រដ្ឋាភិបាលជប៉ុន គ្រោងផ្ដល់ឥណទានសម្បទានប្រមាន៥២លានដុល្លារ សម្រាប់អនុវត្តគម្រោងធ្វើឱ្យប្រសើរឡើងនូវផ្លូវជាតិលេខ៥ ចាប់ពីកំណាត់ផ្លូវពីព្រែកក្តាម-ធ្លាម្អម ដំណាក់កាលទី៤ ខណៈថវិកាហិរញ្ញប្បទានឥតសំណងប្រមាណ២,៦៧លានដុល្លារទៀត ជួយសម្រាប់អនុវត្តគម្រោងអាហារូបករណ៍អភិវឌ្ឍន៍ធនធានមនុស្ស នេះបើតាមការឲ្យដឹងពីពីក្រសួងការបរទេសនៅថ្ងៃទី២២ ខែឧសភា ឆ្នាំ២០២៣នេះ។
ក្រសួងការបរទេសបានបញ្ជាក់ថា នៅថ្ងៃទី២៤ ខែឧសភា ឆ្នាំ២០២៣ ខាងមុខ លោកឧបនាយករដ្ឋមន្ដ្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា និងលោក UENO Atsushi ឯកអគ្គរាជទូតជប៉ុន ប្រចាំកម្ពុជា នឹងអញ្ជើញចុះហត្ថលេខាលើលិខិតប្ដូរសារ និងឯកសារពាក់ព័ន្ធ ចំនួន២រួមមាន៖
ទី១. ឥណទានសម្បទានប្រាក់យ៉េន ដែលមានទឹកប្រាក់ចំនួន៧.២០៥ លានយ៉េន ប្រមាណ ៥២,៦ លានដុល្លារអាមេរិក សម្រាប់អនុវត្ត “គម្រោងការធ្វើឱ្យប្រសើរឡើងវិញនូវផ្លូវជាតិ លេខ៥ កំណាត់ផ្លូវពីព្រែកក្តាម-ធ្លាម្អម ដំណាក់កាលទី៤” ។
ទី២. ហិរញ្ញប្បទានឥតសំណង ដែលមានទឹកប្រាក់ចំនួន៣៦៦ លានយ៉េន ស្មើប្រមាណ ២,៦៧ លានដុល្លារអាមេរិក សម្រាប់អនុវត្ត “គម្រោងអាហារូបករណ៍អភិវឌ្ឍន៍ធនធានមនុស្ស”។
បើតាមក្រសួងការបរទេស ការផ្តល់ជំនួយអភិវឌ្ឍន៍ផ្លូវការខាងលើរបស់រដ្ឋាភិបាលជប៉ុន នឹងចូលរួមចំណែកដល់កិច្ចខិតខំប្រឹងប្រែងអភិវឌ្ឍន៍សេដ្ឋកិច្ច-សង្គម ជាបន្តបន្ទាប់របស់រាជរដ្ឋាភិបាលកម្ពុជា ព្រមទាំងបង្កើនការពង្រឹងទំនាក់ទំនងដ៏ល្អ ប្រពៃ និងកិច្ចសហប្រតិបត្តិការដែលកំពុងលូតលាស់លើគ្រប់វិស័យរវាងប្រជាជាតិទាំងពីរ៕
