ភ្នំពេញ៖ មន្រ្តីជាន់ខ្ពស់នៃរដ្ឋលេខាធិការដ្ឋានអាកាសចរស៊ីវិល ត្រូវបានសម្ដេចតេជោ ហ៊ុន សែន នាយករដ្ឋមន្រ្តីម្ពុជា សម្រេចបញ្ចប់មុខតំណែងពីអគ្គនាយករង នៃអគ្គនាយកដ្ឋានរដ្ឋបាលទូទៅ។ នៅក្នុងអនុក្រឹត្យស្ដីពី ការបញ្ចប់មុខតំណែងមន្រ្តីរាជការ ចុះហត្ថលេខាដោយសម្ដេចតេជោ ហ៊ុន សែន នាយករដ្ឋមន្រ្តីម្ពុជា នាថ្ងៃទី១១ ខែមេសា នេះបានសម្រេចបញ្ចប់មុខតំណែងលោក បែល វ៉ាន់ដែត ពីអគ្គនាយករង នៃអគ្គនាយកដ្ឋានរដ្ឋបាលទូទៅ នៃរដ្ឋលេខាធិការដ្ឋានអាកាសចរស៊ីវិល។
សម្ដេចតេជោ ហ៊ុន សែន បានបញ្ជារដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ រដ្ឋមន្ត្រីក្រសួងមុខងារ សាធារណៈ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល រដ្ឋមន្ត្រីគ្រប់ក្រសួងនិងប្រធាន គ្រប់ស្ថាប័នដែលពាក់ព័ន្ធ និងសាមីខ្លួន ត្រូវទទួលបន្ទុកអនុវត្តអនុក្រឹត្យនេះ តាមភារកិច្ចរៀងៗខ្លួន។ គួរកត់សម្គាល់ថា ការបញ្ចប់មុខតំណែងលោក បែល វ៉ាន់ដែត បានកើតឡើងក្រោយពេលដែលរូបលោក មានរឿងអាស្រូវចំពោះការប្រើប្រាស់អាវុធគំរាមលើអ្នកដទៃក្នុងករណីគ្រោះថ្នាក់ចរាចរណ៍កាលពីពេលថ្មីៗកន្លងទៅនេះ៕
