ភ្នំពេញ៖ ថវិកាប្រមាណ១៣លានដុល្លារសហរដ្ឋអាម៉េរិក នឹងត្រូវបានរាជរដ្ឋាភិបាលកម្ពុជា បង្កើនឡើងដើម្បីជួយដល់ស្រ្តីមានផ្ទៃពោះដែលជាកម្មការិនីនៅវិស័យសេដ្ឋកិច្ចក្នុងប្រព័ន្ធក្នុងបំណងធានាឱ្យមាតា និងកូនមានសុខភាពល្អ។ សម្ដេចតេជោ ហ៊ុន សែន នាយករដ្ឋមន្រ្តីកម្ពុជា បានមានប្រសាសន៍ក្នុងពិធីសំណេះសំណាលជាមួយកម្មករនិយោជិត ក្នុងតំបន់ សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ នាព្រឹកថ្ងៃទី២៦ ខែឧសភា ឆ្នាំ២០២៣ នេះថា ចាប់ពីខែសីហា ឆ្នាំ២០២៣នេះតទៅ រាជរដ្ឋាភិបាលនឹងចាប់ផ្ដើមអនុវត្តកម្មវិធីឧបត្ថម្ភសាច់ប្រាក់ជូនស្រ្តីមានផ្ទៃពោះ រហូតដល់កូនអាយុ២ឆ្នាំ សម្រាប់កម្មការិនីនៅក្នុងសេដ្ឋកិច្ចក្នុងប្រព័ន្ធបន្ថែមទៀត។ សម្ដេចតេជោ នាយករដ្ឋមន្រ្តីកម្ពុជា បានមានប្រសាសន៍លើកឡើងថា រាជរដ្ឋាភិបាល បានបង្កើនឡើងនូវថវិកាប្រមាណ១៣លានដុល្លារបន្ថែមទៀតក្នុង១ឆ្នាំទៅលើថវិកាចាស់ដែលត្រូវចំណាយ។ នៅក្នុងកម្មវិធីឧបត្ថម្ភសាច់ប្រាក់នេះដែរ ត្រូវបានសម្ដេចតេជោ ហ៊ុន សែន ថ្លែងបញ្ចាក់ថា ដើម្បីធានាឱ្យមាតា និងកូនមានសុខភាពល្អ ហើយជាគោលការណ៍ថ្មី នឹងធ្វើឱ្យរដ្ឋត្រូវចំណាយបន្ថែមទៀតក្នុងមួយឆ្នាំ៕
