ភ្នំពេញ៖ រដ្ឋាភិបាលចិន បានអនុញ្ញាតឱ្យម្រេចរបស់កម្ពុជា អាចនាំចូលទីផ្សាររបស់ខ្លួនបាន ជាលើកដំបូងក្រោយពេលបានបំពេញគ្រប់នីតិវិធីក្នុងការនាំចេញ។ ស្ថានទូតចិន ប្រចាំរាជធានីភ្នំពេញ បានឱ្យដឹងនៅព្រឹកថ្ងៃទី១២ ខែឧសភា ឆ្នាំ២០២៣នេះថា រដ្ឋបាលគយ នៃប្រទេសចិន បានបង្ហាញពីបញ្ជីឈ្មោះក្រុមហ៊ុនសហគ្រាស ដែលបានចុះបញ្ជីនាំចេញគ្រឿងទេសកម្ពុជា ទៅកាន់ប្រទេសចិន។ ស្ថានទូតចិន បានឱ្យដឹងបន្តថា ដើម្បីពន្លឿនការអនុវត្តពិធីសារស្តីពីលក្ខខណ្ឌតម្រូវភូតគាមអនាម័យសម្រាប់ការនាំចេញម្រេចពីកម្ពុជា ទៅប្រទេសចិន ដែលបានចុះហត្ថលេខារួមគ្នារវាងភាគីទាំងពីរចិន និងកម្ពុជា កាលពីខែវិច្ឆិកាឆ្នាំ២០២២ រដ្ឋបាលគយ ស្ថានទូតចិនប្រចាំកម្ពុជា និងក្រសួងកសិកម្មរុក្ខាប្រមាញ់និងនេសាទកម្ពុជា កាលពីថ្ងៃទី១០-១១ខែមេសាថ្មីៗនេះ បានធ្វើការពិនិត្យទីតាំងដាំម្រេចនិងរោងចក្រវេចខ្ចប់ម្រេច ដោយតាមរយៈVideo Conference។ ស្ថានទូតចិន ប្រចាំរាជធានីភ្នំពេញ បានចាត់ទុកដំណាំម្រេចកម្ពុជា គឺជាកសិផលដំបូងគេដែលត្រូវបានអនុញ្ញាតឱ្យនាំចេញទៅប្រទេសចិន ក្នុងឆ្នាំ២០២៣នេះ ហើយក៏ជាដំណាំគ្រឿងទេសដំបូងគេដែលត្រូវបានអនុញ្ញាតឱ្យនាំចេញទៅកាន់ទីផ្សារចិន ផងដែរ៕
