1. អ៊ុយក្រែនបន្តវាយប្រហារក្នុងប្រទេសរុស្ស៊ីដោយការវាយប្រហារលើអគាររដ្ឋាភិបាល
យោងតាមសារព័ត៌មាន The Drive ចុះផ្សាយថ្ងៃទី២២ ខែឧសភាបានអោយដឹងថា ការវាយប្រហារនៅក្នុងតំបន់ Belgorod របស់រុស្ស៊ីបានបន្តកាលពីពេលយប់កន្លងទៅនេះ ដោយមានការអះអាងថាអគារ FSB និងក្រសួងមហាផ្ទៃត្រូវបានវាយប្រហារផងដែរ។ អភិបាលក្នុងតំបន់លោក Vachyslav Gladkov បាននិយាយនៅលើឆាណែល Telegram របស់លោកថា"នៅក្នុងទីក្រុង Grayvoron មានអគារលំនៅដ្ឋានឯកជនពីរត្រូវបានវាយប្រហារដោយដ្រូន" ។ “ជាលទ្ធផលនៃការបញ្ចេញគ្រឿងផ្ទុះពីដ្រូន UAV របស់ពួកគេ ដែលធ្វើអោយមានចំហេះកើតឡើង។ ប៉ុន្តែមិនមានអ្នករងរបួសទេ។ សេវាសង្គ្រោះបន្ទាន់ទាំងអស់ត្រូវបានបញ្ជូនទៅកាន់កន្លែងកើតហេតុ»។ ហើយនៅក្នុងភូមិ Borisovka វិញ មាន"ឧបករណ៍ផ្ទុះត្រូវបានទម្លាក់ម្តងហើយម្តងទៀតពី ដ្រូន UAV ទៅលើអគាររដ្ឋបាល។ និងមិនមានអ្នករងរបួសទេ។ សេវាសង្គ្រោះទាំងអស់គឺនៅនឹងកន្លែង”។ ក៏មានរបាយការណ៍មិនបានបញ្ជាក់ផងដែរថា ក្រៅពីរុស្ស៊ីដែលបានសន្មត់ថាបានជម្លៀសអាវុធនុយក្លេអ៊ែរពីទីក្រុងនៅជិតកន្លែងលុកលុយនោះហើយ អាជ្ញាធររុស្ស៊ីបានបញ្ជាឱ្យបំផ្ទុះស្ពាននៅតំបន់ Belgorod ។ ដូចករណីនៅទូទៅនៅក្នុងសមរភូមិអ៊ុយក្រែននេះផងដែរ ការលុកលុយនេះក៏ពាក់ព័ន្ធនឹងការប្រមូលយកឧបករណ៍សឹកសង្គ្រាមដោយភាគីទាំងសងខាងផងដែរ។
2. រោងចក្រនុយក្លេអ៊ែរអ៊ីរ៉ង់មួយនៅក្រោមដីជ្រៅណាស់ដែលការវាយប្រហាររបស់អាមេរិចមិនអាចធ្វើទៅដល់
យោងតាមសារព័ត៌មាន AP NEWS ចុះផ្សាយថ្ងៃទី២២ ខែឧសភាបានអោយដឹងថា នៅជិតកំពូលភ្នំZagros នៅភាគកណ្តាលប្រទេសអ៊ីរ៉ង់ កម្មករកំពុងសាងសង់រោងចក្រនុយក្លេអ៊ែរយ៉ាងជ្រៅនៅក្នុងក្រោមដីដែលវាទំនងជាហួសពីសមត្ថភាពនៃជួរអាវុធចុងក្រោយរបស់សហរដ្ឋអាមេរិក ដែលត្រូវបានរចនាឡើងដើម្បីបំផ្លាញទីតាំងបែបនេះ នេះបើយោងតាមអ្នកជំនាញ និងរូបភាពផ្កាយរណបវិភាគដោយ សារព័ត៌មាន Associated Press ។ រូបថត និងវីដេអូពីPlanet Labs PBC បង្ហាញថាអ៊ីរ៉ង់កំពុងជីកផ្លូវរូងក្រោមដីនៅលើភ្នំក្បែរទីតាំងនុយក្លេអ៊ែរ Natanz ដែលបានរងការវាយប្រហារបំផ្លិចបំផ្លាញម្តងហើយម្តងទៀត ចំពេលមានការប្រឈមមុខដាក់គ្នារបស់ទីក្រុង Tehran ជាមួយលោកខាងលិចជុំវិញកម្មវិធីបរមាណូរបស់ខ្លួន។ ដោយពេលនេះអ៊ីរ៉ង់ផលិតអ៊ុយរ៉ានីញ៉ូមជិតដល់កម្រិតអាវុធបន្ទាប់ពីការដួលរលំនៃកិច្ចព្រមព្រៀងនុយក្លេអ៊ែររបស់ខ្លួនជាមួយមហាអំណាច ការដំឡើងនេះធ្វើឱ្យស្មុគស្មាញដល់កិច្ចខិតខំប្រឹងប្រែងរបស់លោកខាងលិចក្នុងការរារាំងទីក្រុងតេអេរ៉ង់ពីសក្តានុពលនៃការអភិវឌ្ឍគ្រាប់បែកបរមាណូ។ ការសាងសង់នៅទីតាំង Natanzកើតមានរយៈពេលប្រាំឆ្នាំបន្ទាប់ពីពេលនោះប្រធានាធិបតីដូណាល់ ត្រាំដកអាមេរិកជាឯកតោភាគីពីកិច្ចព្រមព្រៀងនុយក្លេអ៊ែរ។ ប្រធានាធិបតីលោក Joe Biden និងនាយករដ្ឋមន្ត្រីអ៊ីស្រាអែល បាននិយាយថា ពួកគេនឹងមិនអនុញ្ញាតឱ្យអ៊ីរ៉ង់ បង្កើតអាវុធនុយក្លេអ៊ែរទេ ដោយពួកគេជឿថាការទូតគឺជាមធ្យោបាយដ៏ល្អបំផុតដើម្បីសម្រេចបាននូវគោលដៅនោះ ថ្វីបើជម្រើសណាមួយក៏មិនទាន់ត្រូវបានដកចេញពីលើតុនោះដែរ" ។
3. ខណៈតានតឹងនៅអ៊ីរ៉ង់ អាមេរិកបញ្ចេញរូបថតគ្រាប់បែកអាចបំផ្លាញទីតាំងក្រោមដី
យោងតាមសារព័ត៌មាន The Times of Israel ចុះផ្សាយថ្ងៃទី២២ ខែឧសភាបានអោយដឹងថា នៅពេលដែលភាពតានតឹងជាមួយប្រទេសអ៊ីរ៉ង់បានកើនឡើងជុំវិញកម្មវិធីនុយក្លេអ៊ែររបស់ខ្លួន យោធាអាមេរិកក្នុងខែនេះបានបង្ហោះរូបភាពនៃគ្រាប់បែកដ៏មានឥទ្ធិពលដែលត្រូវបានរចនាឡើងដើម្បីជ្រាបចូលជ្រៅទៅក្នុងផែនដី និងបំផ្លាញសម្ភារៈក្រោមដីដែលអាចត្រូវបានប្រើដើម្បីចម្រាញ់សារធាតុអ៊ុយរ៉ាញ៉ូម។ កងទ័ពអាកាសអាមេរិកកាលពីថ្ងៃទី២ ខែឧសភាបានបញ្ចេញរូបភាពដ៏កម្រនៃអាវុធ GBU-57 ដែលគេស្គាល់ថាជា"Massive Ordnance Penetrator"។ បន្ទាប់មកពួកគេបានថតរូបភាពចុះនៅខាងក្រោម ជាក់ស្តែងដើម្បីបង្ហាញអោយឃើញពីព័ត៌មានលម្អិតអំពីសមាសភាពនៃអាវុធមួយនេះ។ ការចេញផ្សាយរូបថតនេះធ្វើឡើង ខណៈដែលសារព័ត៌មាន Associated Press បានរាយការណ៍ថាប្រទេសអ៊ីរ៉ង់កំពុងមានវឌ្ឍនភាពជាលំដាប់ក្នុងការសាងសង់រោងចក្រនុយក្លេអ៊ែរ ដែលទំនងជាហួសពីសមត្ថភាពនៃជួរអាវុធ GBU-57 ដែលត្រូវបានចាត់ទុកថាជាអាវុធចុងក្រោយរបស់យោធាអាមេរិកក្នុងការកំទេចលេណដ្ឋានក្រោមដី។ គួរបញ្ជាក់ផងដែរ សហរដ្ឋអាមេរិកបានបង្កើតអាវុធ"Massive Ordnance Penetrator"នេះក្នុងទសវត្សរ៍ឆ្នាំ ២០០០ ខណៈមានការព្រួយបារម្ភកើនឡើងអំពីអ៊ីរ៉ង់ដែលពង្រឹងទីតាំងនុយក្លេអ៊ែររបស់ខ្លួនដោយការសាងសង់វានៅក្រោមដី។
