ភ្នំពេញ៖ ជនសង្ស័យចំនួន៦៥នាក់ ត្រូវបានសមត្ថកិច្ចឃាត់ខ្លួន នៅក្នុងប្រតិបត្តិការបង្ក្រាបបទល្មើសគ្រឿងញៀន ចំនួន២១ករណី នៅទូទាំងប្រទេស កាលពីថ្ងៃទី៥ ខែមេសា ឆ្នាំ២០២៣។ យោងតាមរបាយការណ៍ពីអគ្គស្នងការដ្ឋាន នគរបាលជាតិ បានឱ្យដឹងថា ក្នុងចំណោមជនសង្ស័យទាំងចំនួន៦៥នាក់ ដែលសមត្ថកិច្ចបានឃាត់ខ្លួន ក្នុងនោះរួមមាន ៖ ជួញដូរ ៩ករណី ឃាត់ខ្លួន ២៧នាក់,ដឹកជញ្ជូន រក្សាទុក ៤ករណី ឃាត់ខ្លួន ៦នាក់ និងប្រើប្រាស់ ៨ករណី ឃាត់ ខ្លួន៣២នាក់ (ស្រី ៥នាក់)។ របាយការណ៍ដដែលបានបញ្ជាក់ថា ក្នុងប្រតិបត្តិការនេះ សមត្ថកិច្ចដកហូតវត្ថុតាង ប្រភេទមេតំហ្វេតាមីន (Ice) ទម្ងន់៩៥៤,៧៨ក្រាម និង៣កញ្ចប់តូចផងដែរ។ គួរកត់សម្គាល់ដែរថា ក្នុងអំឡុងក្នុងឆ្នាំ២០២២កន្លងទៅ សមត្ថកិច្ចឃាត់ខ្លួនជនសង្ស័យប្រមាណ១២០០០នាក់ នៅក្នុងរង្វង់ប្រតិបត្តិការបង្រ្កាបគ្រឿងញៀន ជាង៦០០០ករណី នៅទូទាំងប្រទេស និងដកហូតបានសារធាតុញៀនគ្រប់ប្រភេទ សរុប១៤តោន ៥០៤គីឡូ ០៨.៦៦ក្រាម។ ជាមួយគ្នានេះ អគ្គស្នងការដ្ឋាន នគរបាលជាតិ បានដាក់ចេញទិសដៅចំនួន៤ចំណុច ជាយុទ្ឋសាស្រ្ត ដើម្បីឈានដល់ការបង្រ្កាបករណីជួញដូរគ្រឿងញៀន ឱ្យបានជោគជ័យ ខណៈនិន្នាការ នៃការផលិត ការចរាចរជួញដូរគ្រឿងញៀនខុសច្បាប់ជាសកល ជាពិសេសគ្រឿងញៀនសំយោគ ដែលកំពុងមានការកើនឡើង៕