នាវាទេសចរណ៍ខ្នាតយក្សមួយគ្រឿង នៅព្រឹកថ្ងៃទី២៥ ខែមេសា ឆ្នាំ២០២៣នេះ បានចូលចតនៅកំពង់ផែស្វយ័តក្រុងសីហនុ ក្នុងដំណើរទស្សនកិច្ចរយៈពេល១ថ្ងៃ ដើម្បីឲ្យក្រុមអ្នកទេសចរវ័យចំណាស់ដើរលេងកម្សាន្តនៅតំបន់រមណីដ្ឋានសំខាន់ៗ ក៏ដូចជានៅតាមទីវត្តអារាមនៅក្នុងក្រុងព្រះសីហនុ។ មន្ត្រីនគរបាលអន្តោប្រវេសន៍ច្រកទ្វារកំពង់ផែក្រុងព្រះសីហនុបានឲ្យដឹងថា នាវានេះមានឈ្មោះ “EUROPA2” មានបណ្តោយប្រវែង២២៥.៣៨ ម៉ែត្រ ទទឹងប្រវែង២៩.៩០ ម៉ែត្រ និងជម្រៅ ៦.៣ ម៉ែត្រ មាននាវិកបម្រើការនៅលើនាវាសរុប៣៦៧ នាក់ និងមានភ្ញៀវទេសចរ ៣៤៣នាក់។ មន្ត្រីដដែលបានប្រាប់ទៀតថា នាវានេះបានធ្វើដំណើរមកពីប្រទេសវៀតណាម ចូលចតនៅក្រុងព្រះសីហនុ បើតាមការគ្រោងទុកនាវាខ្នាតយក្សនេះ នឹងធ្វើការចាកចេញពីកំពង់ផែស្វយ័តក្រុងព្រះសីហនុនៅម៉ោង២២ យប់ថ្ងៃដដែល ឆ្ពោះទៅកាន់ប្រទេសថៃ។ គួររំលឹកថា នាវាទេសចរណ៍ខ្នាតយក្សមួយគ្រឿងនេះ ធ្លាប់បានចូលចតម្តង នៅកំពង់ផែស្វយ័តក្រុងព្រះសីហនុ កាលពីថ្ងៃទី១៨ ខែធ្នូ ឆ្នាំ២០១៨ ដោយចេញពីកំពង់ផែ Laem Chabang ប្រទេសថៃ។ ពេលនោះ  នាវាទេសចរណ៍នេះ មានផ្ទុកអ្នកដំណើរចំនួន៣១៥នាក់ (ស្រី១៦៧នាក់) និងនាវិកចំនួន៣៧៣នាក់ (ស្រី១០៤នាក់)៕