គណៈកម្មាធិការជាតិរៀបចំការបោះ ឆ្នោត (គ.ជ.ប) បានសម្រេចជាផ្លូវការបដិសេធការចុះបញ្ជីគណបក្សនយោបាយឈរឈ្មោះបោះឆ្នោតជ្រើសតាំងតំណាងរាស្ត្រនីតិកាលទី៧ ឆ្នាំ២០២៣ របស់គណបក្សភ្លើងទៀន ដែលមាន២៥ មណ្ឌលរាជធានី ខេត្ត នេះបើយោងតាមសេចក្តីសម្រេចរបស់ គ.ជ.ប នារសៀលថ្ងៃទី១៥ ខែឧសភា នេះ។
មូលហេតុនៃការបដិសេធត្រូវបាន គ.ជ.ប បញ្ជាក់ថា ដោយសារគណបក្សភ្លើងទៀន មិនបានភ្ជាប់មកជាមួយនូវប្រកាសស្តីពីការ ចុះឈ្មោះក្នុងបញ្ជីគណបក្សនយោបាយនៅក្រសួងមហាផ្ទៃ ដែលមានបញ្ជាក់នីត្យានុកូលកម្ម ដោយរដ្ឋបាលរាជធានី ខេត្ត ក្រុង ស្រុក ខណ្ឌ នៅ ការិយាល័យច្រកចេញចូលតែមួយឱ្យបានត្រឹមត្រូវស្របតាមកថាខណ្ឌទី២ និងចំណុចទី១ ក្នុងមាត្រា២៧ នៃច្បាប់ស្តីពីការបោះឆ្នោតជ្រើសតាំងតំណាងរាស្ត្រ។
គួររំលឹកថា កាលពីព្រឹកថ្ងៃទី១៥ ខែឧសភា ឆ្នាំ២០២៣នេះ លោក ប្រាជ្ញ ចន្ទ ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) បានដឹកនាំកិច្ចប្រជុំ ដើម្បីពិនិត្យ និងសម្រេចលើការងារមួយចំនួន ដែលមិនទាន់បានសម្រេចនាពេលកន្លងមក ក្នុងនោះក៏នឹងពិនិត្យទៅលើពាក្យសុំចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជន របស់គណបក្សភ្លើងទៀនផងដែរ។
គណៈកម្មាធិការជាតិរៀបចំការបោះឆ្នោត កន្លងមកបានតម្រូវឲ្យគណបក្សភ្លើងទៀន ធ្វើការកែសម្រួលមួយចំនួន៣ ចំណុច ដើម្បីអាចចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះបោះឆ្នោតសម្រាប់ការបោះឆ្នោតជ្រើសតាម តំណាងរាស្ត្រនីតិកាលទី៧ ឆ្នាំ២០២៣ បាន។
ចំណុចចំនួន៣នោះ គឺទី១. សេចក្តីចម្លងលិខិតបញ្ជាក់ការចុះបញ្ជីគណបក្សនយោបាយនៅក្រសួងមហាផ្ទៃ ដែលមានបញ្ជាក់នីស្យាអនុគោលកម្ម ដោយរដ្ឋបាលរាជធានី ខេត្ត ក្រុង ស្រុក ខណ្ឌ ចំនួនមួយច្បាប់។ ទី២. បេក្ខជនពេញសិទ្ធិលេខរៀងទី១ មណ្ឌលខេត្តកណ្ដាលឈ្មោះ រ៉ុង ឈុន ត្រូវបានតុលាការផ្ដន្ទាទោសពីបទមជ្ឈិម ហើយដែលមិនទាន់មាននីតិសម្បទាឡើង វិញ ដូច្នេះគណបក្សភ្លើងទៀនត្រូវប្ដូរបេក្ខជនថ្មី ជំនួសបេក្ខជនពេញសិទ្ធិលេខ រៀងទី១ នៅមណ្ឌលខេត្តកណ្ដាល។ ទី៣. បង្កាន់ដៃបង់ប្រាក់តម្កល់ចំនួន១៥ លានរៀល ដែលចេញដោយអគ្គនាយកដ្ឋានរតនាគារជាតិ។
ក្រោយពីកែសម្រួលរួច នៅរសៀលថ្ងៃទី១៣ ខែឧសភា ឆ្នាំ ២០២៣ ថ្នាក់ដឹកនាំគណបក្សភ្លើងទៀនបានយកឯកសារ ដែលគណៈកម្មាធិការជាតិរៀបចំការបោះឆ្នោត (គ.ជ.ប) តម្រូវឲ្យកែ សម្រួលទៅដាក់ជូន គ.ជ.ប ជាថ្មី។
បើតាមសេចក្តីសម្រេចរបស់ គ.ជ.ប គិតត្រឹមថ្ងៃទី០៨ ខែឧសភា ឆ្នាំ២០២៣ គ.ជ.ប បានទទួលពាក្យសុំចុះបញ្ជីគណបក្សនយោបាយសរុបចំនួន២០។ យោងតាមច្បាប់ គ.ជ.ប មានពេល៧ថ្ងៃ ដើម្បីពិនិត្យឯកសារចំនួន១០មុខ ស្របតាមមាត្រា២៧ នៃច្បាប់ស្តីពីការបោះឆ្នោតជ្រើសតាំងតំណាងរាស្ត្រ ហើយគ្រប់គណបក្សនយោបាយមានពេល៥ថ្ងៃ ដើម្បីបំពេញឯកសារដែលខ្វះ និងកែតម្រូវបន្ទាប់ពីទទួលបានការស្នើសុំរបស់ គ.ជ.ប ។
គណបក្សដែលបំពេញគ្រប់លក្ខខ័ណ្ឌតាមពេលកំណត់ គ.ជ.ប ចុះបញ្ជីជាផ្លូវការ ហើយបើគណបក្សណាដែលមិនបំពេញគ្រប់លក្ខខណ្ឌ គជបសម្រេចមិនចុះបញ្ជីគណបក្សនោះទេ។ ក្នុងន័យនេះ គ.ជ.ប បានពិនិត្យឃើញថា គណបក្សចំនួន១៥ បានដាក់ឯកសារគ្រប់គ្រាន់ និងត្រឹមត្រូវស្របតាមលក្ខខណ្ឌកំណត់នៃច្បាប់ ហើយគ.ជ.ប បានសម្រេចអនុម័តចុះបញ្ជីគណបក្សទាំង១៥នេះ។
ដោយឡែក គណបក្សសរុបចំនួន៥ រួមមាន៖ គណបក្សខ្មែរឈប់ក្រ គណបក្សខ្មែរអភិវឌ្ឍន៍សេដ្ធកិច្ច គណបក្សភ្លើងទៀន គណបក្សស្រ្តីដើម្បីស្ត្រី និងគណបក្សមហាសាមគ្គីជាតិខ្មែរ បានទទួលការស្នើសុំឲ្យបំពេញឯកសារ និងកែតម្រូវ ហើយក្នុងចំណោមគណបក្សទាំង៥នេះ គណបក្ស៣បានកែតម្រូវ និងបានបំពេញគ្រប់លក្ខខណ្ឌ គ.ជ.ប បានសម្រេចទទួលស្គាល់ និងចុះបញ្ជី ហើយគណបក្ស១ទៀតកំពុងកែតម្រូវ លើកលែងតែគណបក្សភ្លើងទៀន តែ១គត់ ដែលធ្វើមិនបានគ្រប់ គ.ជ.ប សម្រេចបដិសេធការចុះបញ្ជីគណបក្សភ្លើងទៀន នៅថ្ងៃទី១៥ ខែឧសភា ឆ្នាំ២០២៣នេះតែម្តង៕