ភ្នំពេញ៖ កិច្ចព្រមព្រៀងសហការ បណ្តាក់ទុនរួមគ្នា បង្កើតស្ថានីយថែទាំ និងជួសជុលយន្តហោះ ប្រចាំថ្នាក់តំបន់ ក្នុងអាកាសយានដ្ឋានអន្តរជាតិតេជោ ត្រូវបានធ្វើឡើងនៅថ្ងៃទី៣០ ខែឧសភា ឆ្នាំ២០២៣ រវាងក្រុមហ៊ុនសាងសាងអាកាសយានដ្ឋានអន្តរជាតិតេជោ Cambodia Airport Investment Co., Ltd. (CAIC) និងក្រុមហ៊ុនសិង្ហបុរី SIA Engineering Company Limited (SIAEC)។

នៅក្នុងកិច្ចព្រមព្រៀងបណ្តាក់ទុនរួមគ្នានេះ ត្រូវបានក្រុមហ៊ុនលើកឡើងថា នឹងបង្កើតឲ្យមានសេវាកម្ម line maintenance ដោយចាប់ផ្តើមពីធន់ស្រាល នៅក្នុងអាកាសយានដ្ឋានអន្តរជាតិតេជោ ដែលគ្រោងចាប់ដំណើរការនៅ ដើមឆ្នាំ២០២៥ ខាងមុខ។

អ្នកឧកញ៉ា ពុង ឃាវសែ អគ្គនាយកក្រុមហ៊ុន CAIC បានថ្លែងថា ក្រុមហ៊ុនបណ្តាក់ទុនរួមគ្នានេះ នឹងផ្តល់សារសំខាន់ ដល់ភាពជោគជ័យយូរអង្វែង ក៏ដូចជាផ្តល់ឱកាសការងារសំខាន់ៗ ដល់ទីផ្សារពលកម្មកម្ពុជា កាន់តែច្រើន។

ចំណែកអគ្គនាយកក្រុមហ៊ុន SIAEC លោក Ng Chin Hwee បានថ្លែងថា ការអភិវឌ្ឍនៃសេដ្ឋកិច្ច-សង្គមកម្ពុជា ក្នុងរយៈពេលចុងក្រោយនេះ ទើបធ្វើឲ្យក្រុមហ៊ុនលោក ចាប់អារម្មណ៍ក្នុងការបើកស្ថានីយថែទាំ និងជួលជុលយន្តហោះ នៅកម្ពុជា។

លោក Ng Chin Hwee បានបន្តថា ក្រុមហ៊ុន SIAEC មានបទពិសោធន៍ ផ្តល់សេវាថែទាំ និងជួលជុលយន្តហោះ នៅអាកាសយានដ្ឋានអន្តរជាតិ Changi របស់សិង្ហបុរី និងនៅអាកាសយានដ្ឋានផ្សេងទៀត នៅលើពិភពលោក ដោយជំនាញច្បាស់លាស់តាមស្តង់ដារអន្តរជាតិ៕