពានរបស់រុស្ស៊ី" ។ លោក Danilov បាននិយាយបន្ទាប់ពីកិច្ចប្រជុំបន្ទាន់នៃក្រុមប្រឹក្សាសន្តិសុខជាតិរបស់អ៊ុយក្រែនថា "វាគឺជាការពិតដែលអាចមានគ្រឿងផ្ទុះនៅឯរោងចក្រ Zaporizhzhia។ ចាប់តាំងពីលោកពូទីនអាចបង្កអោយរោងចក្រវារីអគ្គិសនីផ្ទុះឡើងបានតាមការទាមទាររបស់លោកហើយ បានសេចក្តីថាលោកបានត្រៀមខ្លួនធ្វើអ្វីៗគ្រប់យ៉ាង។
