សត្វមាន់ជាង១៣០០ក្បាល និងស៊ុតជិត២០០០គ្រាប់ ដែលក្រុមឈ្មួញទុច្ចរិត លួចនាំចូលពីប្រទេសវៀតណាម ដោយគ្មានលិខិតអនុញាតនោះ ត្រូវបានកម្លាំងអគ្គនាយកដ្ឋានសុខភាពសត្វ និងផលិតកម្មសត្វ ចុះបង្ក្រាប កាលពីវេលាម៉ោង៣ និង០៥នាទីទៀបភ្លឺ ថ្ងៃទី០៩ ខែឧសភា ឆ្នាំ២០២៣ នៅលើផ្លូវជាតិលេខ១ ចំណុចភូមិ១ ឃុំព្រែកខ្សាយ(ខ) ស្រុកពាមរក៍ ខេត្តព្រៃវែង។
លោក ហ៊ុន សារ៉ាត់ ប្រធានក្រុមការងារអន្តរាគមន៍បង្ក្រាបបទល្មើសចរាចរណ៍សត្វ និងផលិតផលមានដើមកំណើតពីសត្វ បានឲ្យដឹងនៅព្រឹកថ្ងៃទី០៩ ខែឧសភា នេះថា ការចុះបង្ក្រាបនេះបានធ្វើឡើងក្រោមការបញ្ជាផ្ទាល់ពីលោក តាន់ ផាន់ណារ៉ា ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ ដោយបានឃាត់រថយន្ដមួយគ្រឿងម៉ាក HYUNDIA ពណ៌ស ជាប្រភេទរថយន្តដឹកទំនិញចំណុះ២.៥ តោន ពាក់ស្លាកលេខភ្នំពេញ ៣F-៨៣៦៤។ រថយន្តនោះ ដឹកសត្វមាន់រស់ចំនួន១៣៧០ក្បាល និងស៊ុតមាន់ចំនួន១៨០០០គ្រាប់ ដែលលួចនាំចូលពីប្រទេសវៀតណាម តាមច្រកស្វាយអាង៉ោង ស្រុកកំពង់ត្របែក ខេត្តព្រៃវែង និងបន្តឆ្ពោះទៅលក់ចែកចាយនៅរាជធានីភ្នំពេញ ដោយគ្មានលិខិតអនុញ្ញាតអ្វីទាំងអស់។ បើតាមលោក ហ៊ុន សារ៉ាត់ ក្រោយពីឃាត់ និងឆែកឃើញ កម្លាំងជំនាញរបស់លោក បាននាំយកទៅរក្សាទុកនៅទីតាំងចត្តាឡីស័កសត្វ របស់អគ្គនាយកដ្ឋានសុខភាពសត្វ និងផលិតកម្មសត្វ ដើម្បីចាត់ការទៅតាមនីតិវិធីច្បាប់។ គួររំលឹកថា កាលពីវេលាទៀបភ្លឺ នាថ្ងៃទី០៨ ខែឧសភា ឆ្នាំ២០២៣ម្សិលមិញក្រុមការងារអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ ក៏បានចុះស្ទាក់ចាប់រថយន្ត១គ្រឿងផងដែរ ដែលបានដឹកកូនមាន់ខ្មៅចំនួន១៩០០ក្បាល ពីប្រទេសវៀតណាម ដោយខុសច្បាប់ តាមច្រកភូមិក្រសាំងជ្រុំ ឃុំគ្រួស ស្រុកស្វាយជ្រុំ ខេត្តស្វាយរៀង ដើម្បីបន្តទៅលក់ចែកចាយនៅស្រុកកៀនស្វាយ ខេត្តកណ្ដាល៕
