រាជរដ្ឋាភិបាលកម្ពុជា បានផ្តល់ជំនួយមនុស្សធម៌នូវទឹកប្រាក់ចំនួន៣០ម៉ឺនដុល្លារអាមេរិក ដើម្បីជួយគាំទ្រដល់កិច្ចខិតខំប្រឹងប្រែងរបស់មីយ៉ាន់ម៉ា ក្នុងការដោះស្រាយផលប៉ះពាល់នៃគ្រោះមហន្តរាយព្យុះស៊ីក្លូនម៉ូឆា នាពេលថ្មីៗនេះ ដែលបានបង្កនូវសោកនាដកម្មបាត់បង់អាយុជីវិតមនុស្សរាប់រយនាក់ ព្រមទាំងការខូចខាតទ្រព្យសម្បត្តិ និងហេដ្ឋារចនាសម្ព័ន្ធ នៅក្នុងរដ្ឋរ៉ាក់ខាញ ប្រទេសមីយ៉ាន់ម៉ា។
ពិធីប្រគល់ និងទទួលជំនួយនេះ បានធ្វើនៅព្រឹកថ្ងៃទី០២ ខែមិថុនា ឆ្នាំ២០២៣នេះ នៅទីស្តីការក្រសួងការបរទេសកម្ពុជា ក្រោមវត្តមានលោក អ៊ូ ធីត លីញអូន ឯកអគ្គរដ្ឋទូតនៃសាធារណរដ្ឋសហភាពមីយ៉ាន់ម៉ាប្រចាំកម្ពុជា និងលោកបណ្ឌិត ញឹម ខេមរា រដ្ឋលេខាធិការនៃក្រសួងការបរទេស និងសហប្រតិបត្តិការអន្តរជាតិកម្ពុជា។ ថ្លែងនៅក្នុងពិធីនោះ លោកបណ្ឌិត ញឹម ខេមរា បានចូលរួមរំលែកទុក្ខយ៉ាងជ្រាលជ្រៅបំផុតចំពោះផលប៉ះពាល់យ៉ាងធ្ងន់ធ្ងរដល់អាយុជីវិត និងទ្រព្យសម្បត្តិរបស់ប្រជាជនមីយ៉ាន់ម៉ា ហើយសង្ឃឹមថា មីយ៉ាន់ម៉ា នឹងអាចជម្នះស្ថានភាពដ៏លំបាកនេះ បានឆាប់រហ័ស។ លោកបន្តថា កាយវិការសប្បុរសធម៌ខាងលើឆ្លុះបញ្ចាំងពីគុណតម្លៃនៃមនុស្សជាតិ ព្រមទាំងចំណងមិត្តភាព និងសាមគ្គីភាពរបស់កម្ពុជា ជាមួយសាធារណរដ្ឋសហភាពមីយ៉ាន់ម៉ា ដែលកំពុងស្ថិតក្នុងស្ថានភាពដ៏លំបាកសំដៅរួមចំណែកជួយសម្រួលដល់ដំណើរការស្តាប្រទេសឡើងវិញ។ សូមបញ្ជាក់ថា កាលពីពាក់កណ្តាលខែឧសភាកន្លងទៅ ប្រទេសមីយ៉ាន់ម៉ា បានទទួលរងគ្រោះមហន្តរាយព្យុះស៊ីក្លូន Mocha ដែលធ្វើឲ្យមនុស្សស្លាប់ និងរបួសយ៉ាងច្រើន ហើយបានបំផ្លាញទ្រព្យសម្បត្តិ និងហេដ្ឋារចនាសម្ព័ន្ធយ៉ាងធ្ងន់ធ្ងរ។ គិតត្រឹមថ្ងៃទី២០ ខែឧសភា ឆ្នាំ២០២៣ ចំនួនអ្នកស្លាប់បានកើនឡើងដល់ជាង១៤០នាក់ នេះបើតាមការផ្សាយរបស់ក្រុមការងារព័ត៌មាននៃក្រុមប្រឹក្សារដ្ឋបាលរដ្ឋមីយ៉ាន់ម៉ា ហៅកាត់ថា (SAC)។ របាយការណ៏ របស់ក្រុមប្រឹក្សារដ្ឋបាលរដ្ឋមីយ៉ាន់ម៉ាបានឲ្យដឹងថា ព្យុះស៊ីក្លូន Mocha បានបំផ្លាញផ្ទះចំនួន១៨៣.០២៤ខ្នង អគារសាសនាចំនួន១.៧១១ខ្នង វត្តចំនួន៥៩ សាលារៀនចំនួន១.៣៩៧ មន្ទីរពេទ្យ ឬគ្លីនិកចំនួន២២៧កន្លែង អគារទូរគមនាគមន៍ចំនួន១១ បង្គោលភ្លើងចំនួន១១៩ដើម អាកាសយានដ្ឋានចំនួន២ និងអគារមន្ទីរចំនួន៣៤០។ ផ្ទាំងពាណិជ្ជកម្មតំបន់ និងរដ្ឋដែលរងការវាយប្រហារដោយព្យុះ Mocha រួមមាន៖ រ៉ាឃីន អៃយ៉ារវ៉ាឌី បាហ្គោ រ៉ងហ្គូន ម៉ាវ៉េ សាយហ្គាង ឈិន ម៉ាន់ដាឡៃ ម៉ន សាន និងតំបន់ក្រុមប្រឹក្សាណៃពិដោរផងដែរ៕