ប្រធានគណបក្សប្រជាជនកម្ពុជា សម្តេចតេជោ ហ៊ុន សែន នៅថ្ងៃទី០៣ ខែឧសភា ឆ្នាំ២០២៣នេះ បានប្រកាសទទួលយកលោក អៀ ចាន់ណា អតីតតំណាងយុវជន នៃអតីតគណបក្សសង្រ្គោះជាតិប្រទេសន័រវេ (Norway) ឱ្យធ្វើជាសមាជិកបក្សប្រជាជនកម្ពុជា ដោយបញ្ជាក់ថា គណបក្សប្រជាជនកម្ពុជា បើកចិត្តទូលាយទទួលយកមនុស្សពីគ្រប់ទិសទី ដោយមិនប្រកាន់និន្នាការនយោបាយ។ ការប្រកាសទទួលយករបស់សម្តេចតេជោ ហ៊ុន សែន ក្រោយពីលោកអៀ ចាន់ណា បានចេញវីដេអូ និងលិខិតសុំចូលរួមជីវភាពនយោបាយជាមួយគណបក្សប្រជាជនកម្ពុជា នារសៀលថ្ងៃទី០៣ ខែឧសភា នេះ។ សម្តេចបញ្ជាក់ថា “គណបក្សប្រជាជនកម្ពុជាតែងតែបើកចិត្តទូលាយទទួលយកមនុស្សពីគ្រប់ទិសទី ដោយមិនប្រកាន់និន្នាការនយោបាយពីអតីតកាលក្នុងគោលបំណងប្រម៉ូលផ្តុំធនធានមនុស្ស ធនធានប្រាជ្ញា និងទ្រព្យសម្បត្តិ ដើម្បីការពារសន្តិភាព និងបន្តការកសាងប្រទេសក្រោមម្លប់សន្តិភាពតទៅទៀត។ ក្នុងន័យនេះគណបក្សប្រជាជនកម្ពុជា សូមស្វាគមន៍ទទួលយកលោកអៀ ចាន់ណាជាសមាជិកគណបក្សប្រជាជនកម្ពុជាចាប់ពីពេលនេះតទៅ។
សូមបញ្ជាក់ថា លោកត្រូវបានសមត្ថកិច្ចចាប់ខ្លួន កាលពីថ្ងៃទី៣០ ខែឧសភា ឆ្នាំ២០២២ នៅក្បែរផ្សារអ៊ីអន រាជធានីភ្នំពេញ តាមដីការបស់តុលាការ ពាក់ព័ន្ធនឹងបទរួមគំនិតក្បត់ ដែលប្រព្រឹត្តឡើងកាលពីឆ្នាំ២០២០ ហើយបានតុលាការដោះលែងឲ្យនៅក្រៅឃុំបណ្តោះអាសន្ន កាលពីថ្ងៃទី០២ ខែឧសភា ម្សិលមិញ បន្ទាប់ពីរូបលោកបានទទួលកំហុស ហើយសុំទោសសម្តេចតេជោនាយករដ្ឋមន្រ្តី។ តាមរយៈវីដេអូ និងលិខិតសុំទោសរបស់លោក អៀ ចាន់ណា បានទទួលស្គាល់ពីកំហុសរបស់ខ្លួនទាំងអស់ដែលបានប្រព្រិត្តិកន្លងមក។ បន្ទាប់មកលោកសន្យាថាលោកនឹងគោរពទៅតាមច្បាប់របស់ម្ពុជាហើយការសម្រេចចិត្តនេះធ្វើឡើងទៅតាមឆន្ទៈគ្មានការបង្ខិតបង្ខំឡើយ
