នេះគឺជាជោគជ័យធំមួយសំរាប់កម្ពុជា ដោយមានកីឡាការិនីប៉ុន្មានរូបនេះបានធ្វើអោយប្រទេសកម្ពុជារកមេដាយស៊ីហ្គេមបានច្រើនជាងគេបង្អស់នាំមុខប្រទេសដទៃទៀតលើវិញ្ញាសារកីឡាវូ៉វីណាមដែលមានរហូតទៅដល់២៧មេដាយនាំមុខវៀតណាម ២០មេដាយ និងថៃ១៦ មេដាយ។ នៅក្នុងនោះផងដែរយើងក៏មានកីឡាការិនីវ៉ូវីណាមជម្រើសជាតិកម្ពុជាឆ្នើមមួយរូបដែលបានជួយរកមេដាយជូនកម្ពុជារហូតដល់ទៅ៥គ្រឿងម្នាក់ឯង នោះគឺកីឡាការិនីពៅសុខា ដែលនាងទទួលបានមេដាយមាស៣ ប្រាក់១ និងសំរឹទ្ធ១ ក្នុងចំណោមវិញ្ញាសាទាំង៥ ក្នុងការប្រកួតក្នុងកីឡាស៊ីហ្គេម ២០២៣ នៅឯមជ្ឈមណ្ឌលពិពណ៌អន្តរជាតិនិងសន្និបាតជ្រោយចង្វារ OCIC គល់ស្ពានបាឡេ ដែលចាប់ផ្តើមប្រកួតពីថ្ងៃទី៦ ដល់ថ្ងៃទី៩ ខែឧសភាកន្លងមកនេះ។លេីវិញ្ញាសាទាំង៥នោះរួចមាន មេគុនកាំបិតភ្លោះនារីឯកត្តជន មេគុនកាំបិតធំ នារីឯកត្តជន វិញ្ញាសា សម្តែងស្នៀតការពារខ្លួនប្រើដាវជាគូ វិញ្ញាសារសម្តែងបុរស៣នាក់នារី៣នាក់ និងវិញ្ញាសាសម្តែងគុនដាវក្រុមនារី៤នាក់។ គួរបញ្ជាក់អោយដឹងផងដែរថា កីឡាការិនី ពៅសុខា គឺជាម្ចាស់ជើងឯកពិភពលោកធ្លាប់ទទួលបានមេដាយជាច្រើនរួចមកហើយដូចជា៖
- ក្នុងឆ្នាំ២០១៧ នៃការប្រកួត World Championship នៅប្រទេសឥណ្ឌា
-ឆ្នាំ២០១៩ឈ្នះ World Championship នៅកម្ពុជា
- ឆ្នាំ២០២២ឈ្នះមេដាយសំរិទ្ធ ក្នុងព្រឹត្តិការណ៍ស៊ីហ្គេម លើកទី៣១ នៅទីក្រុងហាណូយ ប្រទេសវៀតណាម
-និងឈ្នះក្នុងព្រឹត្តិការណ៍កីឡាថ្នាក់ជាតិជាច្រើនទៀត។
កីឡាការិនីពៅសុខាក៏ធ្លាប់បានសម្តែងអោយដឹងថា នាងបានត្រៀមខ្លួនរួចជាស្រេចសំរាប់ការប្រកួតនេះ ដោយនាងបានដាក់កំណត់គោលដៅខ្លួនឯងចាប់តាំងពីឆ្នាំ២០១៣មក ថានឹងប្រឹងប្រែងដណ្តើមយកមេដាយជូនប្រជាជនកម្ពុជាអោយបាននៅក្នុងព្រឹត្តិការណ៍ស៊ីហ្គេមឆ្នាំ២០២៣ ដែលមានកម្ពុជាជាម្ចាស់ផ្ទះ។
