ភ្នំពេញ៖ កីឡាករ-កីឡាការិនី មកពីប្រទេសជាសមាជិកអាស៊ាន ដែលបាន​ចូលរួម ប្រកួតកីឡាស៊ីហ្គេម លើកទី៣២ នៅកម្ពុជា ត្រូវបានរាជរដ្ឋាភិបាល ប្រកាសឱ្យចូលទស្សនារមណីយដ្ឋានអង្គរវត្ត ដោយមិនគិតប្រាក់។មានប្រសាសន៍ក្នុងពិធីប្រគល់សញ្ញាបត្រជូននិស្សិតកសិកម្ម នៅព្រឹកថ្ងៃទី១៥ ខែឧសភា ឆ្នាំ២០២៣នេះ សម្ដេចតេជោ ហ៊ុន សែន នាយករដ្ឋមន្ដ្រីកម្ពុជា បានថ្លែងថា ក្រុមកីឡាករ-កីឡាការិនី ដែលមកចូលរួម ប្រកួតកីឡាស៊ីហ្គេម ហើយចង់ទៅទស្សនារមណីយដ្ឋានអង្គរវត្ត មិនចាំបាច់លក់សំបុត្រនោះទេ គឺអនុញ្ញាតឲ្យពួកកាត់ ចូលទស្សនាដោយឥតគិតថ្លៃតែម្ដង។ ជាមួយគ្នានេះ សម្តេចនាយករដ្ឋមន្រ្តីកម្ពុជា ក៏បានប្រកាសឲ្យគណៈប្រតិភូទាំងអស់មកពីប្រទេសជាសមាជិកអាស៊ាន ដែលដឹកនាំក្រុមកីឡាករ-កីឡាការិនី មកចូលរួមព្រឹត្តិការណ៍ស៊ីហ្គេម ក៏អាចទៅទស្សនាប្រាសាទអង្គរវត្តបានដែរ ប៉ុន្តែសម្រាប់អ្នកគាំទ្ររបស់ក្រុមកីឡាមកពីប្រទេសជាសមាជិកអាស៊ាន គឺគិតលុយថ្លៃសំបុត្រ។ តាមរបាយការណ៍គណ:កម្មាធិការជាតិ រៀបចំប្រកួតកីឡា អាស៊ីអាគ្នេយ៍លើកទី៣២ នាពេលកន្លងទៅបានឱ្យដឹងថា ព្រឹត្តិការណ៍កីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ មានប្រតិភូកីឡាទាំងអស់ចំនួន១២,៤០៤ នាក់ និងមកពី១១ប្រទេស។ ប្រតិភូកីឡាទាំង១១ប្រទេស ដែលបានចុះឈ្មោះទាំង ១២,៤០៤ នាក់ ក្នុងនោះ ៖ ១-ប្រតិភូកីឡាកម្ពុជា ចំនួន ១១៥៨ នាក់, ២-ប្រតិភូកីឡាប៊្រុយណេ ចំនួន ១១៣នាក់, ៣-ប្រតិភូកីឡាឥណ្ឌូនេស៊ី ចំនួន ១៨០២នាក់, ៤-ប្រតិភូកីឡាឡាវ ចំនួន ៦៥៦នាក់, ៥-ប្រតិភូកីឡាម៉ាឡេស៊ី ចំនួន ១៥៣២នាក់, ៦-ប្រតិភូកីឡាមីយ៉ាន់ម៉ា ចំនួន ៦៩៤នាក់, ៧-ប្រតិភូកីឡាហ្វីលីពីន ចំនួន ១៣៤២នាក់, ៨-ប្រតិភូកីឡាសឹង្ហបូរី ចំនួន ១២២៨នាក់, ៩-ប្រតិភូកីឡាថៃ ចំនួន ១៩៨៥នាក់, ១០-ប្រតិភូកីឡាទីម័រខាងកើត ចំនួន ១៧១នាក់ និង១១-ប្រតិភូកីឡាវៀតណាម ចំនួន ១៦៦៣នាក់៕