នៅព្រឹកថ្ងៃទី២៩ ខែឧសភា ឆ្នាំ២០២៣នេះ គណៈកម្មាធិការជាតិរៀបចំការបោះឆ្នោត (គ.ជ.ប) បានរៀបចំចាប់ឆ្នោត ដើម្បីកំណត់លំដាប់លេខរៀងគណបក្សនយោបាយឈរឈ្មោះបោះឆ្នោតលើសន្លឹកឆ្នោត សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣។
សម្រាប់ការចាប់សន្លឹកឆ្នោតលំដាប់លេខរៀងគណបក្សនយោបាយនេះ ធ្វើឡើងក្រោមព្រះវត្តមានសម្តេចសង្ឃរាជទាំងពីរគណៈ ព្រមទាំងមានការចូលរួមពីសំណាក់តំណាងគណបក្សនយោបាយទាំង១៨ ដែលបានចុះបញ្ជីនៅ គ.ជ.ប ។ ហើយជាលទ្ធផល គណបក្សសំបុកឃ្មុំសង្គមប្រជាធិបតេយ្យ ជាប់លំដាប់លេខរៀងទី១ ចំណែកគណបក្សប្រជាជនកម្ពុជាទទួលបានលេខរៀងទី១៨ ដែលជាលេខចុងក្រោយគេបង្អស់។
សូមបញ្ជាក់ថា គណបក្សនយោបាយដែលទទួលបានសិទ្ធិក្នុងការចូលរួមក្នុងការបោះឆ្នោតជ្រើសតាំងតំណាងរាស្រ្តនីតិកាលទី៧ ថ្ងៃទី២៣ ខែកក្កដា ឆ្នាំ២០២៣ខាងមុខ មានចំនួន១៨គណបក្សគឺ៖ គណបក្សប្រជាជនកម្ពុជា, គណបក្សយុវជនកម្ពុជា, គណបក្សខ្មែររួបរួមជាតិ, គណបក្សធម្មាធិបតេយ្យ, គណបក្សកម្លាំងប្រជាធិបតេយ្យ, គណបក្សសញ្ជាតិកម្ពុជា, គណបក្សខ្មែរតែមួយ, គណបក្សខ្មែរអភិរក្ស, គណបក្សហ៊្វុនស៊ិនប៉ិច, គណបក្សសំបុកឃ្មុំសង្គមប្រជាធិបតេយ្យ, គណបក្សបំណងពលរដ្ឋ, គណបក្សឯកភាពជាតិខ្មែរ, គណបក្សស្ត្រី ដើម្បីស្ត្រី, គណបក្សខ្មែរឈប់ក្រ, គណបក្សខ្មែរអភិវឌ្ឍន៍សេដ្ឋកិច្ច, គណបក្សជនជាតិដើមប្រជាធិបតេយ្យកម្ពុជា,គណបក្សប្រជាធិបតេយ្យមូលដ្ឋាន និងគណបក្សកសិករ។
លទ្ធផលសម្រាប់ការចាប់ឆ្នោតលំដាប់លេខរៀងគណបក្សនយោបាយសម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៧ មានដូចខាងក្រោម៖ ទី១, គណបក្សសំបុកឃ្មុំសង្គមប្រជាធិបតេយ្យ ទី២, គណបក្សខ្មែរតែមួយ ទី៣, គណបក្សសញ្ជាតិកម្ពុជា ទី៤, គណបក្សខ្មែររួបរួមជាតិ ទី៥, កម្លាំងប្រជាធិបតេយ្យ ទី៦, គណបក្សកសិករ ទី៧, គណបក្សស្រ្តីដើម្បីស្ត្រី
ទី៨, គណបក្សខ្មែរឈប់ក្រ ទី៩, គណបក្សហ្វ៊ុនស៊ិនប៉ិច ទី១០, គណបក្សធម្មាធិបតេយ្យ ទី១១, គណបក្សប្រជាធិបតេយ្យមូលដ្ឋាន ទី១២, គណបក្សបំណងប្រជាពលរដ្ឋ ទី១៣, គណបក្សខ្មែរអភិវឌ្ឍន៍សេដ្ឋកិច្ច ទី១៤, គណបក្សឯកភាពជាតិខ្មែរ ទី១៥, គណបក្សខ្មែរអភិរក្ស ទី១៦, គណបក្សយុវជនកម្ពុជា ទី១៧, គណបក្សជនជាតិដើមប្រជាធិបេតយ្យ និងទី១៨, គណបក្សប្រជាជនកម្ពុជា។
គួររំលឹកថា កិច្ចព្រមព្រៀងសន្តិភាពទីក្រុងប៉ារីស នាថ្ងៃទី២៣ ខែតុលា ឆ្នាំ១៩៩១ ដែលតម្រូវឱ្យកម្ពុជារៀបចំការបោះឆ្នោតជាសកល ដោយសេរី និងយុត្តិធម៌ ដើម្បីបញ្ចប់ជម្លោះបង្កើតស្ថាប័នគ្រប់គ្រងប្រទេស និងកសាងនីតិរដ្ឋនោះ កម្ពុជាបានរៀបចំបោះឆ្នោតជាទៀងទាត់រៀងរាល់៥ឆ្នាំម្តង ហើយគិតមកដល់ឆ្នាំ២០២៣នេះ មានចំនួន៧លើកមកហើយ។ ក្នុងនោះ អាណត្តិទី១៖ គឺបោះឆ្នោតនៅថ្ងៃទី២៣ ខែឧសភា ឆ្នាំ១៩៩៣, អាណត្តិទី២៖ បោះឆ្នោតនៅថ្ងៃទី២៦ ខែកក្កដា ឆ្នាំ១៩៩៨, អាណត្តិទី៣៖ បោះឆ្នោតនៅថ្ងៃទី២៧ ខែកក្កដា ឆ្នាំ២០០៣, អាណត្តិទី៤៖ បោះឆ្នោតនៅថ្ងៃទី២៧ ខែកក្កដា ឆ្នាំ២០០៨, អាណត្តិទី៥៖ បោះឆ្នោតនៅថ្ងៃទី២៨ ខែកក្កដា ឆ្នាំ២០១៣, អាណត្តិទី៦៖ បោះឆ្នោតនៅថ្ងៃទី២៩ ខែកក្កដា ឆ្នាំ២០១៨ ហើយអាណត្តិទី៧ នឹងធ្វើឡើងនៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ៕
