កាលពីថ្ងៃទី១៤ ខែឧសភាកន្លងទៅនេះ ម្ចាស់មេដាយមាស៣ជំនាន់រួចមកហើយរបស់កីឡាស៊ីហ្គេម វីរកីឡាការិនី ស៊ន សៀវមី បានបន្តដណ្តើមយកមេដាយជូនកម្ពុជាជាលើកទី៤ថែមទៀតនៅក្នុងការប្រកួតវីរៈកម្មចុងក្រោយនៃវិញ្ញាសាតេក្វាន់ដូស៊ីហ្គេមលើកទី៣២។ គួរបញ្ជាក់ផងដែរថា ព្រឹត្តិការណ៍កីឡាស៊ីហ្គេមត្រូវបានធ្វើឡើងរៀងរាល់២ឆ្នាំម្តង ដោយគួររំលឹកផងដែរថា កីឡាការិនីស៊ន សៀវម៉ី បានដណ្តើមយកមេដាយមាសទាំង៣លើកនៅក្នុងស៊ីហ្គេមលើកទី២៧ នៅប្រទេសមីយ៉ាន់ម៉ា ឆ្នាំ២០១៣ ស៊ីហ្គេមលើកទី២៩ នៅប្រទេសម៉ាឡេស៊ី ឆ្នាំ២០១៧ និងស៊ីហ្គេមលើកទី៣០ នៅប្រទេសហ៊ីលីពីន ឆ្នាំ២០១៩ផងដែរ។ ចំណែកលើកទី៤នេះវិញ ដោយនៅក្នុងស៊ីហ្គេមលើកទី៣២ ដែលមានប្រទេសកម្ពុជាជាម្ចាស់ផ្ទះផ្ទាល់ ឆ្នាំ២០២៣នេះ ពិតជាបានកាន់តែលើកមុខលើកមាត់ប្រទេសជាតិយើងកាន់តែពិសេស ដោយកីឡាការិនីស៊ន សៀវម៉ី បានប្រឹងប្រែងដណ្តើមយកមេដាយមាសជូនកម្ពុជាម្តងទៀតរហូតបានសំរេច ដោយផ្តួលលើគូប្រជែងកីឡាការិនីឡាវដោយសមត្ថភាព ថ្វីបើនៅពេលនេះកីឡាការិនីបំបែកប្រវត្តិសាស្រ្តជាយូរឆ្នាំមួយរួបនេះមានក្រុមគ្រួសារ កូនតូច ដែលត្រូវមើលថែក៏ពិតមែន។ គួរបញ្ជាក់ថា កីឡាការិនីស៊នសៀវមី កើតនៅថ្ងៃទី១៤ ខែកញ្ញា ឆ្នាំ១៩៩៥ និងមានកំពស់១,៨៣ម៉ែត្រ។ ក្រៅពីនេះផងដែរ ស្នាដៃសំខាន់ៗរបស់នាងគួរអោយកត់សម្គាល់មានដូចជាគឺជាបេក្ខភាពដំបូងគេដែលបានឈ្នះមេដាយមាសពីការប្រកួតកីឡាអាស៊ី ឆ្នាំ ២០១៤ ជូនកម្ពុជាមុនគេ។ ជាងនេះទៅទៀត ស៊ន សៀវម៉ី ក៏ជាអត្តពលិកមួយរូបដំបូងគេដែលដណ្តើមបានកៅអីទៅប្រកួតអូឡាំពិកផងដែរ។