រដ្ឋបាលរាជធានីភ្នំពេញ នឹងរៀបចំពិធីសម្ពោធដាក់ឲ្យប្រើប្រាស់ស្ពានបេតុងខ្សែកាប ឆ្លងទន្លេ និងស្ពានអាកាសឫស្សីកែវ ស្ថិតក្នុងខ័ណ្ឌឫស្សីកែវ នៅថ្ងៃទី៣១ ខែឩសភា ខាងមុខនេះហើយ ក្រោមអធិបតីភាពសម្ដេចនាយករដ្ឋមន្ត្រី នេះបើតាមការឲ្យដឹងពីរដ្ឋបាលរាជធានីភ្នំពេញ។
រដ្ឋបាលរាជធានីភ្នំពេញបានឲ្យដឹងនៅថ្ងៃទី២៩ ខែឧសភា នេះថា រដ្ឋបាលរាជធានីភ្នំពេញ នឹងរៀបចំពិធីសម្ភោធដាក់ឲ្យប្រើប្រាស់ស្ពានបេតុងខ្សែកាបឆ្លងទន្លេ និងស្ពានអាកាសឫស្សីកែវ ស្ថិតក្នុងខ័ណ្ឌឫស្សីកែវ នៅថ្ងៃទី៣១ ខែឧសភា ឆ្នាំ២០២៣ ខាងមុខ ក្រោមអធិបតីភាព សម្ដេចសេនាបតីតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា។ ដើម្បីបញ្ចៀសនូវការកកស្ទះចរាចរណ៍ រដ្ឋបាលរាជធានីភ្នំពេញនឹងធ្វើការផ្អាកចរាចរណ៍ជាបណ្ដោះអាសន្ន នូវយាន្ដយន្ដគ្រប់ប្រភេទ ដែលដំណើរការឆ្លងកាត់ស្ពានបេតុងខ្សែកាបឆ្លងទន្លេសាប និងជុំវិញទីតាំងប្រារព្ធពិធីចាប់ពីវេលាម៉ោង១៤ និង០០ នាទីរសៀលនាថ្ងៃទី៣០ ខែឧសភា ឆ្នាំ២០២៣តទៅរហូតចប់កម្មវិធី។
ក្រសួងសាធារណៈការបានឲ្យដឹងថា ស្ពានបេតុងខ្សែកាបខាងលើនេះតម្លៃ ៣៥លានដុល្លារ។ ស្ពាននេះមានទទឹង២០.៥ម៉ែត្រ និងបណ្តោយប្រវែង៦៤២ម៉ែត្រ មានសសរទាញខ្សែកាបចំនួន៤ទៀត មានកំពស់ ៤០ ម៉ែត្រធៀបនឹងកម្រាលស្ពាន។ គន្លងធ្វើចរាចរ២ខ្សែទៅ និង២ខ្សែមក, កម្ពស់នាវាចរ ក្រោមស្ពានអតិបរមានៅរដូវវស្សា១០,៥ម៉ែត្រ, កម្ពស់នាវាចរក្រោមស្ពានអប្បរមា នៅរដូវប្រាំង២០,៥ ម៉ែត្រ បំពាក់បង្គោលភ្លើងបំភ្លឺ និងដាក់ស្លាកសញ្ញាចរាចរ។ ស្ពាននេះសាងសង់ ដោយ ក្រុមហ៊ុន OCIC ដោយប្រើរយៈពេលវេលា២៨ខែ។
ក្រោយការស្ថាបនារួច ស្ពានបេតុងខ្សែកាបនេះ នឹងបង្កើតលំហូរចរាចរថ្មី តភ្ជាប់ពីផ្លូវជាតិលេខ៥ នៃខណ្ឌឫស្សីកែវ និងផ្លូវជាតិលេខ៦ នៃខណ្ឌជ្រោយចង្វារ ហើយក៏ជាការបង្កើតផ្លូវថ្មីតភ្ជាប់ចរាចរក្នុងទីក្រុងទៅពហុកីឡដ្ឋានជាតិមរតកតេជោផងដែរ។
ដោយឡែកស្ពានអាកាសឫស្សីកែវ បានបើកការដ្ឋានស្ថាបនាកាលពីថ្ងៃទី៣១ ខែមករា ឆ្នាំ២០២២ មានបណ្ដោយ៤៨៣ម៉ែត្រ ទទឹង១៥.៨ម៉ែត្រ កម្ពស់៥ម៉ែត្រ ដោយហោះនៅលើបណ្ដោយផ្លូវជាតិលេខ៥។ ស្ពានអាកាសថ្មីនេះ សាងសង់ដោយក្រុមហ៊ុនវិនិយោគទុនអាណិកជនកម្ពុជា (OCIC) គងពីលើបណ្ដោយផ្លូវជាតិលេខ៥ រយៈពេលសាងសង់១៥ខែ៕
