ភ្នំពេញ៖ ក្រុមហ៊ុន ប៊ូយ៉ុង របស់ប្រទេសកូរ៉េខាងត្បូង បានសន្យាផ្ដល់ជូនរថយន្តក្រុងចំនួន១ពាន់គ្រឿង ដល់រាជរដ្ឋាភិបាលកម្ពុជា សម្រាប់បម្រើសេវាសាធារណៈ ព្រមទាំងសន្យាជួយលើការអភិវឌ្ឍនានានៅក្នុងប្រទេសកម្ពុជា។ នៅក្នុងពិធីប្រគល់សញ្ញាបត្រជូនគរុសិស្ស គរុនិស្សិត និស្សិត និងបុគ្គលិកអប់រំ នាព្រឹកថ្ងៃទី២៥ ខែមេសា ឆ្នាំ២០២៣នេះសម្ដេចតេជោ ហ៊ុន សែន នាយករដ្ឋមន្រ្តីកម្ពុជា បានមានប្រសាសន៍ឱ្យដឹងថា កាលពី២៤ ខែមេសា ឆ្នាំ២០២៣ សម្តេចបានអនុញ្ញាតឱ្យប្រធានក្រុមហ៊ុនប៊ូយ៉ុង ចូលជួប។ សម្តេចតេជោ ហ៊ុន សែន បានមានប្រសាសន៍លើកឡើងថា ប្រធានក្រុមហ៊ុន ប៊ូយ៉ុង របស់ប្រទេសកូរ៉េខាងត្បូង បានសម្រេចផ្តល់ថវិកាឱ្យកម្ពុជា ដើម្បីទិញរថយន្តក្រុងចំនួន ១ពាន់គ្រឿង សម្រាប់វិស័យដឹកជញ្ជូន។ សម្តេចតេជោ នាយករដ្ឋមន្រ្តីកម្ពុជា បានថ្លែងដែរថា កាលពីចូលឆ្នាំថ្មីរថយន្តក្រុងដែលរៀបចំដោយសាលាក្រុងបានដឹកពលរដ្ឋខ្មែរទៅតាមបណ្តាខេត្តនានាបានប្រមាណ ៥ម៉ឺននាក់ ដោយឃើញពីភាពជោគជ័យ ក្រុមហ៊ុនប៊ូយ៉ុង ក៏សម្រេចជូនកម្ពុជា ១ពាន់គ្រឿង ដើម្បីប្រើប្រាស់។
សម្តេច តេជោ ហ៊ុន សែន បានមានប្រសាសន៍លើកឡើងទៀតថា ប្រធានក្រុមហ៊ុន ប៊ូយ៉ុងបានប្រាប់សម្ដេចថា ការវិនិយោគរបស់ក្រុមហ៊ុននៅកម្ពុជា គឺមិនយកប្រាក់ចំណេញចេញពីកម្ពុជានោះទេ ប៉ុន្តែនឹងជួយលើការអភិវឌ្ឍនានា៕
