មានប្រសាសន៍នៅក្នុងពិធីបិទវគ្គសុក្រឹតការថ្នាក់ដឹកនាំនគរបាល កម្រិត១ និងកម្រិត២ ជំនាន់ទី៣ នៅបណ្ឌិត្យសភានគរបាលកម្ពុជា ស្ថិតនៅស្រុកកៀនស្វាយ ខេត្តកណ្ដាល នៅថ្ងៃទី១០ ខែឧសភា ឆ្នាំ២០២៣នេះ សម្ដេចក្រឡាហោម ស ខេង នាយករដ្ឋមន្ដ្រីស្ដីទីបានអះអាងថា ទោះបីក្នុងកាលៈទេសៈណាក៏ដោយ កងកម្លាំងនគរបាលជាតិទាំងអស់ ត្រូវឆ្លងកាត់វគ្គបណ្ដុះបណ្ដាលជំនាញនានា ឱ្យស្របតាមការវិវត្តន៍សភាពការណ៍សន្ដិសុខជាតិ និងអន្ដរជាតិ។
សម្ដេចក្រឡាហោម ស ខេង បានបញ្ជាក់យ៉ាងនេះថា “ក្រសួងមហាផ្ទៃ បានដាក់កាព្វកិច្ចដល់កម្លាំងនគរបាលជាតិទាំងអស់ ត្រូវឆ្លងកាត់វគ្គបណ្ដុះបណ្ដាលជំនាញ និងជំនាញពាក់ព័ន្ធទាំងអស់ ស្របតាមការវិវត្តន៍សភាពការណ៍សន្ដិសុខជាតិ និងអន្ដរជាតិ។ ក្នុងន័យនេះ បណ្ឌិត្យសភានគរបាលកម្ពុជា ពិតជាមានបេសកកម្មយ៉ាងសំខាន់ ក្នុងការកសាងធនធានមនុស្សរបស់កងកម្លាំងនគរបាលជាតិ ដែលមានភារកិច្ចបម្រើសង្គម និងប្រជាពលរដ្ឋ ឱ្យរស់នៅប្រកបដោយសេចក្ដីសុខសាន្ដ”។
សម្ដេចបន្ដថា បច្ចុប្បន្នក្រសួងមហាផ្ទៃ បានខិតខំលើកកម្ពស់សមត្ថភាពកងកម្លាំងនគរបាលជាតិ ឱ្យមានសមត្ថភាពប្រហាក់ប្រហែលជាមួយបណ្ដាប្រទេសក្នុងតំបន់ និងអន្ដរជាតិ ឱ្យមានកម្រិតស្ដង់ដារ ហើយដើម្បីសម្រេចបាននូវការងារនេះ គឺពិតជាមានកិច្ចការងារជាច្រើនដែលត្រូវធ្វើ ជាពិសេសបណ្ឌិត្យសភានគរបាលកម្ពុជា និងភាពអង្គភាពចំណុះក្រសួងមហាផ្ទៃ ត្រូវរួបរួមគ្នាឱ្យកងកម្លាំងនគរបាលជាតិ មានសមត្ថភាពខ្ពស់ផងដែរ។
បើតាមសម្ដេចនាយករដ្ឋមន្ដ្រីស្ដីទី មកដល់ពេលនេះ ក្រសួងមហាផ្ទៃ បានរៀបចំវិធានការរិតបណ្តឹងចំពោះការផ្ទេរចូលពីស៊ីវិល មកកងកម្លាំងនគរបាលជាតិ បើមិនដូច្នោះទេ បណ្ឌិត្យសភានគរបាលកម្ពុជា បើកវគ្គបណ្ដុះបណ្ដាលប៉ុន្មានដងទៀត ក៏មិនចប់ដែរ។ សម្ដេចអះអាងថា នាយកដ្ឋានបុគ្គលិក ត្រូវតែទទួលខុសត្រូវចំពោះអ្នកផ្ទេរចូលមកនគរបាលជាតិ។
ចំណែក នាយឧត្តមសេនីយ៍ សេង ផល្លី ប្រធានបណ្ឌិត្យសភានគរបាលកម្ពុជា បានលើកឡើងថា ភារកិច្ចរបស់បណ្ឌិត្យសភានគរបាលកម្ពុជា គឺការងារបណ្តុះបណ្ដាល កងកម្លាំងនគរបាលជាតិ ឲ្យស្របតាមស្ដង់ដាគុណភាព ដែលបានកំណត់ ដើម្បីលើកកម្ពស់គុណភាព សមត្ថភាព និងក្រមសីលធម៌វិជ្ជាជីវៈកងកម្លាំងនគរបាលជាតិ និងបានប្តេជ្ញាសម្រេចកិច្ចនេះឲ្យបាន៕