សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅព្រឹកថ្ងៃពុធ ទី១៧ ខែឧសភា ឆ្នាំ២០២៣ នេះ បានអញ្ជើញជាអធិបតីដ៏ខ្ពងខ្ពស់ដឹកនាំកិច្ចប្រជុំពិនិត្យឆ្លងលើសេចក្តីព្រាងព្រះរាជក្រឹត្យ ស្តីពីគោរមងារឧកញ៉ា ដែលជាកិច្ចប្រជុំឆ្លងចុងក្រោយ មុនដាក់ជូនរាជរដ្ឋាភិបាល ពិនិត្យ និងសម្រេច។
មានប្រសាសន៏នៅក្នុងពិធីនោះ សម្តេចក្រឡាហោម ស ខេង លើកឡើងថា គោរមងារឧកញ៉ានេះ ដែលបានប្រើប្រាស់នាពេលកន្លងមក ក៏មានសរសេររៀបរៀងនៅក្នុងសៀវភៅប្រវត្តិសាស្ត្រ ដោយលោកស្រីសាស្ត្រាចារ្យ ត្រឹង ងា ផងដែរ។ បើតាមសម្តេចក្រឡាហោម គោរមងារឧកញ៉ានេះ គឺផ្តល់ជូនរូបវន្តបុគ្គលជាប្រជាពលរដ្ឋខ្មែរ ដែលមានគុណបំណាច់ផ្ទាល់ខ្លួនបរិច្ចាកនូវធនធានថវិកាចូលរួមអភិវឌ្ឍ និងកសាងជាតិ។ លោកថា សេចក្តីព្រាងព្រះរាជក្រឹត្យនេះ ពិតជាមានសារសំខាន់ណាស់ ក្នុងការគ្រប់គ្រងឧកញ៉ា និងការគ្រប់គ្រងសមាគមឧកញ៉ា ធ្វើយ៉ាងណាតែងតាំងឧកញ៉ាឱ្យបានត្រឹមត្រូវ សមស្រប ដើម្បីធានាបាននូវសេចក្តីថ្លៃថ្នូរ ទំនៀមទម្លាប់ ប្រពៃណី និងសណ្ដាប់ធ្នាប់សង្គម។
ចំណែកលោក ប៊ុន ហុន រដ្ឋលេខាធិការក្រសួងមហាផ្ទៃ និងជាប្រធានក្រុមការងារអន្តរក្រសួង រៀបចំលិខិតបទដ្ឋានគតិយុត្តសម្រាប់ការគ្រប់គ្រងឧកញ៉ា ការផ្តល់គោរមងារឧកញ៉ា និងការដកហូតគោរមងារឧកញ៉ា បានលើកឡើងពីប្រវត្តិនៃគោរមងារឧកញ៉ា ដោយបញ្ជាក់ថា គោរមងារ “ឧកញ៉ា” ត្រូវបានប្រើនៅសម័យអាណានិគមបារាំង ហើយគោរមងារនេះគឺ សំដៅលើមន្ត្រីជាន់ខ្ពស់របស់រដ្ឋបាលកណ្ដាល ដែលគេនិយមហៅថា "ចតុស្ដម្ភ" ហើយគោរមងារ "ឧកញ៉ា" នាពេលនោះ មានដូចជា ឧកញ៉ាយមរាជ ឧកញ៉ាក្រឡាហោម ឧកញ៉ាវាំង និង ឧកញ៉ាចក្រី ជាដើម។
លោក ប៊ុន ហុន បញ្ជាក់ថា ដោយផ្អែកតាមបទប្បញ្ញត្តិនៃរដ្ឋធម្មនុញ្ញ ព្រះមហាក្សត្រ បានចេញព្រះរាជក្រឹត្យប្រទានគោរមងារឧកញ៉ាជូនដល់ប្រជាពលរដ្ឋខ្មែរ ដែលមានស្នាដៃក្នុងការអភិវឌ្ឍ និងការកសាងជាតិជាបន្តបន្ទាប់ ដែលមានលក្ខណៈជាការប្រទាននូវគ្រឿងឥស្សរិយយសជាតិ។ លោកបន្តថា សម្រាប់បច្ចុប្បន្ន កម្ពុជានៅមិនទាន់មានលិខិតបទដ្ឋានគតិយុត្តសម្រាប់កំណត់លក្ខណៈសម្បត្តិក្នុងការផ្តល់គោរមងារឧកញ៉ា ការគ្រប់គ្រង ការប្រើប្រាស់គោរមងារឧកញ៉ា និងការដកហូតគោរមងារឧកញ៉ា នៅឡើយទេ។
បើតាមលោក ប៊ុន ហុន ដំណើរការនៃការរៀបចំសេចក្តីព្រាងព្រះរាជក្រឹត្យ ស្ដីពីគោរមងារឧកញ៉ានេះ ក្រុមការងារអន្តរក្រសួង បានធ្វើការសិក្សាស្រាវជ្រាវ និងប្រជុំពិភាក្សាគ្នាជាច្រើនលើក ច្រើនសាររួចមកហើយ ក្នុងនោះក៏បានធ្វើការពិគ្រោះយោបល់សុំធាតុចូលពីក្រសួងព្រះបរមរាជវាំង និងក្រសួង ស្ថាប័នពាក់ព័ន្ធផងដែរ។
គួររំលឹកថា ព្រះរាជក្រឹត្យ ស្ដីពីគោរមងារឧកញ៉ានេះមាន១០ជំពូក និង២៥មាត្រា ហើយព្រះរាជក្រឹត្យនេះ មានវិសាលភាពអនុវត្តចំពោះរូបវន្ដបុគ្គលជាប្រជាពលរដ្ឋខ្មែរ ដែលទទួលបានគោរមងារឧកឧញ៉ា នៅព្រះរាជាណាចក្រកម្ពុជា៕
