អភិបាលខេត្តតាកែវ លោក អ៊ូច ភា កាលពីព្រឹកថ្ងៃទី០៥ ខែឧសភា នេះ បានបើកកិច្ចប្រជុំមួយ ដើម្បីដោះស្រាយជូនបងប្អូនប្រជាពលរដ្ឋដែលពាក់ព័ន្ធទៅនិងទិញដីធ្លី និងវិនិយោគជាមួយឧកញ៉ា ជា សារ៉ន ដើម្បីស្វែងរកដំណោះស្រាយជូនពួកគាត់ បន្ទាប់ពីមានបងប្អូនប្រជាពលរដ្ឋរស់នៅក្នុងខេត្តតាកែវជាង៤០០នាក់បានដាក់ពាក្យបណ្ដឹងសុំអន្តរាគមន៍ពីអាជ្ញាធរខេត្តតាកែវអោយជួយពួកគាត់ដែលចាញ់បោកក្រុមហ៊ុន ជា សារ៉ន នៅខេត្តកំពត ។
លោក អ៊ូច ភា បានឲ្យដឹងថា ក្រោយពីស្ដាប់ការលើកឡើង និងសំណូមពររបស់បងប្អូនប្រជាពលរដ្ឋដែលចូលរួម ដោយស្នើសុំអោយអាជ្ញាធខេត្តតាកែវជួយអន្តរាគមន៍នោះ លោក អ៊ូច ភា អភិបាលខេត្តតាកែវបានដោះស្រាយបញ្ហាចំនួន៣ចំណុចជូនបងប្អូនប្រជាពលរដ្ឋ គឺទី១, អោយប្រជាពលរដ្ឋដាក់ពាក្យបណ្ដឹងនៅខេត្តកំពតឬដាក់ពាក្យបណ្ដឹងនៅសាលាខេត្តតាកែវ ហើយអាជ្ញាធខេត្តតាកែវ និងជួយអន្តរាគមន៍ទៅខេត្តកំពតអោយជួយដោះស្រាយជូនបងប្អូនប្រជាពលរដ្ឋ។ ទី២, ករណីបងប្អូនប្រជាពលរដ្ឋខ្ចីលុយធនាគារ គឺអោយក្រុមហ៊ុន ជា សារ៉ន ជាអ្នកទទួលខុសត្រូវក្នុងការបង់ការប្រាក់ជំនួសប្រជាពលរដ្ឋ និងទី៣ ពាក់ព័ន្អនិងប្លង់ដីរបស់ប្រជាពលរដ្ឋដែលដាក់បញ្ចាំនៅធនាគារគឺអោយក្រុមហ៊ុន ជា សារ៉ន យកអចលនៈទ្រព្យរបស់ខ្លួនដាក់បញ្ចាំនៅធនាគារយកប្រាក់មកលោះប្លង់ជូនបងប្អូនប្រជាពលរដ្ឋវិញ។
នៅក្នុងឱកាសនោះ លោកអភិបាលខេត្តតាកែវ ក៍បានសំណូមពរដល់បុគ្គលិកធនាគារ និងបុគ្គលិកមីក្រូហិរញ្ញវត្ថុទាំងអស់សូមកុំមានការគំរាមកំហែងប្ដឹងផ្ដល់ ឬរឹបអូសផ្ទះសម្បែងបងប្អូនប្រជាពលរដ្ឋដែលខ្ចីលុយពាក់ព័ន្ធទៅនិងក្រុមហ៊ុន ជា សារ៉ន ហើយក្នុងនោះអាជ្ញាធរមូលដ្ឋានត្រូវតាមដាន និងអន្តរាគមន៍អោយបានទាន់ពេលវេលាក្នុងការជួយបងប្អូនប្រជាពលរដ្ឋបើមានការគំរាមកំហែងណាមួយ។
គួរបញ្ជាក់ថា នៅក្នុងកិច្ចប្រជុំនោះ បងប្អូនប្រជាពលរដ្ឋបានទទួលយកចំពោះដំណោះស្រាយរបស់អាជ្ញាធរខេត្តតាកែវផងដែរ។
ឧកញ៉ា ជា សារ៉ន និងមនុស្ស៨ នាក់ទៀត ត្រូវបានសមត្ថកិច្ចខេត្តកំពត ធ្វើការឃាត់ខ្លួន ពាក់ព័ន្ធករណីឆរបោកប្រជាពលរដ្ឋ ក្រោមរូបភាពវិនិយោគដីឡូតិ៍ នៅស្រុកឈូក ខេត្តកំពត ហើយត្រូវបានចៅក្រមស៊ើបសួរសាលាដំបូងខេត្តកំពត បានចេញដីកាបង្គាប់ឱ្យឃុំខ្លួន កាលពីថ្ងៃទី២៧ ខែមេសា ឆ្នាំ២០២៣ ពីបទទឆបោកមានស្ថានទម្ងន់ទោស៕
