ភ្នំពេញ៖ ក្រុមកីឡាបាល់ទះបុរសជម្រើសជាតិកម្ពុជា បានឡើងទៅកាន់វគ្គផ្តាច់ព្រ័ត្រ បន្ទាប់ពីយកជ័យជម្នះលើក្រុមកីឡាបាល់ទះបុរសជម្រើសជាតិថៃ ជាប្រវត្តិសាស្រ្តក្នុងវគ្គពាក់កណ្តាលផ្តាច់ព្រ័ត្រ ដោយលទ្ធផល ៣សិត ទល់២ កាលពីរាត្រីថ្ងៃទី៧ ខែឧសភា ឆ្នាំ២០២៣ នៅក្នុងព្រឹត្តិការណ៍កីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ ។ សហព័ន្ធកីឡាបាល់ទះកម្ពុជា បានចាត់ទុកជ័យជម្នះរបស់ក្រុមកីឡាបាល់ទះបុរសជម្រើសជាតិកម្ពុជា លើក្រុមកីឡាបាល់ទះបុរសជម្រើសជាតិថៃ ក្នុងវគ្គពាក់កណ្តាលផ្តាច់ព្រ័ត្រ គឺជាព្រឹត្តិការណ៍ប្រវត្តិសាស្រ្តដែលពុំធ្លាប់មាននាពេលកន្លងទៅ។ ជាមួយជ័យជម្នះនេះ សហព័ន្ធកីឡាបាល់ទះកម្ពុជា បានថ្លែងអំណរគុណអ្នកគាំទ្រទាំងអស់ ដែលបានចូលរួមលើកទឹកចិត្តដល់កីឡាករកម្ពុជា ទាំងនៅទីលានផ្ទាល់ និងទស្សនាតាមប្រព័ន្ធផ្សព្វផ្សាយនានា ទាំងក្នុង និងក្រៅប្រទេស ព្រមទាំងបានចាត់ទុកសកម្មភាពលើកទឹកចិត្តដល់ក្រុមកីឡាករកម្ពុជាថា ជាដំណើរឆ្ពោះទៅដណ្តើមមេដាយជូនជាតិ មាតុភូមិកម្ពុជា។ សូមជម្រាបថា ជ័យជម្នះរបស់ក្រុមកីឡាបាល់ទះបុរសជម្រើសជាតិកម្ពុជា ក្នុងវគ្គពាក់កណ្តាលផ្តាច់ព្រ័ត្រនេះ នឹងត្រូវឡើងទៅប៉ះជាមួយក្រុមកីឡាបាល់ទះបុរសជម្រើសជាតិ ឥណ្ឌូនេស៊ី ដែលជាម្ចាស់មេដាយមាសជាច្រើនជំនាន់ ដើម្បីដណ្តើមយកមេដាយមាស សម្រាប់ព្រឹត្តិការណ៍កីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣៕